ຂປລ
ທ່ານ ລິວປິ່ນ ຜູ້ຊ່ວຍລັດຖະມົນຕີ ກະຊວງການຕ່າງປະເທດຈີນ ແລະ ທ່ານ ເຊີຮີ ຄິສລິດສະຢາ ຮອງລັດຖະມົນຕີ ຜູ້ທີໜຶ່ງກະຊວງການຕ່າງປະເທດ ອູແກຣນ ໄດ້ຈັດການເຈລະຈາດ້ານການເມືອງຢູ່ນະຄອນຫຼວງປັກກິ່ງປະເທດຈີນ.
ຂປລ.ວິທະຍຸ-ໂທລະພາບ ສູນກາງຈີນ ຫລື CMG, ເມື່ອບໍ່ດົນມານີ້, ທ່ານ ລິວປິ່ນ ຜູ້ຊ່ວຍລັດຖະມົນຕີ ກະຊວງການຕ່າງປະເທດຈີນ ແລະ ທ່ານ ເຊີຮີ ຄິສລິດສະຢາ ຮອງລັດຖະມົນຕີ ຜູ້ທີໜຶ່ງກະຊວງການຕ່າງປະເທດ ອູແກຣນ ໄດ້ຈັດການເຈລະຈາ ດ້ານການເມືອງ ຢູ່ນະຄອນຫລວງ ປັກກິ່ງ ຂອງ ສປ ຈີນ. ທ່ານ ລິວປິ່ນ ກ່າວວ່າ: ສປ ຈີນ ແລະ ອູແກຣນ ເຄົາລົບນັບຖືກັນ, ໄວ້ເນື້ອເຊື່ອໃຈກັນ ແລະຕ່າງຝ່າຍຕ່າງໄດ້ຮັບຜົນປະໂຫຍດຈາກການຮ່ວມມື, ທັງໄດ້ຊຸກຍູ້ ໃຫ້ການຮ່ວມມື ໃນຂົງເຂດຕ່າງໆ ເຊັ່ນ: ເສດຖະກິດການຄ້າ, ກະສິກຳ, ວິທະຍາສາດເຕັກໂນໂລຊີ, ວັດທະນະທຳ ແລະອື່ນໆໄດ້ຮັບໝາກຜົນທີ່ອຸດົມສົມບູນ. ຈີນຍິນດີຮ່ວມກັບອູແກຣນ ສືບຕໍ່ຈັດຕັ້ງປະຕິບັດຄວາມຮັບຮູ້ທີ່ເປັນເອກະພາບກັນອັນສຳຄັນລະຫວ່າງປະມຸກລັດສອງປະເທດ, ຊຸກຍູ້ໃຫ້ສາຍພົວພັນລະຫວ່າງ ສອງຝ່າຍພັດທະນາ ຢ່າງໝັ້ນທ່ຽງ ແລະ ຍາວນານ.
ທ່ານ ທ່ານ ເຊີຮີ ຄິສລິດສະຢາ ກ່າວວ່າ: ອູແກຣນ ໃຫ້ຄວາມສຳຄັນ ຢ່າງສູງຕໍ່ສາຍພົວພັນກັບຈີນ, ປະຕິບັດ ຕາມຫລັກການ ປະເທດຈີນດຽວ, ຍິນດີຊຸກຍູ້ໃຫ້ການແລກປ່ຽນ ແລະການຮ່ວມມືລະຫວ່າງສອງປະເທດໃນດ້ານຕ່າງໆ ໃຫ້ກ້າວເຂົ້າສູ່ ລວງເລິກຕື່ມອີກ ເພື່ອຊຸກຍູ້ ໃຫ້ສາຍພົວພັນລະຫວ່າງ ອູແກຣນ- ສປ ຈີນ ໄດ້ຮັບການພັດທະນາໄປໜ້າຢ່າງບໍ່ຢຸດຢັ້ງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
