ຂປລ
ຂປລ. ກຳມາທິການເຜີຍແຜ່ສິລະທຳ ແລະ ປະຕິບັດກຳມະຖານສູນກາງ ຈັດກອງປະຊຸມ ເພື່ອຊຸກຍູ້ວຽກງານເຜີຍແຜ່ພຸດທະສາສະໜາ ໃຫ້ແກ່ອົງການພຸດທະສາສະໜາສຳພັນລາວ (ອພສ) ເມືອງນາຊາຍທອງ ຢູ່ວັດປ່ານາຄູນນ້ອຍ ນະຄອນຫລວງວຽງຈັນ
ຂປລ. ກຳມາທິການເຜີຍແຜ່ສິລະທຳ ແລະ ປະຕິບັດກຳມະຖານສູນກາງ ຈັດກອງປະຊຸມ ເພື່ອຊຸກຍູ້ວຽກງານເຜີຍແຜ່ພຸດທະສາສະໜາ ໃຫ້ແກ່ອົງການພຸດທະສາສະໜາສຳພັນລາວ (ອພສ) ເມືອງນາຊາຍທອງ ຢູ່ວັດປ່ານາຄູນນ້ອຍ ນະຄອນຫລວງວຽງຈັນ ໂດຍມີ ພະອາຈານໃຫຍ່ ມະຫາເວດ ມະເສໄນ ຮັກສາການ ປະທານສູນກາງອົງການ ພຸດທະສາສະໜາສຳພັນລາວ ແຫ່ງ ສປປ ລາວ, ມີພະເຖລານຸ ເຖລະ ຈາກວັດແຫ່ງຕ່າງໆ ໃນນະຄອນຫລວງວຽງຈັນ, ມີຮອງປະທານສູນກາງແນວລາວສ້າງຊາດ ແລະ ອອກຕົນຍາດໂຍມ, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນກອງປະຊຸມ ໄດ້ຮັບຟັງການນຳສະເໜີສະພາບລວມ ແລະ ຜົນສຳເລັດ ກອງປະຊຸມໃຫຍ່ຜູ້ແທນພະສົງ ທົ່ວເມືອງນາຊາຍທອງ ຄັ້ງທີ 9, ການນຳສະເໜີກ່ຽວກັບພາລະບົດບາດ, ສິດ ແລະ ໜ້າທີ່ຂອງກຳມາທິການເຜີຍແຜ່ສິລະທຳ ແລະ ປະຕິບັດກຳມະຖານ, ນຳສະເໜີກ່ຽວກັບສິດ ແລະ ໜ້າທີ່ຂອງແນວລາວສ້າງຊາດຂັ້ນບ້ານ, ວຽກງານຊົນເຜົ່າ, ພາລະບົດບາດພາຍໃນ ແລະ ອື່ນໆ.
ການຈັດກອງປະຊຸມໃນຄັ້ງນີ້, ແນໃສ່ເຮັດໃຫ້ທຸກຄົນໃນສັງຄົມ ໄດ້ຮັບຮູ້ ແລະ ເຂົ້າໃຈຕໍ່ກັບວຽກງານສາສະໜາ ໂດຍສະເພາະ ພຸດທະສາສະນິກະຊົນ ລາວບັນດາເຜົ່າ ໄດ້ມີສ່ວນຮ່ວມ ແລະ ເປັນເອກະພາບກັນ ໃນການຈັດຕັ້ງປະຕິບັດວຽກງານສົ່ງເສີມສາສະໜາ ໃນຊຸມຊົນໄດ້ຢ່າງມີປະສິດທິຜົນ, ສ້າງບັນດາແນວຄິດໃໝ່ໆ ແລະ ຄວາມຮ່ວມມືທີ່ເຂັ້ມແຂງ ຕໍ່ການຂັບເຄື່ອນວຽກງານທາງສາສະໜາ ໃຫ້ໄດ້ຮັບການພັດທະນາ, ພ້ອມທັງ ນຳພາປະຊາຊົນ ພາຍໃນບ້ານ ປະຕິບັດກິດຈະກຳ, ພິທີກຳ, ງານບຸນທາງສາສະໜາ ເພື່ອເປັນການອະນຸລັກ ຮັກສາຮີດຄອງປະເພນີ ແລະ ວັດທະນະທຳ ອັນດີງາມຂອງຊາດ, ຂອງເຜົ່າ ທີ່ເຄີຍສືບທອດປະຕິບັດ ກັນມາແຕ່ບູຮານນະການ.
ຂ່າວ: ທະນູທອງ
KPL