ຂປລ. ປັດຈຸບັນ, ລັດຖະບານ ກໍ​ຄື ກະຊວງ​ກະສິກຳ ​ແລະ ປ່າ​ໄມ້ ​ໄດ້ຈັດຕັ້ງປະຕິບັດ ວຽກງານຊຸກຍູ້ສົ່ງເສີມການຜະລິດກະສິກຳເປັນສີນຄ້າ ເພື່ອຫັນປ່ຽນສັງຄົມບໍລິການ ໄປສູ່ສັງຄົມການຜະລິດ ໄດ້ຈັດຕັ້ງຜັນຂະຫຍາຍ 2 ນະໂຍບາຍແຫ່ງຊາດ ຄື: ນະໂຍບາຍວ່າດ້ວຍ ການສົ່ງເສີມ ການລ້ຽງສັດ ແລະ ສັດນໍ້າ ແລະ ນະໂຍບາຍວ່າດ້ວຍການສົ່ງເສີມການປູກພືດ ໂດຍການປະສານສົມທົບກັບ ຂະແໜງການກ່ຽວຂ້ອງທັງສູນກາງ ແລະ ທ້ອງຖິ່ນ ກຳນົດເປັນແຜນງານ, ໂຄງການ, ມາຕະການ ແລະ ຈຸດສຸມລະ ອຽດ.

ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ປ່າ​ໄມ້ ​ໄດ້​ໃຫ້​ຮູ້​ໃນ​ໂອກາດຊີ້ແຈງຄຳຊັກຖາມຂອງສະພາແຫ່ງຊາດ ແລະ ສະມາຊິກສະພາແຫ່ງຊາດ ​ໃນຕອນບ່າຍວັນທີ 10 ມິຖຸນາ 2025 ກ່ຽວກັບການຈັດຕັ້ງປະຕິບັດວຽກງານ ຊຸກຍູ້ສົ່ງເສີມການຜະລິດກະສິກຳເປັນສິນຄ້າ ເພື່ອຫັນປ່ຽນສັງຄົມບໍລິການ ໄປສູ່ສັງຄົມການຜະລິດ ວ່າ: ​ໂດຍ​ຈັດ​ຕັ້ງ​ຜັນ​ຂະຫຍາຍ 2 ນະ​ໂຍບາຍ​ດັ່ງກ່າວ ​ເຊິ່ງການຜະລິດລະດູແລ້ງຜ່ານມາ ສາມາດປູກພຶດສິນຄ້າໄດ້ 37.600 ກວ່າເຮັກຕາ, ລື່ນແຜນການ 18%. ສຳລັບ ສິນຄ້າກະສິກຳ ທີ່ໄດ້ສຳເລັດການເຈລະຕາເປີດຕະຫລາດ ກັບປະເທດຄູ່ຄ້າ ໂດຍສະເພາະ ສປ ຈີນ, ສສ ຫວຽດນາມ ແລະ ໄທ ປັດຈຸບັນ, ມີທັງໝົດ 74 ລາຍການເຈລະຈາ; ຈັດພິທີສົ່ງອອກໝາກມ່ວງ ໄປ ສປ ຈີນ ໃນ​ເດືອນພຶດສະພາ 2025 ຜ່ານມາ 90 ໂຕນ ແລະ ຄາດວ່າໃນປີ 2025 ຈະສົ່ງອອກໝາກມ່ວງໄປຈີນ ປະມານ 1.500 ໂຕນ      ແລະ ປີ 2026 ຈະສົ່ງອອກ 15.000 ໂຕນ; ກະກຽມສົ່ງອອກເຂົ້າໄປບຣູໄນ ເຊິ່ງຢູ່ໃນຂັ້ນຕອນສົ່ງອອກທົດລອງ. ນອກຈາກນີ້, ຍັງມີກາເຟ ແລະ ໝາກໄມ້ອົບແຫ່ງ ຈຳນວນໜຶ່ງ; ໄດ້ຊຸກຍູ້ການສ້າງຕັ້ງໂຮງງານຂ້າສັດທັນສະໄໝ ຢູ່ເມືອງຫາດຊາຍຟອງ, ປັດຈຸບັນ ສຳເລັດການກໍ່ສ້າງພື້ນຖານ ໂຄງລ່າງຂອງໂຮງງານ ແລະ ກໍາລັງດໍາເນີນການນຳເຂົ້າເຄື່ອງຈັກ, ຖ້າໂຮງງານໄດ້ເປີດນຳໃຊ້ ຈະສາມາດຂ້າສັດ (ງົວ-ຄວາຍ) ເພື່ອປຸງແຕ່ງເປັນຊີ້ນແຊ່ແຂງ ໄດ້ 300.000 ກວ່າໂຕ/ປີ; ໄດ້ຊຸກຍູ້ສົ່ງເສີມການສ້າງຕັ້ງ ໂຮງງານແປຮູບປາສະຫວາຍ ຢູ່ແຂວງຈຳປາສັກ ສົ່ງໄປຈີນ ເຊິ່ງໄດ້ສົ່ງອອກແລ້ວ  400 ກວ່າໂຕນ ແລະ ຈະສາມາດສົ່ງອອກໄດ້ປະມານ 6.000 ໂຕນ/ປີ ໃນປີ 2025 ແລະ 20.000 ໂຕນ ນັບແຕ່ປີ 2026.

ທ່ານ ລິນຄຳ ດວງສະຫວັນ ຍັງ​ໃຫ້​ຮູ້​ອີກ​ວ່າ: ເພື່ອສືບຕໍ່ຊຸກຍູ້ສົ່ງເສີມ ການທີ່ຜະລິດສິນຄ້າກະສິກໍາ ຢູ່ພາຍໃນໃຫ້ມີຄວາມເຂັ້ມແຂງ ທັງເປັນການສ້າງລາຍຮັບເຂົ້າງົບປະມານ ຄຽງຄູ່ກັບການຈັດຕັ້ງປະຕິບັດ ຕາມມະຕິ 04/ກມສພ ແລະ ມະຕິ 05/ລບ ໃນການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ຈະຕ້ອງໄດ້ປະສານສົມທົບ ກັບພາກສ່ວນກ່ຽວຂ້ອງ ຄົ້ນຄວ້າອອກມາດຕະການ ເກັບພາສີນຳເຂົ້າສິນຄ້າກະສິກຳທີ່ຜະລິດໄດ້ພາຍໃນ ຄື: ອາຫານສັດສຳເລັດຮູບ,ຝຸ່ນອິນຊີ, ເຂົ້າ, ສັດມີຊີວິດ ແລະ ຊິ້ນສ່ວນສັດ,  ໄຂ່ໄກ່,  ປານໍ້າຈືດ ແລະ ຜະລິດຕະພັນ ປານ້ຳຈືດທຸກຊະນິດ ແລະ 2 ພືດຜັກ ທີ່ພວກເຮົາສາມາດກຸ້ມຕົນເອງໄດ້ ຕາມລະບຽບການ; ສືບຕໍ່ຄົ້ນຄວ້າ, ສ້າງເງື່ອນໄຂໃຫ້ຊາວກະສິກອນ, ກຸ່ມຜະລິດ, ສະຫະກອນທີ່ບໍ່ມີຫລັກຊັບສາມາດເຂົ້າເຖິງ ດອກເບ້ຍສິນເຊື່ອທີ່ເໝາະສົມໄດ້ (ບໍລິສັດຄໍ້າປະກັນສິນເຊື່ອໃຫ້ກະສິກອນ); ລັດຖະບານ ແລະ ພາກສ່ວນກ່ຽວຂ້ອງ ເລັ່ງຜັກດັນປະເທດຄູ່ຄ້າ ໂດຍສະເພາະ ສປ ຈີນ ໃນການອະນຸມັດລາຍການສິນຄ້າກະສິກໍາ ທີ່ພວກເຮົາຜະລິດໄດ້ ແລະ ພ້ອມທີ່ຈະສົ່ງອອກ ເປັນຕົ້ນຢາງພາລາ ແລະ ຊີ້ນງົວແຊ່ແຂງ.

ຂ່າວ: ກິດຕາ

KPL