ຂປລ.​ ປະເທດຈີນ ແລະ ປະເທດລາວ ມີສາຍພູ ແລະ ສາຍນ້ຳຕິດຈອດກັນ, ເປັນປະເທດເພື່ອນບ້ານທີ່ເປັນມິດສັງຄົມນິຍົມ ທີ່ມີອະນາຄົດຜູກພັນກັນ ແລະ ເປັນຄູ່ຮ່ວມຊະຕາກຳ. ນັບຕັ້ງແຕ່ປີ 1961 ທີ່ ປະເທດຈີນ ແລະ ສປປ ລາວ ໄດ້ສ້າງຕັ້ງສາຍພົວພັນທາງການທູດເປັນຕົ້ນມາ, ພາຍໃຕ້ການນຳພາທາງຍຸດທະສາດ ຂອງຜູ້ນຳສູງສຸດຂອງສອງພັກ-ສອງລັດ, ສອງຝ່າຍໄດ້ສ້າງສາຍພົວພັນ 4 ດີ ຄື: "ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ, ຄູ່ຮ່ວມມືທີ່ດີ". ຢຸນນານ ໃນນາມເປັນເມືອງແຖວໜ້າ ໃນການເປີດປະຕູສູ່ພາຍນອກຂອງຈີນ ຕໍ່ອາຊີໃຕ້ ແລະ ອາຊີຕາເວັນອອກສຽງ ໃຕ້, ມີພູມສັນຖານໃກ້ຄຽງກັນ ແລະ ປະຊາຊົນມີຄວາມໃກ້ຊິດສະໜິດສະໜົມລາວ, ຫລາຍປີມານີ້ ສອງຝ່າຍ ຢຸນນານ-ລາວ ໄດ້ສ້າງຕັ້ງສາຍພົວພັນເມືອງມິດຕະພາບຫລາຍຄູ່, ກາຍເປັນເສົາຄ້ຳທີ່ສຳຄັນໃນການສ້າງຄູ່ຮ່ວມຊາຕາກຳ ຈີນ-ລາວ. ປັດຈຸບັນ, ພາຍໃຕ້ການຊີ້ນຳຂອງ "ແຜນປະຕິບັດງານ ວ່າດ້ວຍການສ້າງຄູ່ຮ່ວມຊາຕາກຳ ຈີນ-ລາວ ຂອງ ພັກກອມມູນິດຈີນ ແລະ ພັກປະຊາຊົນປະຕິວັດລາວ (ປີ 2024-2028)", ເຮັດໃຫ້ການຮ່ວມມືເມືອງມິດຕະພາບ ຢຸນນານ ສປ ຈີນ- ສປປ ລາວ ເລິກເຊິ່ງ ແລະ ໜັກແໜ້ນຂຶ້ນ, ບໍ່ພຽງແຕ່ແມ່ນຄວາມຮຽກຮ້ອງຕ້ອງການທີ່ຈຳເປັນ ໃນການສ້າງພື້ນຖານຄວາມມຸ່ງມາດປາດຖະໜາຂອງປະຊາຊົນ ໃນການພົວພັນມິດຕະພາບ ຈີນ-ລາວ ໃຫ້ແໜ້ນແກ່ນເທົ່ານັ້ນ, ແຕ່ຍັງແມ່ນເສັ້ນທາງແຫ່ງການປະຕິບັດຕົວຈິງ ທີ່ສຳຄັນໃນການສ້າງຄູ່ຮ່ວມຊາຕາກຳ ຈີນ-ລາວ ອີກດ້ວຍ.

ຢຸນນານ ຕັ້ງຢູ່ຊາຍແດນພາກຕາເວັນຕົກສຽງໃຕ້ຂອງຈີນ, ມີປະຫວັດການພົວພັນໄປ ມາຫາສູ່ກັນກັບປະຊາຊົນບັນດາປະເທດອາຊີຕາເວັນອອກສຽງໃຕ້ມາຍາວນານ. ເສັ້ນທາງສາຍໄໝພາກໃຕ້ທີ່ເລີ່ມບຸກເບີກໃນສະໄໝລາຊະວົງສິນ ແລະ ຮັ້ນ,ໄດ້ກາຍ ເປັນຊ່ອງທາງທີ່ສຳຄັນ ໃນການເຊື່ອມໂຍງ-ເຊື່ອມຈອດລະຫວ່າງບັນພະບຸລຸດຂອງພາກຕາເວັນຕົກສຽງໃຕ້ຂອງປະເທດຈີນ ກັບບັນດາປະເທດອ້ອມຂ້າງ. ຢຸນນານ ຈຶ່ງເປັນໜຶ່ງໃນສູນກາງການຂົນສົ່ງ ແລະ ສູນລວບລວມ ແລະ ກະຈາຍສິນຄ້າ  ທີ່ສຳຄັນທີ່ສຸດບົນເສັ້ນທາງດັ່ງກ່າວ. ນັບແຕ່ບູຮານນະການເປັນຕົ້ນມາ ຢຸນນານ ແລະ ລາວ ກໍມີການໄປມາຫາສູ່ກັນທາງດ້ານການຄ້າຢ່າງບໍ່ຂາດສາຍ, ການຄ້າຊາຍແດນຂອງປະຊາຊົນກໍມີຄວາມຄຶກຄື້ນຕະຫລອດມາ. ໃນນາມເປັນແຂວງດຽວຂອງຈີນ ທີ່ມີຊາຍແດນຕິດຈອດກັນ ກັບ ລາວ, ມິດຕະພາບ ຈີນ-ລາວ ແບບອ້າຍນ້ອງຍິ່ງມີຄວາມຊັດເຈນ ແລະ ເລິກເຊິ່ງເປັນພິເສດລະຫວ່າງ ຢຸນນານ-ລາວ.

ວັນທີ 18 ຕຸລາ 2002, ກິ່ງແຂວງສິບສອງພັນນາແຂວງຢຸນນານ ແລະ ແຂວງຫລວງພະບາງ ສປປ ລາວ ໄດ້ສ້າງຕັ້ງສາຍພົວພັນເມືອງມິດຕະພາບຢ່າງເປັນທາງການ. ໃນນາມເປັນເມືອງມິດຕະພາບສາກົນຄູ່ທຳອິດ ລະຫວ່າງ ຢຸນນານ-ລາວ, ການສ້າງຕັ້ງສາຍພົວພັນໃນຄັ້ງນີ້ ໄດ້ເປີດໜ້າປະຫວັດສາດໃໝ່ໃຫ້ແກ່ການຮ່ວມມືລະຫວ່າງທ້ອງຖິ່ນຂອງສອງຝ່າຍໃນຕໍ່ໜ້າ. ມາຮອດປັດຈຸບັນ, ຢຸນນານ-ລາວ ໄດ້ສ້າງຕັ້ງເມືອງມິດຕະພາບໃນແຕ່ລະຂັ້ນ ແລະ ເມືອງ ທີ່ມີເຈດຈຳນົງຈະສ້າງສາຍພົວພັນກັນມີປະມານ 20 ຕົວເມືອງ ເຊິ່ງກວມເອົາ 3 ຂັ້ນ ຄື: ຂັ້ນແຂວງ, ຂັ້ນນະຄອນ ແລະ ຂັ້ນເມືອງ ເຊິ່ງຈຳນວນລວມແມ່ນຈັດຢູ່ໃນອັນດັບແຖວໜ້າຂອງທົ່ວປະເທດ. ໃນລະດັບຂັ້ນແຂວງ ປະກອບມີ: ແຂວງຫລວງພະບາງ-ກິ່ງແຂວງສິບສອງພັນນາ, ແຂວງຜົ້ງສາລີ-ນະຄອນຜູເອີ , ແຂວງຈຳປາສັກ-ນະຄອນຢູ້ຊີ , ແຂວງຊຽງຂວາງ-ນະຄອນຈ້າວທົງ , ແຂວງອຸດົມໄຊ-ກິ່ງແຂວງສິບສອງພັນນາ, ແຂວງຫຼວງນ້ຳທາ-ນະຄອນຄຸນໝິງ. ໃນລະດັບຂັ້ນນະຄອນ ປະກອບມີ: ນະຄອນຫລວງວຽງຈັນ-ນະຄອນຄຸນໝິງ , ນະຄອນຫລວງພະບາງ-ນະຄອນຊຽງຮຸ່ງ. ໃນລະດັບຂັ້ນເມືອງ ປະກອບມີ: ເມືອງຜົ້ງສາລີ-ເມືອງຊືເໝົາ , ເມືອງໄຊທານີ-ເມືອງຫົງເຫີ , ເມືອງໄຊ-ນະຄອນອ່ານໜິງ, ເມືອງວັງວຽງ-ເມືອງຢວນຈ່ຽງ , ເມືອງຫລວງນ້ຳທາ-ເມືອງໜິງເອີ້ , ເມືອງສິງ-ເມືອງຫລາ , ເມືອງຍອດອູ-ເມືອງຈ່ຽງເສີງ. ນອກຈາກນີ້, ຢູ່ຕາມຊາຍແດນ ສອງຝ່າຍຍັງໄດ້ສ້າງຕັ້ງບ້ານມິດຕະພາບຈຳນວນ 5 ບ້ານ. ໃນນັ້ນ, ແຂວງສິບສອງພັນນາ ມີ 3 ບ້ານ ຄື: ບ້ານປ່າປູເມືອງສິງ-ບ້ານກົວຟາງ ເມືອງເຜິ່ງ, ບ້ານນາຄຳ ເມືອງສິງ-ບ້ານເລ້ຍ ເມືອງມານ, ບ້ານປ່າຄາເມືອງບຸນເໜືອ-ບ້ານປ່າຄາ ຕາແສງເມືອງບ້ານ.ນອກຈາກນີ້,ຍັງມີນະຄອນຜູເອີອີກ 2 ບ້ານ ຄື: ບ້ານຍອດອູ ເມືອງຍອດອູ-ບ້ານເມືອງຄັງ ຕາແສງຄັງຜິງ ,ບ້ານມາລີເທີ ເມືອງຍອດອູ-ບ້ານໜິວລົວເຫີ ຕາແສງເມືອງເລ້ຍ.

     ຕະຫລອດໄລຍະເວລາທີ່ຜ່ານມາ, ສອງຝ່າຍ ຢຸນນານ-ລາວ ໄດ້ຖືເອົາເມືອງມິດຕະພາບ ເປັນເວທີ, ເຮັດໃຫ້ການແລກປ່ຽນ ແລະ ການຮ່ວມມືທີ່ເປັນຮູບປະທຳໃນການໄປມາຫາສູ່ກັນຂອງບຸກຄະລາກອນ, ຂົງເຂດກະສິກຳ, ວັດທະ ນະທຳ ແລະ ການສຶກສາ, ສາທາລະນະສຸກ, ການທ່ອງທ່ຽວ ແລະ ອື່ນໆ ໄດ້ຮັບການລົງເລິກຢ່າງບໍ່ຢຸດຢັ້ງ, ເຮັດໃຫ້ມິດຕະ ພາບທີ່ເປັນມູນເຊື້ອມີມາເປັນພັນປີ ກັບມາມີຊີວິດຊີວາໃໝ່.

ການຮ່ວມມືເມືອງມິດຕະພາບໄດ້ຮັບຜົນສໍາເລັດຕົວຈິງ ຜູກຈິດດ້ວຍໃຈ, ສາຍພົວພັນແບບອ້າຍນ້ອງ ຢຸນນານ-ລາວ ອັນເລິກເຊິ່ງ.

    ນັບຕັ້ງແຕ່ສ້າງຕັ້ງສາຍພົວພັນທາງການທູດເປັນຕົ້ນມາ, ຢຸນນານໄດ້ເສີມຂະຫຍາຍບົດບາດພິເສດ ແລະ ສຳຄັນໃນການຮ່ວມມື ຈີນ-ລາວ ຢ່າງຫ້າວຫັນ, ຊຸກຍູ້ໃຫ້ການສ້າງຄູ່ຮ່ວມຊາຕາກຳ ຈີນ-ລາວ ຢັ່ງຮາກເລິກ ແລະ ແຕກດອກອອກຜົນ. ຜ່ານການພົວພັນເມືອງມິດຕະພາບສາກົນ, ສອງຝ່າຍໄດ້ເພີ່ມທະວີມິດຕະພາບລະຫວ່າງປະຊາຊົນ ແລະ ລົງເລິກການຮ່ວມມືບົນພື້ນຖານຕ່າງຝ່າຍຕ່າງມີຜົນປະໂຫຍດຢ່າງບໍ່ຢຸດຢັ້ງ, ຈົນຍາດໄດ້ຜົນສຳເລັດໃນຫລາຍດ້ານເປັນຕົ້ນແມ່ນ ນະວັດຕະກຳດ້ານກົນໄກປັບປຸງປະຊາຄົມການບໍລິຫານແບບປະສານສົມທົບກັນໃຫ້ສົມບູນຂຶ້ນ.

  ເມືອງມິດຕະພາບ ຢຸນນານ-ລາວ ໄດ້ສ້າງເງື່ອນໄຂຮັບປະກັນດ້ານກົນໄກໃຫ້ແກ່ການສ້າງຄູ່ຮ່ວມຊາຕາກຳ ຈີນ-ລາວ ຜ່ານການສ້າງຕັ້ງກົນໄກການຕິດຕໍ່ພົວພັນເປັນປົກກະຕິ. ປີ 2004, ກົນໄກຄະນະປະສານງານການຮ່ວມມື ແຂວງ ຢຸນນານ ສປ ຈີນ ກັບ ພາກເໜືອລາວໄດ້ຮັບການສ້າງຕັ້ງຂຶ້ນຢ່າງເປັນທາງການ, ເຊິ່ງເປັນການເປີດສາກການຮ່ວມມືຮອບດ້ານ ລະຫວ່າງ ຢຸນນານ ແລະ ລາວ.

 ຕະຫລອດ 20 ກວ່າປີຜ່ານມາ, ສອງຝ່າຍໄດ້ຈັດກອງປະຊຸມຢ່າງປະສົບຜົນສຳເລັດມາແລ້ວ 14 ຄັ້ງ, ກົນໄກຄະນະປະສານງານ ໄດ້ເຄື່ອນໄຫວຢ່າງມີປະສິດທິພາບສູງ, ການຮ່ວມມືທີ່ເປັນຮູບປະທຳໃນແຕ່ລະຂົງເຂດ ໄດ້ຮັບການລົງເລິກຢ່າງຕໍ່ເນື່ອງ, ປະກອບສ່ວນເປັນກຳລັງແຮງອັນສຳຄັນ ເຂົ້າໃນການຊຸກຍູ້ການສ້າງຄູ່ຮ່ວມຊາຕາກຳ ຈີນ-ລາວ. ນອກນີ້, ການບໍລິຫານແບບປະສານສົມທົບກັນ ຢູ່ເຂດຊາຍແດນ ໄດ້ກາຍເປັນຈຸດພົ້ນເດັ່ນ. ປີ 2022 ນະຄອນຄຸນໝິງໄດ້ຮັບການມອບສິດຄຸ້ມຄອງບໍ່ຫານ ເຊິ່ງເປັນການລິເລີ່ມຮູບແບບໃໝ່ທີ່ ເມືອງເອກຂອງແຂວງ ຄຸ້ມຄອງລວມການພັດທະນາດ່ານຊາຍແດນ, ເຮັດໃຫ້ຜົນກະທົບ "1+1>2" ຂະຫຍາຍຕົວຢ່າງຕໍ່ເນື່ອງ. ປັດຈຸບັນ, ດ່ານທາງລົດໄຟບໍ່ຫານ ໄດ້ກາຍເປັນດ່ານທາງລົດໄຟທີ່ມຸ່ງໜ້າສູ່ອາຊຽນທີ່ມີຂະໜາດໃຫຍ່ທີ່ສຸດ, ມີປະສິດທິພາບໃນການຜ່ານດ່ານສູງທີ່ສຸດ ແລະ ມີການຂະຫຍາຍຕົວຂອງການຂົນສົ່ງສິນຄ້າໄວທີ່ສຸດຂອງທົ່ວປະເທດ, ພ້ອມດຽວກັນນັ້ນ ກໍຍັງໄດ້ກາຍເປັນ "ທ່າບົກອະນາໄມສາກົນ" ແຫ່ງທໍາອິດທີ່ໄດ້ຮັບການຮັບຮອງຈາກອົງການອະນາໄມໂລກ, ສອງຝ່າຍ ຈີນ-ລາວ ບັນລຸການແບ່ງປັນພື້ນທີ່ການພັດທະນາຮ່ວມກັນ.

    ເມືອງມິດຕະພາບ ຢຸນນານ-ລາວ ຖືເອົາການເຊື່ອມຈອດພື້ນຖານໂຄງລ່າງ ເປັນຈຸດບຸກທະລຸ, ສ້າງແຮງຂັບເຄື່ອນຢ່າງແຂງແຮງໃຫ້ແກ່ການສ້າງປະຊາຄົມເສດຖະກິດ ຈີນ-ລາວ.ການເຊື່ອມໂຍງດ້ານເສດຖະກິດ-ການຄ້າ ສ້າງປະຊາຄົມການພັດທະນາຂ້າມຊາດ.

 ໂດຍອີງໃສ່ "ຊ່ອງທາງຄ້າ" ຂອງທາງລົດໄຟ ລາວ-ຈີນ, ໃນປີ 2024 ມູນຄ່າການຄ້າ ຂາເຂົ້າ-ຂາອອກ ຈີນ-ລາວ ບັນລຸ 52.728 ລ້ານຢວນ, ເພີ່ມຂຶ້ນ 89,23% ເມື່ອທຽບໃສ່ປີ 2021, ອັດຕາການເຕີບໂຕສະເລ່ຍຕໍ່ປີເກືອບ 30%, ໃນນັ້ນ ມູນຄ່າການຄ້າ ຂາເຂົ້າ-ຂາອອກ ຂອງຢຸນນານຕໍ່ລາວບັນລຸ 18.987 ລ້ານຢວນ, ເພີ່ມຂຶ້ນ 1,25 ເທົ່າ ເມື່ອທຽບໃສ່ປີ 2021. ການເຊື່ອມຈອດຂອງທາງລົດໄຟ ລາວ-ຈີນ ບໍ່ພຽງແຕ່ເຮັດໃຫ້ການຄ້າ ແລະ ໂລຈິສຕິກ ມີຄວາມຄຶກຄື້ນເທົ່ານັ້ນ, ແຕ່ຍັງໄດ້ເຊື່ອມຕໍ່ການພັດທະນາແບບປະສານສົມທົບກັນຂອງເຂດອຸດສາຫະກຳຕາມແລວທາງລົດໄຟອີກດ້ວຍ. ເພື່ອສືບຕໍ່ເສີມຂະຫຍາຍບົດບາດ ການແຜ່ຂະຫຍາຍ ແລະ ຊຸກຍູ້ ຂອງເຂດຄຸນໝິງ, ຄຸນໝິງ, ບໍ່ຫານ ແລະ ວຽງຈັນ ພວມຕັ້ງໜ້າຄົ້ນຄວ້າຮູບແບບການພັດທະນາໃໝ່ "ການເຊື່ອມໂຍງສາມພື້ນທີ່". ເດືອນມັງກອນ 2024, ເຂດພັດທະນາເສດຖະກິດຄຸນໝິງ (ເຂດຄຸນໝິງ ຂອງເຂດທົດລອງການຄ້າເສລີ ), ເຂດຮ່ວມມືເສດຖະກິດ ບໍ່ຫານ-ບໍ່ເຕັນ ຈີນ-ລາວ ແລະ ເຂດພັດທະນາກວມລວມໄຊເສດຖາ ນະຄອນຫລວງວຽງຈັນ ໄດ້ລົງນາມໃນສັນຍາການຮ່ວມມືຍຸດທະສາດ "ການເຊື່ອມໂຍງສາມເຂດ". ໃນອະນາຄົດຜ່ານການຮ່ວມມືທີ່ເປັນຮູບປະທຳໃນຂົງເຂດການດຶງດູດການລົງທຶນ, ການຮ່ວມມືໂຄງການ, ການສ້າງຄວາມເຂັ້ມແຂງ ແລະ ເສີມຂະຫຍາຍຫ່ວງໂສ້ອຸດສາຫະກຳ ແລະ ອື່ນໆ, ຢຸນນານ-ລາວ ຈະຮ່ວມມືກັນສ້າງສວນສາທິດການປະສານງານດ້ານອຸດສາຫະກຳຄຸນໝິງ-ວຽງຈັນ, ສ້າງເປັນການວາງຜັງອຸດສາຫະກຳໃໝ່ ທີ່ມີການແບ່ງງານ ແລະ ຮ່ວມມືກັນລະຫວ່າງ ຄຸນໝິງ-ບໍ່ຫານ-ວຽງຈັນ.

 ເມືອງມິດຕະພາບ ຢຸນນານ-ລາວ ໄດ້ລົງເລິກການແລກປ່ຽນວັດທະນະທຳ,ການຮຽນຮູ້ວັດທະນະທໍາເຊິ່ງກັນ ແລະ ກັນ ສ້າງປະຊາຄົມການເຊື່ອມຈິດໃຈຂອງປະຊາຊົນໃຫ້ແໜ້ນແກ່ນ ແລະ ຮັດແໜ້ນສາຍໃຍການເຊື່ອມຈິດໃຈຂອງປະຊາຊົນຢ່າງບໍ່ຢຸດຢັ້ງ ໂດຍຜ່ານການຮ່ວມມືໃນຫລາຍຂົງເຂດ ເຊັ່ນ: ການຝຶກອົບຮົມບຸກຄະລາກອນ, ການທ່ອງທ່ຽວຂ້າມຊາດ, ຊີວິດການເປັນຢູ່ຂອງສັງຄົມ ແລະ ອື່ນໆ. ໃນດ້ານການຮ່ວມມືການສຶກສາ, ຢຸນນານ-ລາວ ໄດ້ສ້າງລະບົບການສ້າງຊັບພະຍາກອນມະນຸດຂ້າມຊາດທີ່ມີຫລາຍລະດັບ ແລະ ກວ້າງຂວາງ, ສະໜອງການສະໜັບສະໜູນດ້ານຊັບພະຍາກອນມະນຸດທີ່ເຂັ້ມແຂງ ໃຫ້ແກ່ການສ້າງຄູ່ຮ່ວມຊາຕາກຳ ຈີນ-ລາວ. ຄູສອນວິຊາທາງລົດໄຟ ແລະ ຜູ້ຂັບລົດໄຟ ສັນຊາດລາວ ຮຸ່ນທຳອິດ ທີ່ສ້າງໂດຍວິທະຍາໄລເຕັກນິກວິຊາຊີບທາງລົດໄຟຄຸນໝິງ ໄດ້ກາຍເປັນກຳລັງຫລັກບົນເສັ້ນທາງລົດໄຟ ລາວ-ຈີນ; ເວທີ "ຫ້ອງຮຽນອອນລາຍເມືອງມິດຕະພາບ"  ທີ່ສ້າງຂຶ້ນໂດຍ ຄຸນໝິງ ໄດ້ຊ່ວຍຍົກລະດັບຄວາມສາມາດ ໃຫ້ແກ່ພະນັກງານສາທາລະນະສຸກ ຢູ່ວຽງຈັນ ແລະ ຫລວງພະບາງ, ຕົວຢ່າງແບບນີ້ມີຢ່າງຫລວງຫລາຍຈົນນັບບໍ່ຖ້ວນ. ໃນດ້ານການທ່ອງທ່ຽວຂ້າມຊາດ, ເມືອງມິດຕະພາບ ຢຸນນານ-ລາວ ໄດ້ມີການຄົ້ນຄວ້າຢ່າງຫລາກຫລາຍ ໂດຍອ້ອມຮອບການລົງນາມໃນສັນຍາການຮ່ວມມື, ການເພີ່ມທະວີການສະໜອງຜະລິດຕະພັນການທ່ອງທ່ຽວ, ການເຮັດໃຫ້ການຂົນສົ່ງຂ້າມຊາດອຸດົມສົມບູນ ແລະ ອື່ນໆ. ຜ່ານພັນທະມິດ ການທ່ອງທ່ຽວເມືອງມິດຕະພາບສາກົນຄຸນໝິງ, ສອງຝ່າຍບໍ່ພຽງແຕ່ເພີ່ມທະວີການຮ່ວມມືໃນການສົ່ງນັກທ່ອງທ່ຽວຂ້າມຊາດເຊິ່ງກັນ ແລະ ກັນ ເທົ່ານັ້ນ, ແຕ່ຍັງໄດ້ຮ່ວມກັນສ້າງ 10 ຜະລິດຕະພັນ ເສັ້ນທາງທ່ອງທ່ຽວຄຸນນະພາບສູງທາງລົດໄຟ ລາວ-ຈີນ, ເຮັດໃຫ້ນັກທ່ອງທ່ຽວຂ້າມຊາດເພີ່ມຂຶ້ນຢ່າງໄວວາ. ໃນຂົງເຂດຊີວິດການເປັນຢູ່ໃນສັງຄົມ, ບໍ່ວ່າຈະເປັນການຊ່ວຍເຫລືອເຊິ່ງກັນ ແລະ ກັນ ລະຫວ່າງ ຢຸນນານ ແລະ ລາວ ໃນໄລຍະການລະບາດຂອງພະຍາດ ຫລື ການສ້າງຕັ້ງ "ເຂດສາທິດການບໍລິການດ້ານການແພດ ແລະ ສາທາລະນະສຸກ ໃນພາກພື້ນຂ້າມຊາດ ຈີນ-ລາວ", ສອງຝ່າຍລ້ວນແຕ່ໄດ້ໃຊ້ການກະທຳຕົວຈິງ ເພື່ອອະທິບາຍຄວາມໝາຍຂອງຈິດໃຈຄູ່ຮ່ວມຊາຕາກຳທີ່ວ່າ "ຍາດຕິພີ່ນ້ອງຫວັງດີຕໍ່ກັນ, ເພື່ອນບ້ານຫວັງດີຕໍ່ກັນ".

ສ້າງທ່າແຮງດ້ວຍປາຍປາກກາ, ຂຽນໜ້າປະຫວັດສາດໃໝ່ແຫ່ງຄູ່ຮ່ວມຊາຕາກຳ

 ທ່ານ ສີ ຈິ້ນຜິງ ເລຂາທິການໃຫຍ່ ໄດ້ຍົກໃຫ້ເຫັນວ່າ: "ຕ້ອງຊຸກຍູ້ວຽກງານເມືອງມິດຕະພາບສາກົນຂອງຈີນຢ່າງແຂງແຮງ, ສົ່ງເສີມການແລກປ່ຽນລະຫວ່າງອໍານາດການປົກຄອງທ້ອງຖິ່ນຂອງຈີນ ແລະ ຕ່າງປະເທດ, ຊຸກຍູ້ໃຫ້ບັນລຸການແບ່ງປັນຊັບພະຍາກອນ,ການເສີມຂະຫຍາຍທ່າແຮງເຊິ່ງກັນ ແລະ ກັນ ແລະ ການຮ່ວມມືແບບຕ່າງຝ່າຍຕ່າງມີຜົນປະໂຫຍດ", "ເສີມຂະຫຍາຍບົດບາດທີ່ເປັນເອກະລັກຂອງການທູດປະຊາຊົນ, ຈັບມືກັນສ້າງຄູ່ຮ່ວມຊາຕາກຳຂອງມວນມະນຸດ" ເຊິ່ງໄດ້ສະໜອງແນວທາງພື້ນຖານໃຫ້ແກ່ການເຮັດວຽກງານເມືອງມິດຕະພາບສາກົນໃຫ້ດີຂຶ້ນຕື່ມ, ສ້າງພື້ນຖານຄວາມມຸ່ງມາດປາດຖະໜາ ຂອງປະຊາຊົນພາຍໃຕ້ຄູ່ຮ່ວມຊາຕາກຳ ຈີນ-ລາວ ໃຫ້ ແໜ້ນແກ່ນ.

   ພີ່ນ້ອງຍິ່ງໄປມາຍິ່ງໃກ້ຊິດ, ເພື່ອນມິດຍິ່ງຄົບຫາຍິ່ງສະໜິດແໜ້ນ. ມິດຕະພາບ ຈີນ-ລາວ ທີ່ມີມາຫລາຍເຊັ່ນຄົນ,ມີມູນເຊື້ອທາງປະຫວັດສາດອັນເລິກເຊິ່ງ. ປັດຈຸບັນ, ການປ່ຽນແປງໃນຮອບຮ້ອຍປີພວມຜັນແປໄປຢ່າງໄວວາ, ສະພາບການສາກົນມີຄວາມສະລັບສັບຊ້ອນ, ການເພີ່ມທະວີການສານຕາໜ່າງເມືອງມິດຕະພາບໃຫ້ແໜ້ນໜາຕື່ມອີກ ແລະ ຊຸກຍູ້ການຮ່ວມມືເມືອງມິດຕະພາບໃຫ້ບັນລຸການພັດທະນາທີ່ດີກວ່າເກົ່າ ແມ່ນມີຄວາມໝາຍອັນເລິກ ເຊິ່ງ ແລະ ເໝາະສົມກັບເວລາທີ່ສຸດ.

  ໃນອະນາຄົດ, ສອງຝ່າຍຢຸນນານ-ລາວ ຄວນຖືເອົາແຜນປະຕິບັດງານ ວ່າດ້ວຍ ການສ້າງຄູ່ຮ່ວມຊາຕາກຳ ຈີນ-ລາວ ສະບັບໃໝ່ເປັນທິດນຳ, ສືບຕໍ່ລົງເລິກການແລກປ່ຽນ ແລະ ການຮ່ວມມືໃນແຕ່ລະຂົງເຂດ ຈາກມຸມມອງທີ່ກວ້າງກວ່າເກົ່າ, ຂົງເຂດທີ່ກວ້າງຂວາງກວ່າເກົ່າ ແລະ ລະດັບທີ່ເລິກເຊິ່ງກວ່າເກົ່າ. ໜຶ່ງແມ່ນເພີ່ມທະວີຄວາມໄວ້ເນື້ອເຊື່ອໃຈ ແລະ ການຮຽນຮູ້ເຊິ່ງກັນ ແລະ ກັນ, ຮັກສາການແລກປ່ຽນຢ້ຽມຢາມ "ແບບໄປມາຫາສູ່ພີ່ນ້ອງ" ລະຫວ່າງ ຢຸນນານ-ລາວ, ເຮັດໃຫ້ກ້ອນຫີນເສົາຄ້ຳແຫ່ງການຮ່ວມມື ແໜ້ນແກ່ນຍິ່ງຂຶ້ນ. ສອງ ແມ່ນສືບຕໍ່ເລັ່ງລັດການເຊື່ອມໂຍງ-ເຊື່ອມຈອດ, ຜ່ານການຍົກລະດັບແບບປະສານງານຂອງ "ທາງລົດໄຟ + ທາງຫລວງ + ການຂົນສົ່ງທາງນ້ຳ", ເຮັດໃຫ້ໄລຍະຫ່າງລະຫວ່າງເມືອງມິດຕະພາບໃກ້ກັນກວ່າເກົ່າ. ສາມ ແມ່ນຂະຫຍາຍການໄປມາຫາສູ່ດ້ານເສດຖະກິດ-ການຄ້າຢ່າງບໍ່ຢຸດຢັ້ງ, ເພີ່ມທະວີການຮ່ວມມືທີ່ເປັນຮູບປະທຳ ໃນຂົງເຂດອຸດສາຫະກຳທີ່ມີເອກະລັກຂອງຢຸນນານ-ລາວ ແລະ ອື່ນໆ, ຕ່າງຝ່າຍຕ່າງມີຜົນປະໂຫຍດສົດໃສກວ່າເກົ່າ. ສີ່ ແມ່ນ ລົງເລິກການໄປມາຫາສູ່ ແລະ ການປະສົມປະສານເຂົ້າກັນ, ຊຸກຍູ້ການແລກປ່ຽນວັດທະນະທຳໃນຫລາຍຮູບແບບ, ໂດຍສະເພາະແມ່ນສົ່ງເສີມການໄປມາຫາສູ່ລະຫວ່າງໄວໜຸ່ມຂອງເມືອງມິດຕະພາບ, ເຮັດໃຫ້ສາຍໃຍຄວາມຜູກພັນທາງດ້ານອາລົມຈິດ ຂອງຄົນຮຸ່ນໜຸ່ມແໜ້ນແຟ້ນຍິ່ງຂຶ້ນ. ຈັບມືກັນກ້າວໄປຂ້າງໜ້າຢ່າງຫ້າວຫັນເພື່ອມຸ່ງສູ່ວິໄສທັດອັນດີງາມໃນການສ້າງຄູ່ຮ່ວມຊາຕາກຳ ຈີນ-ລາວ ທີ່ມີມາດຕະຖານສູງ, ຄຸນນະພາບສູງ ແລະ ລະດັບສູງ.

ໂດຍ: ນ.ຊຸ່ນ ເຈ່ຍລີ້ ຜູ້ຊ່ວຍນັກຄົ້ນຄວ້າ ສູນຄົ້ນຄວ້າລາວ ສະຖາບັນວິທະຍາສາດສັງຄົມ ແຂວງຢຸນນານ

KPL