ຂປລ
ພິທີເລີ່ມການເຄື່ອນໄຫວ ລາດຕະເວນ ບັງຄັບໃຊ້ກົດໝາຍ ຮ່ວມຕາມລໍາແມ່ນໍ້າຂອງ ສປຈີນ- ສປປ ລາວ-ມຽນມາ-ໄທ ຄັ້ງທີ 170 ໄດ້ຈັດຂຶ້ນ ຢູ່ທ່າເຮືອຈິງຮ່າ ກິ່ງແຂວງປົກຄອງຕົນເອງ ເຜົ່າລື້ສິບສອງພັ່ນນາ ແຂວງຢຸນນານຂອງ ສປ ຈີນ ໂດຍມີ ເຈົ້າໜ້າທີ່ບັງຄັບໃຊ້ກົດໝາຍ 100 ກວ່າຄົນ ຈາກພາກສ່ວນບັງຄັບ ໃຊ້ກົດໝາຍຂອງ ສປ ຈີນ, ສປປ ລາວ, ມຽນມາ ແລະ ໄທ ເຂົ້າຮ່ວມ.
ຂປລ.ວິທະຍຸ ໂທລະພາບ ສູນກາງຈີນ,ວັນທີ 19 ຕຸລານີ້, ພິທີເລີ່ມການເຄື່ອນໄຫວ ລາດຕະເວນ ບັງຄັບໃຊ້ກົດໝາຍ ຮ່ວມຕາມລໍາແມ່ນໍ້າຂອງ ສປຈີນ- ສປປ ລາວ-ມຽນມາ-ໄທ ຄັ້ງທີ 170 ໄດ້ຈັດຂຶ້ນ ຢູ່ທ່າເຮືອຈິງຮ່າ ກິ່ງແຂວງປົກຄອງຕົນເອງ ເຜົ່າລື້ສິບສອງພັ່ນນາ ແຂວງຢຸນນານຂອງ ສປ ຈີນ ໂດຍມີ ເຈົ້າໜ້າທີ່ບັງຄັບໃຊ້ກົດໝາຍ 100 ກວ່າຄົນ ຈາກພາກສ່ວນບັງຄັບ ໃຊ້ກົດໝາຍຂອງ ສປ ຈີນ, ສປປ ລາວ, ມຽນມາ ແລະ ໄທ ເຂົ້າຮ່ວມ. ເຮືອບັງຄັບໃຊ້ກົດໝາຍຂອງ ສປ ຈີນ ອອກເດີນທາງ ຈາກທ່າເຮືອຈິງຮ່າ ແລະ ມຸ່ງໄປສູ່ເຂດນໍ້າທີ່ກໍານົດໄວ້ ແລະ ບັນຈົບກັບເຮືອບັງຄັບໃຊ້ກົດໝາຍຂອງ ສປປ ລາວ ແລະ ມຽນມາ ແລ້ວຈັດຕັ້ງ ເປັນກອງລາດຕະເວນຮ່ວມ ເພື່ອດໍາເນີນ ການລາດຕະເວນຮ່ວມຕະຫລອດເສັ້ນທາງ. ການເຄື່ອນໄຫວຄັ້ງນີ້ຕັ້ງສູນບັນຊາການຢູ່ເຮືອ 53107 ຂອງ ສປ ຈີນ ໂດຍມີຜູ້ບັນຊາການຂອງ 4 ປະເທດ ຄື ຈີນ, ລາວ, ມຽນມາ ແລະ ໄທ ນໍາພາຄະນະຜູ້ແທນ ຮ່ວມກັນບັນຊາການປະຕິບັດງານ. ໃນໄລຍະການເຄືອນໄຫວຄັ້ງນີ້, ພາກສ່ວນບັງຄັບໃຊ້ກົດໝາຍຂອງ 4 ປະເທດ ຈະເດີນທາງໄປ ສປປ ລາວ ເພື່ອຈັດກອງປະຊຸມແລກປ່ຽນຂໍ້ມູນຂ່າວສານຫລາຍຝ່າຍ, ທຸກຝ່າຍ ຈະແລກປ່ຽນ ສະພາບການປ້ອງກັນຄວາມສະຫງົບ ຕາມເຂດລ້ອງແມ່ນ້ຳຂອງ, ວິເຄາະ ແລະ ຄົ້ນຄວ້າທ່າອຽງໃໝ່ ຂອງອາຊະຍາກໍາຂ້າມຊາຍແດນ, ປຶກສາຫາລື ມາດຕະການບໍລິຫານຮ່ວມຢ່າງລະອຽດກ່ຽວກັບ ການຊົມໃຊ້ ຂໍ້ມູນຂ່າວສານຮ່ວມກັນ, ການປະສານງານ ດ້ານການດໍາເນີນຄະດີ, ການປ້ອງກັນ-ຄວບຄຸມຮ່ວມ ແລະ ອື່ນໆ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
