ຂປລ. ຫ້ອງວ່າການສູນກາງພັກ (ຫສພ) ຈັດຝຶກອົບຮົມວຽກງານຈັດຕັ້ງ ໃຫ້ພະນັກງານລັດຖະກອນກົມຈັດຕັ້ງ-ພະນັກງານ ລະຫວ່າງວັນທີ 17-28 ມີນາ 2025 ໂດຍການເປັນປະທານຂອງ ທ່ານ ຄຳຜາ ພິມມະສອນ ຮອງເລຂາຄະນະພັກ ຮອງຫົວໜ້າຫ້ອງວ່າການສູນກາງພັກ, ມີພະນັກງານລັດຖະກອນ ກົມຈັດຕັ້ງ-ພະນັກງານ ກ່ຽວຂ້ອງອ້ອມຂ້າງ ຫສພ ເຂົ້າຮ່ວມ.

ທ່ານ ຄຳພາ ພິມມະສອນ ໄດ້ກ່າວວ່າ: ໂດຍປະຕິບັດຕາມແຜນພັດທະນາ ຂອງກົມຈັດຕັ້ງ-ພະ ນັກງານ ຫ້ອງວ່າການສູນກາງພັກ ປະຈຳປີ 2025 ໂດຍສະເພາະ ແມ່ນການຈັດຕັ້ງຜັນຂະຫຍາຍ ບັນດາວຽກງານຂົງເຂດການສ້າງຄວາມເຂັ້ມແຂງ ທາງດ້ານວິຊາສະເພາະ ໃຫ້ພະນັກງານ-ລັດຖະກອນ ພາຍໃນກົມຈັດຕັ້ງ-ພະນັກງານ ຫ້ອງວ່າການສູນກາງພັກ ໃຫ້ມີຄຸນນະພາບສູງຂຶ້ນກວ່າເກົ່າ, ສາມາດເປັນເສນາທິການທາງດ້ານວຽກຈັດຕັ້ງ ໃຫ້ແກ່ຄະນະຫ້ອງວ່າການສູນກາງພັກ. ດັ່ງນັ້ນ, ວຽກງານສ້າງຄວາມເຂັ້ມ ແຂງທາງດ້ານວິຊາສະເພາະ ໃຫ້ແກ່ພະນັກງານ-ລັດຖະກອນຂອງ ກົມຈັດຕັ້ງ-ພະນັກງານຫ້ອງວ່າການສູນກາງພັກ ຈຶ່ງເປັນສິ່ງສໍາຄັນ, ຈຳເປັນ ແລະ ພາວະວິໄສໃນເງື່ອນໄຂປັດຈຸບັນ, ເມື່ອເປັນຄືແນວນັ້ນ ຄະນະພັກ-ຄະນະນໍາຂອງ ຫ້ອງວ່າການສູນກາງພັກ ຈຶ່ງໄດ້ຕັດສິນໃຈ ແລະ ສູ້ຊົນຊຸກຍູ້ໃຫ້ການຝຶກອົບຮົມໃນຄັ້ງນີ້ ເກີດຂຶ້ນຕາມແຜນການ ແລະ ຄາດໝາຍທີ່ວາງໄວ້.

ຊຸດຝຶກອົບຮົມໃນຄັ້ງນີ້, ເປັນການຍົກລະດັບດ້ານຄວາມຮູ້, ຄວາມສາມາດທາງດ້ານວຽກງານ ຈັດຕັ້ງໃຫ້ເລິກເຊິ່ງຕື່ມອີກ ເປັນຕົ້ນ ແມ່ນກຸ່ມວຽກງານພັກ, ພະນັກງານ, ກຸ່ມວຽກປັບປຸງກົງຈັກ ແລະ ກຸ່ມວຽກວິຊາສະເພາະປິ່ນອ້ອມ ເຊິ່ງບັນດາກຸ່ມວຽກດັ່ງກ່າວ ເປັນວຽກງານໜຶ່ງທີ່ສໍາຄັນຂອງພັກ, ສາ ມາດນໍາໄປຜັນຂະຫຍາຍ ​ແລະ ໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຕົວຈິງ ໃນນາມທີ່ເປັນເສນາທິການທີ່ເຮັດວຽກງານ ຈັດຕັ້ງຊ່ວຍຄະນະພັກ-ຄະນະນໍາຫ້ອງວ່າການສູນກາພັກ ໃຫ້ມີຄວາມໜັກແໜ້ນ, ເຂັ້ມແຂງ ແລະ ທັງເສີມຂະຫຍາຍໄດ້ດ້ານຫົວຄິດປະດິດສ້າງ, ກໍາລັງແຮງລວມໝູ່ ເພື່ອພ້ອມກັນເຮັດສຳເລັດທຸກ ໜ້າທີ່ການເມືອງຂອງຕົນ ໃນປັດຈຸບັນ ກໍຄື ໃນສະເພາະໜ້າ ແລະ ຍາວນານ.

ໂອກາດນີ້, ທ່ານ ຄຳພາ ພິມມະສອນ ຍັງໄດ້​ເນັ້ນໃຫ້ຄະນະຮັບຜິດຊອບຕິດຕາມ ການຮຽນ-ການສອນຢ່າງເປັນລະບົບປົກກະຕິ, ເກັບກຳຂໍ້ມູນ, ລົງເລິກກະກຽມແຕ່ຫົວທີ ເປັນຕົ້ນ ດ້ານບຸກຄະລາກອນ, ດ້ານແຜນການ-ງົບປະມານ, ການປະເມີນຜົນ, ການຕິດຕາມກວດກາ ແລະ ເຄື່ອນໄຫວຕາມ ແຜນການຂອງຄະນະ ຮັບຜິດຊອບວາງອອກ, ຖອດຖອນບົດຮຽນໃນການຈັດຕັ້ງປະຕິບັດ, ເກັບກໍາ, ລາຍງານຂໍ້ມູນຮອບດ້ານໃນຊຸດຝຶກອົບຮົມ ຕໍ່ຄະນະນໍາຂັ້ນເທິງຕາມຄວາມຮັບຜິດຊອບແຕ່ລະໄລຍະ;  ໃຫ້ບັນດາຄູຝຶກຈາກຄະນະຈັດຕັ້ງສູນກາງພັກ ສືບຕໍ່ຖ່າຍທອດບົດຮຽນ, ປະສົບການ, ເອົາໃຈໃສ່ແຕ່ງບົດຮຽນ-ບົດສອນ, ບົດຄົ້ນຄວ້າ, ນໍາໃຊ້ວິທະຍາສາດ-ເຕັກນິກ ໃໝ່ເຂົ້າໃນການສິດສອນ, ຖ່າຍທອດບົດຮຽນວຽກງານຈັດຕັ້ງແລກປ່ຽນບົດຮຽນດ້ານທິດສະດີ ແລະ ພຶດຕິກຳຕົວຈິງດ້ວຍຫລາຍຮູບການ, ພ້ອມທັງເປີດໂອກາດໃຫ້ໃຫ້ສໍາມະນາກອນ ມີສ່ວນຮ່ວມໃນການແລກປ່ຽນຄວາມຄິດເຫັນ ໃນແຕ່ລະວິຊາຮຽນຢ່າງກວ້າງຂວາງ; ໃຫ້ບັນດາທ່ານ ທີ່ເຂົ້າຮ່ວມຝຶກອົບຮົມຊຸດນີ້ ມີສະຕິສູງໃນການປະຕິບັດ ຕາມລະບຽບຂອງການຝຶກອົບຮົມຢ່າງເຄັ່ງຄັດ, ຂໍໃຫ້ຍົກສູງກຳແໜ້ນຫລັກການ ແລະ ບົດຮຽນກ່ຽວກັບວຽກງານຈັດຕັ້ງ, ຕັ້ງໜ້າຄົ້ນຄວ້າ, ຮໍ່າຮຽນ, ເອົາໃຈໃສ່ຜັນຂະຫຍາຍເນື້ອໃນທີ່ ໄດ້ຮັບຈາກການຝຶກອົບຮົມ ເຂົ້າສູ່ລວງເລິກຕົວຈິງ, ຍາດແຍ່ງເອົາການຖ່າຍທອດ ບົດຮຽນນໍາຄູຝຶກ ແລະ ເອົາໃຈໃສ່ມີສ່ວນຮ່ວມ, ແລກປ່ຽນບົດຮຽນລະຫວ່າງທິດສະດີ ແລະ ພຶດຕິກໍາຕົວຈິງ ກັບນັກຮຽນດ້ວຍກັນ ແລະ ຄູຝຶກຢ່າງກວ້າງຂວາງ.

ພາບ: ອ່າຍຄຳ

KPL