ຂປລ
ຂປລ. ສປປ ລາວ ໄດ້ຮ່ວມກັບບັນດາປະເທດສະມາຊິກອາຊຽນ ສະເຫລີມສະຫລອງວັນສັງຄົມສົງເຄາະອາຊຽນ (15 ມີນາ) ເພື່ອຍົກສູງບົດບາດອັນສໍາຄັນ ຂອງນັກສັງຄົມສົງເຄາະ ແລະ ບຸກຄະລາກອນສັງຄົມສົງເຄາະ ໃນການຫລຸດຜ່ອນຄວາມສ່ຽງ ຈາກໄພພິບັດ ແລະ ການສ້າງຄວາມທົນທານຕໍ່ ການປ່ຽນແປງສະພາບ ດິນຟ້າອາກາດ ໃນວັນທີ 25 ມີນາ 2025 ທີ່ນະຄອນຫລວງວຽງຈັນ ໂດຍມີພະນັກງານຈາກພາກລັດ, ສະຖາບັນການສຶກສາ, ຄູ່ຮ່ວມພັດທະນາ ແລະ ນັກສຶກສາທີ່ໜຸ່ມນ້ອຍ ຈາກພາກວິຊາສັງຄົມສົງເຄາະ ແລະ ການພັດທະນາ ຄະນະວິທະຍາສາດສັງຄົມ ເຂົ້າຮ່ວມ.
ຂປລ. ສປປ ລາວ ໄດ້ຮ່ວມກັບບັນດາປະເທດສະມາຊິກອາຊຽນ ສະເຫລີມສະຫລອງວັນສັງຄົມສົງເຄາະອາຊຽນ (15 ມີນາ) ເພື່ອຍົກສູງບົດບາດອັນສໍາຄັນ ຂອງນັກສັງຄົມສົງເຄາະ ແລະ ບຸກຄະລາກອນສັງຄົມສົງເຄາະ ໃນການຫລຸດຜ່ອນຄວາມສ່ຽງ ຈາກໄພພິບັດ ແລະ ການສ້າງຄວາມທົນທານຕໍ່ ການປ່ຽນແປງສະພາບ ດິນຟ້າອາກາດ ໃນວັນທີ 25 ມີນາ 2025 ທີ່ນະຄອນຫລວງວຽງຈັນ ໂດຍມີພະນັກງານຈາກພາກລັດ, ສະຖາບັນການສຶກສາ, ຄູ່ຮ່ວມພັດທະນາ ແລະ ນັກສຶກສາທີ່ໜຸ່ມນ້ອຍ ຈາກພາກວິຊາສັງຄົມສົງເຄາະ ແລະ ການພັດທະນາ ຄະນະວິທະຍາສາດສັງຄົມ ເຂົ້າຮ່ວມ.
ທ່ານ ເດຊານູລາດ ແສນດວງເດດ ວ່າການອະທິການບໍດີ ມະຫາວິທະຍາໄລແຫ່ງຊາດ ໄດ້ກ່າວວ່າ:ການສະເຫລີມສະຫລອງຄັ້ງນີ້ ເປັນເວທີທີ່ສໍາຄັນ ເພື່ອໃຫ້ພວກເຮົາເສີມສ້າງການຮ່ວມມື, ພັດທະນານະໂຍບາຍ ແລະ ສ້າງຄວາມເຂັ້ມແຂງ ໃຫ້ແກ່ວຽກງານສັງຄົມສົງເຄາະ ເພື່ອປະກອບສ່ວນເຂົ້າໃນການຫລຸດຜ່ອນຄວາມສ່ຽງ ຈາກໄພພິບັດ ແລະ ການສ້າງຄວາມທົນທານຕໍ່ສະພາບດິນຟ້າອາກາດ ພ້ອມທັງ ຊ່ວຍໃນການສ້າງອະນາຄົດ ທີ່ມີຄວາມທົນທານໃຫ້ແກ່ຊຸມຊົນໃນທົ່ວພາກພື້ນ.
ທ່ານ ນາງ ມາກະລີ ໂຣເມເດັນ ຮອງຜູ້ຕາງໜ້າອົງການສະຫະປະຊາຊາດ ສໍາລັບເດັກ ປະຈໍາ ສປປລາວ ໄດ້ກ່າວວ່າ: ອົງການອຸຍນິເຊັບເຊື່ອໝັ້ນວ່າ ບຸກຄະລາກອນສັງຄົມສົງເຄາະທີ່ເຂັ້ມແຂງ ເປັນສິ່ງຈໍາເປັນສໍາລັບການປົກປ້ອງເດັກ ແລະ ການສ້າງຊຸມຊົນທີ່ມີຄວາມທົນທານ, ດ້ວຍເຫດນີ້, ອົງການອຸຍນິເຊັບ ຈຶ່ງໄດ້ເຮັດວຽກຮ່ວມ ກັບກະຊວງແຮງງານ ແລະ ສະຫວັດດີການສັງຄົມ, ມະຫາວິທະຍາໄລແຫ່ງຊາດ ແລະ ຄູ່ຮ່ວມງານອື່ນໆ ເພື່ອຮັບປະກັນວ່ານັກສັງຄົມສົງເຄາະ ໄດ້ຮັບການຮັບຮູ້, ໄດ້ຮັບການຝຶກອົບຮົມ ແລະ ໄດ້ຮັບການສະໜັບສະໜູນທີ່ເຂົາເຈົ້າສົມຄວນໄດ້ຮັບ.
ເຫດການໄພພິບັດທີ່ຜ່ານມາ ເຊັ່ນພະຍຸຢາກິ ທີ່ເກີດຂຶ້ນໃນປີ 2024 ໄດ້ເຮັດໃຫ້ເກີດນໍ້າຖ້ວມຢ່າງຮຸນແຮງໃນແຂວງຫລວງນໍ້າທາ ເຊິ່ງໄດ້ສະແດງໃຫ້ເຫັນຄວາມສຳຄັນ ຂອງຄໍາແນະນໍາຂອງພາກພື້ນ ສໍາລັບປະເທດສະມາຊິກອາຊຽນ ກ່ຽວກັບບົດບາດຂອງນັກສັງຄົມສົງເຄາະ ແລະ ບຸກຄະລາກອນສັງຄົມສົງເຄາະ ໃນການຫລຸດຜ່ອນ ຄວາມສ່ຽງຈາກໄພພິບັດ ແລະ ການສ້າງຄວາມທົນທານ ຕໍ່ສະພາບດິນຟ້າອາກາດ. ນັກສັງຄົມສົງເຄາະເຄິ່ງມືອາຊີບ ໄດ້ມີບົດບາດສຳຄັນໃນການລະບຸເດັກທີ່ມີຄວາມສ່ຽງ, ເຊື່ອມຕໍ່ຄອບຄົວເດັກເຫລົ່ານັ້ນ ກັບການບໍລິການໃນພາວະສຸກເສີນ ແລະ ໃຫ້ການຊ່ວຍເຫລືອດ້ານຈິດໃຈຢູ່ໃນທີ່ພັກອາໄສຊົ່ວຄາວ, ຊ່ວຍຫລຸດຜ່ອນ ຄວາມສ່ຽງ ແລະ ການຟື້ນຟູໃນຊຸມຊົນ.
ສປປ ລາວ ພວມຮ່າງກົດໝາຍ ວ່າດ້ວຍວຽກງານສັງຄົມສົງເຄາະ, ເຊິ່ງເປັນກົດໝາຍສະບັບທຳອິດກ່ຽວກັບວຽກງານສັງຄົມສົງເຄາະຂອງປະເທດ ຄາດວ່າກົດໝາຍສະບັບນີ້ ຈະຖືກຮັບຮອງໃນທ້າຍປີນີ້. ພາຍໃຕ້ກົດໝາຍດັ່ງກ່າວ ວິຊາຊີບສັງຄົມສົງເຄາະ ຈະໄດ້ຮັບການພັດທະນາ ແລະ ຮັບປະກັນບໍລິການທີ່ມີຄຸນນະພາບ. ໃນຂະນະດຽວກັນ, ມະຫາວິທະຍາໄລແຫ່ງຊາດ ກໍໄດ້ປັບປຸງຫລັກສູດ ປະລິນຍາຕີ ພາກວິຊາສັງຄົມສົງເຄາະ ເພື່ອລວມເອົາຫົວຂໍ້ການຫລຸດຜ່ອນຄວາມສ່ຽງ ຈາກໄພພິບັດ ແລະ ສະພາບອາກາດເຂົ້າໃນຫລັກສູດດັ່ງກ່າວ ເພື່ອກຽມພ້ອມນັກສຶກສາ ສຳລັບການແກ້ໄຂສິ່ງທ້າທາຍ ຈາກການປ່ຽນແປງດິນຟ້າອາກາດ ແລະ ຄວາມສ່ຽງທາງດ້ານສັງຄົມ.
ໃນຂະນະທີ່ ອາຊຽນ ພວມຜະເຊີນກັບຄວາມສ່ຽງ ດ້ານສະພາບອາກາດທີ່ເພີ່ມຂຶ້ນ, ການນຳພາຂອງ ສປປ ລາວ ໃນການສົ່ງເສີມວຽກງານສັງຄົມ ໄດ້ຢັ້ງຢືນເຖິງຄວາມສຳຄັນຂອງການລົງທຶນ ໃສ່ການພັດທະນາບຸກຄະລາກອນ ສັງຄົມສົງເຄາະທີ່ເຂັ້ມແຂງ ແລະ ມີຄວາມທົນທານໃນທົ່ວອາຊີຕະເວັນອອກສຽງໃຕ້.
KPL
