ຂປລ
ມາຮອດປັດຈຸບັນ ຫລາຍທ້ອງຖິ່ນແມ່ນໄດ້ກະກຽມຄວາມພ້ອມຫລາຍດ້ານໃນການສຳຫລວດພົນລະເມືອງ ແລະ ທີ່ຢູ່ອາໄສຄັ້ງທີ V ປີ 2025 ນີ້.
*ມາຮອດປັດຈຸບັນ ຫລາຍທ້ອງຖິ່ນແມ່ນໄດ້ກະກຽມຄວາມພ້ອມຫລາຍດ້ານໃນການສຳຫລວດພົນລະເມືອງ ແລະ ທີ່ຢູ່ອາໄສຄັ້ງທີ V ປີ 2025 ນີ້. ດັ່ງແຂວງວຽງຈັນເມ່ືອທ້າຍເດືອນເມສາຜ່ານມາ, ນັກເດີນສຳຫລວດຂອງພະແນກແຜນການ ແລະ ການລົງທຶນ ໄດ້ລົງແນະນໍາການເກັບກຳຂໍ້ມູນຂ່າວສານພູມສາດ (GIS) ສໍາລັບການສໍາຫລວດພົນລະເມືອງ, ທີ່ຢູ່ອາໄສ ແລະ ມອບອຸປະກອນ (ແທບເລັດ)ໃຫ້ແກ່ນັກເດີນສຳຫລວດຂັ້ນເມືອງ ເພື່ອຮັບໃຊ້ເຂົ້າໃນການກະກຽມສໍາຫລວດພົນລະເມືອງ ແລະ ທ່ີຢູ່ອາໃສຄ້ັງທີ V ປີ 2025 ໂດຍໃຫ້ກຽດເຂົ້າຮ່ວມຂອງທ່ານ ອຳໄພ ໂສລັດຕະນະວົງ ເລຂາພັກເມືອງເຈົ້າເມືອງກາສີ, ທ່ານ ຄຳຮຸ່ງ ຫົວໜ້າສູນສະຖິຕິເມືອງກາສີ, ພ້ອມດ້ວຍນັກເດີນສໍາຫລວດ, ນັກກວດກາຂັ້ນແຂວງ-ຂັ້ນເມືອງ ເຂົ້າຮ່ວມ.
ການລົງມາຄ້ັງນ້ີ, ນັກເດີນສຳຫລວດຂັ້ນແຂວງໄດ້ແນະນໍາການ ຂ້ຶນບັນຊີ ແລະ ເກັບກຳຂ້ໍມູນຈຸດທ່ີ່ຕັ້ງຂອງອາຄານ, ໂຄງສ້າງຢູ່ບ້ານ ເທສະບານເມືອງ (ເພື່ອກະກຽມໃຫ້ແກ່ການສໍາຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ V ປີ 2025) ພ້ອມທັງເຮັດທົດລອງເພື່ອເຮັດໃຫ້ວຽກງານດັ່ງກ່າວ ໄດ້ຮັບຄວາມຮັບປະກັນທາງດ້ານຄວາມຖືກຕ້ອງ, ຄົບຖ້ວນຊັດເຈນ ແລະ ສຳເລັດຕາມລະດັບຄາດໝາຍທີ່ກຳນົດໄວ້. ສຳລັບການສໍາຫລວດດັ່ງກ່າວໄດ້ສະໜອງຂໍ້ມູນທີ່ເປັນປະໂຫຍດຫລາຍໃຫ້ແກ່ລັດຖະບານໃນການຕັດສິນໃຈ ແລະ ການສ້າງແຜນພັດທະນາເສດຖະກິດ-ສັງຄົມ ເພາະການສໍາຫລວດຄັ້ງທີ V ຈະໄດ້ສະໜອງຂໍ້ມູນທາງດ້ານພູມມີສາດ ແລະ ຂໍ້ມູນດ້ານສັງຄົມທີ່ມີຄວາມໜ້າເຊື່ອຖື ແລະ ທັນເວລາສໍາລັບການຕິດຕາມ ແລະ ທົບທວນນະໂຍບາຍຕ່າງໆລວມທັງນັກວາງແຜນ ແລະ ນັກຄົ້ນຄວ້າເປັນຕົ້ນແມ່ນການຄົ້ນຄວ້າ ແລະ ການວາງນະໂຍບາຍດ້ານປະຊາກອນ.
ໂດຍ:ຢ່າຕົ່ງ
ແຫລ່ງຂ່າວຈາກ: ຖວທ ເມືອງກາສີ
KPL
