ຂປລ
ຂປລ. ປະຊາຊົນບ້ານນາຫາດ ເມືອງຄຳເກີດ ແຂວງບໍລິຄຳໄຊ ມີຄວາມພາກພູມໃຈ ແລະ ຄາດຫວັງວ່າ ຊີວິດການເປັນຢູ່ຈະມີການປ່ຽນແປງ ແລະ ສາມາດຫລຸດພົ້ນອອກຈາກ ຄວາມທຸກຍາກແນ່ນອນ ຫລັງມີໂຄງການໄຟຟ້າພະລັງງານລົມ ເຈື່ອງເຊີນ ໄດ້ຍື້ມືເຂົ້າມາຊ່ວຍເຫລືອ ທາງດ້ານເຕັກນິກການປູກ-ການລ້ຽງ.
ຂປລ. ປະຊາຊົນບ້ານນາຫາດ ເມືອງຄຳເກີດ ແຂວງບໍລິຄຳໄຊ ມີຄວາມພາກພູມໃຈ ແລະ ຄາດຫວັງວ່າ ຊີວິດການເປັນຢູ່ຈະມີການປ່ຽນແປງ ແລະ ສາມາດຫລຸດພົ້ນອອກຈາກ ຄວາມທຸກຍາກແນ່ນອນ ຫລັງມີໂຄງການໄຟຟ້າພະລັງງານລົມ ເຈື່ອງເຊີນ ໄດ້ຍື້ມືເຂົ້າມາຊ່ວຍເຫລືອ ທາງດ້ານເຕັກນິກການປູກ-ການລ້ຽງ. ຂະນະທີ່ຄາດວ່າຜົນຜະລິດປີນີ້, ຈະເພີ່ມຂຶ້ນຫລາຍກວ່າໃນແຕ່ລະປີ ຜ່ານມາທີ່ປູກແບບປະຖົມປະຖານ.
ຕາມການໃຫ້ຮູ້ຂອງ ທ່ານ ຄານ ພຸດສະດີ ປະຊາຊົນບ້ານນາຫາດ ເມືອງຄຳເກີດ ຕໍ່ທີມຂ່າວໜັງສືພິມປະເທດລາວວ່າ: ຫລາຍປີຜ່ານມາການຜະລິດເຂົ້າ, ມັນຕົ້ນຂອງຄອບຄົວຕົນ ແມ່ນໄດ້ຜົນຜະລິດກໍບໍ່ໄດ້ຫລາຍ ໂດຍສະເພາະ ອັນພົ້ນເດັ່ນແມ່ນມັນຕົ້ນ ຊຶ່ງປີຜ່ານມາປູກໃນເນື້ອທີ່ປະມານ 0,6 ເຮັກຕາ ໂດຍປູກ ແບບທຳມະຊາດໄດ້ຜົນຜະລິດ 3 ໂຕນ (ມັນຕົ້ນແຫ້ງ). ຂະນະທີ່ມາໃນປີນີ້, ຫລັງມີໂຄງການໄຟຟ້າພະລັງງານລົມ ເຈື່ອງເຊີນ ໄດ້ເຂົ້າມາຊ່ວຍເຫລືອຫລາຍດ້ານໃນການປູກມັນຕົ້ນ. ໃນນັ້ນ, ດ້ານເຕັກນິກ ກໍມີວິຊາການລົງມາຊ່ວຍທຸກຂັ້ນຕອນ ນັບແຕ່ມື້ປູກ ແລະ ຊ່ວຍເຫລືອຝຸ່ນ, ປຸ໋ຍ ແມ່ນວິຊາການຂອງໂຄງການ ໄດ້ມາແນະນຳ ທັງນຳພາປະຕິບັດຕົວຈິງ ແລະ ກໍໄດ້ລົງມາຕິດຕາມມື້ລະສອງ-ສາມຄົນ. ຜ່ານການລົງມາແນະນຳ, ນຳພາເຮັດຕົວຈິງ ກໍສັງເກດເຫັນວ່າມັນຕົ້ນ ກໍຂຽວງາມກວ່າປີຜ່ານມາທີ່ປູກແບບທຳມະຊາດ. ແນວໃດກໍດີ, ຄາດວ່າ ຜົນຜະລິດຈະໄດ້ເພີ່ມຂຶ້ນຈາກ 3 ໂຕນ (ມັນແຫ້ງ) ມາເປັນ 5-6 ໂຕນ (ມັນແຫ້ງ) ໃນເນື້ອທີ່ ຫລື ພື້ນທີ່ດຽວກັນທີ່ເຮັດໃນປີຜ່ານມາ.
ຫລັງພວກເຮົາລົມກັນ ແລະ ຮູ້ທີ່ໄປທີ່ມາໃນການຊ່ວຍເຫລືອ ຈາກໂຄງການໄຟຟ້າພະລັງງານລົມເຈື່ອງເຊີນແລ້ວ, ຄານ ພຸດສະດີ ເຈົ້າຂອງສວນມັນຕົ້ນ ກໍພາທີມງານໂຄງການ, ທີມງານຫ້ອງການກະສິກຳ ແລະ ປ່າໄມ້ ເມືອງຄຳເກີດ ແລະ ທີມນັກຂ່າວພວກເຮົາໄປເບິ່ງສວນມັນຕົ້ນຂອງເພິ່ນ. ເມື່ອພວກເຮົາໄປຮອດສວນ ກໍເຫັນຕົ້ນມັນ ແຕ່ລະຕົ້ນ ງອກງາມຂຽວງາມອຸ່ນທຸ່ນ, ຫົວມັນກໍໃຫຍ່ດັ່ງທີ່ເວົ້າມາຂັ້ນເທິງນັ້ນແທ້. ຂະນະທີ່ ຜູ້ຂຽນເອງ ກໍມີຄວາມພາກພູມໃຈໄປພ້ອມໆກັບເຈົ້າຂອງສວນມັນຕົ້ນ ສວນນີ້.
ຄວາມພາກພູມໃຈດັ່ງກ່າວ, ຜູ້ຂຽນກໍຖາມເຖິງລາຍຮັບທີ່ຈະໄດ້ຮັບເຂົ້າຄອບຄົວລາວ ອີກບໍ່ພໍເທົ່າໃດເດືອນຂ້າງໜ້ານີ້ ໂດຍສະເພາະ ຫລັງເກັບກູ້ຂາຍອອກໝົດຈະສ້າງລາຍຮັບເທົ່າໃດ ? ຮອຍຍິ້ມທີ່ຍິ້ມໜ້ອຍ ຍິ້ມໃຫຍ່ທີ່ສະແດງເຖິງຄວາມພາກພູມ ແລະ ລາວຕອບວ່າ: ສຳລັບລາຍຮັບຈາກການຂາຍມັນຕົ້ນປີຜ່ານມາ ຍ້ອນລາຄາຕ່ຳ ຈຶ່ງໄດ້ສ້າງລາຍຮັບ ບໍ່ພໍເທົ່າໃດລ້ານກີບ. ສຳລັບປີນີ້, ຖ້າລາຄາສູງຄືປີກ່ອນໆນັ້ນ, ກໍຕັ້ງຄວາມຫວັງຢູ່ທີ່ 20 ລ້ານກີບ ໃນເນື້ອທີ່ 0,6 ເຮັກຕາ ທີ່ທາງໂຄງການໄດ້ໃຫ້ການຊ່ວຍເຫລືອນີ້.
ໂຄງການໄຟຟ້າພະລັງງານລົມ ເຈື່ອງເຊີນ ແມ່ນອີກໂຄງການໜຶ່ງ ທີ່ໄດ້ໃຫ້ການຊ່ວຍເຫລືອ ເພື່ອພັດທະນາຊີວິດການເປັນຢູ່ຂອງປະຊາຊົນຢູ່ເຂດໂຄງການໄຟຟ້າພະລັງງານລົມ ເຈື່ອງເຊີນ ໂດຍສະເພາະຍົກສູງສະມັດຕະພາບການຜະລິດ ແລະ ຄຸນນະພາບ, ເພີ່ມລາຍຮັບ ແລະ ປັບປຸງຊີວິດການເປັນຢູ່ຂອງປະຊາຊົນ ໃນເຂດໂຄງການໄຟຟ້າພະລັງງານລົມເຈື່ອງເຊີນ.
ໂດຍ: ຢ່າຕົ່ງ
KPL
