ຂປລ
ຂປລ. ພິທີລົງນາມໃນບົດບັນທຶກຄວາມເຂົ້າໃຈ (MOU) ວ່າດ້ວຍໂຄງການນໍ້າດື່ມບ້ານຫ້ວຍເຮ້ຍ ເມືອງຊຽງເງິນ ແຂວງຫລວງພະບາງ, ມູນຄ່າ 50.000 ໂດລາ ໂດຍໄດ້ຮັບການສະໜັບ ສະໜູນທຶນຈາກ ລັດຖະບານ ອິນເດຍ ພາຍໃຕ້ໂຄງການເຫັນຜົນໄວ ຂອງຂອບການຮ່ວມມື ແມ່ນໍ້າຂອງ-ແມ່ນໍ້າຄົງຄາ ຈັດຂຶ້ນໃນວັນທີ 28 ມີນາ 2025 ຜ່ານມາ
ຂປລ. ພິທີລົງນາມໃນບົດບັນທຶກຄວາມເຂົ້າໃຈ (MOU) ວ່າດ້ວຍໂຄງການນໍ້າດື່ມບ້ານຫ້ວຍເຮ້ຍ ເມືອງຊຽງເງິນ ແຂວງຫລວງພະບາງ, ມູນຄ່າ 50.000 ໂດລາ ໂດຍໄດ້ຮັບການສະໜັບ ສະໜູນທຶນຈາກ ລັດຖະບານ ອິນເດຍ ພາຍໃຕ້ໂຄງການເຫັນຜົນໄວ ຂອງຂອບການຮ່ວມມື ແມ່ນໍ້າຂອງ-ແມ່ນໍ້າຄົງຄາ ຈັດຂຶ້ນໃນວັນທີ 28 ມີນາ 2025 ຜ່ານມາ ຢູ່ກະຊວງການຕ່າງປະເທດ ສປປ ລາວ ໂດຍການຮ່ວມລົງນາມບົດບັນທຶກຄວາມເຂົ້າໃຈຂອງ ທ່ານ ຫຸມພັນ ຈີລະສັກ ຮອງຫົວໜ້າພະແນກສາທາລະນະສຸກ ແຂວງຫລວງພະບາງ ແລະ ທ່ານ ໂຢເກສະວາ ສັງວານ (Yogeshwar Sangwan) ເອກອັກຄະລັດຖະທູດ ແຫ່ງ ສາທາລະນະລັດ ອິນເດຍ ປະຈໍາ ສປປ ລາວ, ມີທ່ານ ບໍວອນທັດ ດວງຈັກ ຫົວໜ້າຫ້ອງການກະຊວງການຕ່າງປະເທດ ແຫ່ງ ສປປ ລາວ, ມີພະນັກງານຈາກສະຖານທູດ ອິນເດຍ ແລະ ຜູ້ຕາງໜ້າຈາກພາກສ່ວນກ່ຽວຂ້ອງຂອງສູນກາງ ແລະ ທ້ອງຖິ່ນ ຂອງ ສປປ ລາວ ເຂົ້າຮ່ວມເປັນສັກຂີພິຍານ.
ໂອກາດນີ້, ທ່ານ ອິນທະສອນ ທິຣະກຸນ ຮອງຫົວໜ້າກົມເສດຖະກິດ ກະຊວງການຕ່າງ ປະເທດ ໄດ້ຕາງໜ້າໃຫ້ແກ່ຝ່າຍລາວ ສະແດງຄວາມຂອບໃຈ ແລະ ຊົມເຊີຍຕໍ່ ລັດຖະບານ ອິນເດຍ ທີ່ໄດ້ໃຫ້ຄວາມສໍາຄັນຕໍ່ການຮ່ວມມື ລະຫວ່າງ ສປປ ລາວ ແລະ ອິນເດຍ ທັງໃນຂອບການຮ່ວມມືສອງຝ່າຍ ແລະ ຫລາຍຝ່າຍ ໂດຍສະເພາະ ແມ່ນການປະກອບ ສ່ວນເຂົ້າໃນ ການພັດທະນາ ເສດຖະກິດ-ສັງຄົມ ຂອງ ສປປ ລາວ ແລະ ຍົກສູງຄຸນນະພາບຊີວິດ ການເປັນຢູ່ຂອງປະຊາຊົນ ໃນຂັ້ນທ້ອງຖິ່ນໃຫ້ນັບມື້ນັບດີຂຶ້ນ. ສາທາລະນະລັດ ອິນເດຍ ໃນນາມ ຄູ່ຮ່ວມພັດທະນາ ຂອບການຮ່ວມມືແມ່ນໍ້າຂອງ-ແມ່ນໍ້າຄົງຄາ ໄດ້ປະກາດສ້າງຕັ້ງໂຄງການເຫັນຜົນໄວ ໃນປີ 2012 ໂດຍການສະໜັບສະໜູນງົບປະມານ ຈໍານວນ 1 ລ້ານໂດລາ ສະຫະລັດຕໍ່ປີ ໃຫ້ແກ່ປະເທດສະມາຊິກແມ່ນ້ຳຂອງ ເພື່ອຈັດຕັ້ງປະຕິບັດໂຄງການຂະໜາດນ້ອຍ, ມູນຄ່າບໍ່ເກີນ 50.000 ໂດລາສະຫະລັດ ຕໍ່ 1 ໂຄງການ.
ນັບຕັ້ງແຕ່ສ້າງຕັ້ງໂຄງການເຫັນຜົນໄວ, ສປປ ລາວ ໄດ້ຮັບອະນຸມັດໂຄງການທັງໝົດ ຈໍານວນ 31 ໂຄງ ການ, ລວມມູນຄ່າ 1.515.842 ໂດລາສະຫະລັດ. ໃນນັ້ນ, ມີ 15 ໂຄງການ ໄດ້ສຳເລັດຈັດຕັ້ງປະຕິບັດ ແລະ 16 ໂຄງການ ແມ່ນກຳລັງສືບຕໍ່ດຳເນີນການຈັດຕັ້ງປະຕິບັດ.
ຂ່າວ: ກົມເສດຖະກິດ, ກຕທ
KPL
