ຂປລ.ວິທະຍຸ-ໂທລະພາບ ສູນກາງຈີນ, ເມື່ອບໍ່ດົນມານີ້, ສະ​ມາ​ຄົມ​ຄົ້ນ​ຄວ້າ​ ການ​ປະ​ຕິ​ຮູບ​ ແລະ ພັດ​ທະ​ນາ ​ວິ​ສາ​ຫະ​ກິດ​ຈີນ ​ໄດ້​ເຜີຍ​ແຜ່​ “ບົດ​ລາຍ​ງານ​ ການຫັນ​ປ່ຽນ ​​ພະ​ລັງ​ງານ​ ຂອງ​ໂລກ 2025” ສະ​ແດງ​ໃຫ້​ເຫັນ​ວ່າ ຈີນ​ ໄດ້​ສຳ​ເລັດ ການສ້າງ​​ໂຕ່ງ​ໂສ້ ​ອຸ​ດ​ສາ​ຫະ​ກຳ ​ພະ​ລັງ​ງານ ​ສະ​ອາດ ​ຄົບ​ຖ້ວນ​ທີ່​ສຸດ​ ໃນ​ໂລກ​ແລ້ວ. ສຳລັບ ປີ 2024,ສປ ຈີນ ​ໄດ້​ລົງ​ທຶນ​ເຂົ້າ​ໃນ​ການ​ຫັນ​ປ່ຽນ​ພະ​ລັງ​ງານ ​ເຖິງ 818 ຕື້​ໂດ​ລາສະຫະລັດ, ເຊິ່ງ​ຫ]າຍກວ່າ​ ມູ​ນ​ຄ່າ ​ການ​ລົງ​ທຶນ​​ ທັງ​ໝົດ​ຂອງ ສ.​ອາ​ເມ​ລິ​ກາ, ອັງ​ກິດ ແລະ ສະ​ຫະ​ພາບ ​ເອີ​ຣົບ, ເປັນ​ອັນ​ດັບ​ໜຶ່ງ​ຂອງ​ໂລກ. ຜະ​ລິດ​ຕະ​ພັນ ອຸ​ປະ​ກອນ​​ ຜະ​ລິດ​ໄຟ​ຟ້າ ພະ​ລັງ​ງານ​ລົມ ແລະ ພະ​ລັງ​ງານ ​ແສງ​ຕາ​ເວັນ​ ທີ່​ຜະ​ລິດ​ໂດຍ ສປ ​ຈີນ​ ໄດ້​ຈໍາໜ່າຍ​ຢູ່ 200 ກວ່າ​ປະ​ເທດ, ​ໂດຍໄດ້​ສະ​ໜອງ​ ອຸ​ປະ​ກ​ອ​ນ ຜະ​ລິດ​ໄຟ​ຟ້າ​ພະ​ລັງ​ງານ​ລົມ 70% ແລະ ​ການ​ຜະ​ລິດ​ໄຟ​ຟ້າ ພະ​ລັງ​ງານ​ ແສງ​ຕາ​ເວັນ 80% ໃຫ້​ແກ່​ທົ່ວ​ໂລກ, ​ເຮັດ​ໃຫ້​ຕົ້ນ​ທຶນ​ ການ​ຜະ​ລິດ​ໄຟ​ຟ້າ ພະ​ລັງ​ງານ​ລົມ ໄດ້​ຫລຸດ​ລົງ 60% ແລະ ​ຕົ້ນ​ທຶ​ນ ​ການ​ຜະ​ລິດໄຟ​ຟ້າ​ ພະ​ລັງ​ງານ ​ແສງ​ຕາ​ເວັນຫລຸດ​ລົງ 80%. ປີ​ນີ້, ສປ ຈີນ ​ໄດ້​ປະ​ກາດ ກ່ຽວກັບ ​ການປະ​ກອບ​ສ່ວນ ​ຢ່າງເປັນ​ເຈົ້າ​ການ ​ຂອງ​ປະ​ເທດ​ຕົນ​ຮອບ​ໃໝ່ ໂດຍໄດ້​ສະ​ເໜີ​ວ່າ ຮອດ​ປີ 2035, ​ອັດ​ຕາ​ສ່ວນການ​ບໍ​ລິ​ໂພກ​ ພະ​ລັງ​ງານ ທີ່​ບໍ່​ເປັນ​ເຊື້ອ​ໄຟ ​ຟອສຊິວ​ ໃນ​ການ​ບໍ​ລິ​ໂພກ​ ພະ​ລັງ​ງານ​ທັງ​ໝົດ​ຂອງ ສປ ​ຈີນ ​ຈະ​ຫລາຍກວ່າ 30%, ຍອດ​ປະ​ລິ​ມານ ​ກຳ​ລັງ​ຕິດ​ຕັ້ງ​ໄຟ​ຟ້າ ພະ​ລັງ​ລົມ ແລະ ພະ​ລັງ​ແສງ​ຕາ​ເວັນ ​ຈະ​ຫລາຍກວ່າ 6 ເທົ່າ​ຂອງ​ປີ 2020, ເຊິ່ງ​ຈະ​ສືບ​ຕໍ່ ​ສ້າງ​ແຮງ​ຂັບ​ເຄື່ອນ​ ໃຫ້​ແກ່​ການ​ຫລຸດຜ່ອນ​ ການ​ລະ​ບາຍອາຍ​ພິດ​ເຮືອນ​ແກ້ວ ​ຂອງ​ທົ່ວ​ໂລກ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL