*ຄະນະພັກສູນກາງສະຫະພັນແມ່ຍິງລາວ ໄດ້ນຳພາ-ຊີ້ນຳການເຄື່ອນໄຫວວຽກງານຕົວຈິງຕາມພາລະບົດບາດ, ໜ້າທີ່, ສິດຂອງຄະນະບໍລິຫານງານພັກ ສສຍລ ສະໄໝທີ IV, ໂດຍຍຶດໝັ້ນການນຳພາຕາມຫລັກການລວມສູນປະຊາທິປະໄຕ, ແບ່ງງານໃຫ້ບຸກຄົນຮັບຜິດຊອບ, ມີຄວາມເປັນເອກະພາບເປັນໝູ່ຄະນະໃນການຕັດສິນບັນຫາສຳຄັນ..., ຄຽງຄູ່ກັບການນຳພາ-ຊີ້ນຳ ແລະ ບັນຊາຕົວຈິງໃນການຜັນຂະຫຍາຍ ແນວທາງນະໂຍບາຍຂອງພັກ-ລັດ, ແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ IX, ແຜນພັດທະນາແມ່ຍິງແຫ່ງຊາດ 5 ປີ (2021-2025) ມີ 5 ແຜນງານ, 3 ແຜນດຳເນີນງານແຫ່ງຊາດຂອງຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ເດັກ, 30 ໂຄງການຈຸດສຸມບູລິມະສິດ ແລະ 74 ກິດຈະກຳໃນການປະຕິບັດວາລະແຫ່ງຊາດ ແລະ ການຫັນປ່ຽນຢ່າງແຂງແຮງເລິກເຊ່ິງວຽກງານພະນັກງານ; ສຸມໃສ່ຊີ້ນຳຈັດຕັ້ງປະຕິບັດ 9 ຄາດໝາຍສູ້ຊົນ, 10 ແຜນງານ ແລະ 30 ໂຄງການຈຸດສຸມຂອງແຜນພັດທະນາແມ່ຍິງ. 

     ໂດຍຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ, ໄດ້ນຳພາສະມາຊິກພັກ-ພະນັກງານຄົ້ນຄວ້າເຊື່ອມຊຶມບັນດາແນວທາງນະໂຍບາຍ, ມະຕິ, ຄຳສັ່ງດ້ວຍຫລາຍຮູບຫລາຍວິທີ, ເອົາໃຈໃສ່ຕິດຕາມເກັບກຳສະພາບແນວຄິດຫາງສຽງສັງຄົມໃນແຕ່ລະເດືອນເພື່ອສັງລວມ ແລະ ລາຍງານຄະນະໂຄສະນາອົບຮົມສູນກາງພັກເປັນປົກກະຕິ. ພ້ອມນີ້ກໍໄດ້ປະສານສົມທົບກັບພາກສ່ວນກ່ຽວຂ້ອງເພື່ອສົ່ງພະນັກງານໄປຍົກລະດັບທາງດ້ານທິດສະດີການເມືອງ, ຝຶກອົບຮົມວຽກງານແມ່ຍິງ ຢູ່ ສສ ຫວຽດນາມ ໄລຍະ 2 ເດືອນ, ສ້າຄູຝຶກວຽກງານພັດທະນາແມ່ຍິງ, ຝຶກອົບຮົມພາສາອັງກິດໄລຍະສັ້ນ, ຍົກລະດັບວິຊາສະເພາະ. ນອກນ້ັນຍັງມີພະນັກງານຈຳນວນໜຶ່ງໄປຍົກລະດັບດ້ວຍທຶນຕົນເອງ. ຄຽງຄູ່ກັນນີ້ ກໍໄດ້ຊີ້ນຳການຈັດຕັ້ງປະຕິບັດຄຳຂວັນ,  ເນື້ອໃນຂໍ້ແຂ່ງຂັນ 3 ດີ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ ເຮັດໃຫ້ວຽກງານດັ່ງກ່າວນີ້ ໄດ້ຮັບການຈັດຕັ້ງປະຕິບັດ ແລະ ບັນລຸຜົນສຳເລັດຢ່າງມີຄຸນນະພາບ. ເອົາໃຈໃສ່ປະຕິບັດວຽກງານສ່ົງເສີມຄວາມກ້າວໜ້າຂອງແມ່ຍິງ, ແມ່-ເດັກ, ຄວາມສະເໝີພາບລະຫວ່າງ ຍິງ-ຊາຍ, ວຽກງານປົກປ້ອງສິດຜົນປະໂຫຍດຂອງແມ່ຍິງ-ເດັກນ້ອຍ, ໃຫ້ແມ່ຍິງໄດ້ເຂົ້າເຖິງຂະບວນຍຸຕິທຳ, ນຳພາ- ຊີ້ນຳໃຫ້ຄຳປຶກສາ, ປົກປ້ອງສິດ ແລະ ຜົນປະໂຫຍດອັນຊອບທຳຂອງແມ່ຍິງ ແລະ ເດັກ ໄດ້ຂະຫຍາຍສູນໃຫ້ຄຳປຶກສາ ແລະ ປົກປ້ອງແມ່ຍິງ ແລະ ເດັກນ້ອຍຂັ້ນແຂວງຕື່ມ 4 ແຂວງຄື: ແຂວງບໍ່ແກ້ວ, ອັດຕະປື, ບໍລິຄຳໄຊ ແລະ ແຂວງຈຳປາສັກ, ສູນຮັບຕ້ອນຊົ່ວຄາວຜູ້ຖືກເຄາະຮ້າຍຈາກການຄ້າມະນຸດຈຸດພາກເໜືອຢູ່ແຂວງຫລວງນ້ຳທາ, ຮັບຄຳສະເໜີ ແລະ ບໍລິການໃຫ້ຄຳປຶກສາດ້ານກົດໝາຍ,  ສຸຂະພາບ ແລະ ຈິດໃຈໂດຍບໍ່ເສຍຄ່າໃຫ້ແມ່ຍິງ ແລະ ເດັກນ້ອຍທີ່ມີບັນຫາ, ຊ່ວຍເຫລືອຜູ້ເຄາະຮ້າຍໃຫ້ເຂົ້າເຖິງຂະບວນຍຸຕິທຳ ແລະ ອື່ນໆ.

   ໄລຍະຜ່ານມາສູນກາງສະຫະພັນແມ່ຍິງລາວ ມີພົນງານທີ່ພົ້ນເດັ່ນຫລາຍດ້ານເປັນຕົ້ນສຳເລັດການຄົ້ນຄວ້າແນວຄິດ ໄກສອນ ພົມວິຫານ ກ່ຽວກັບວຽກງານແມ່ຍິງ ຮ່ວມກັບພາກສ່ວນທີ່ກ່ຽວຂ້ອງໄດ້ 6 ຫົວຂໍ້ໃຫຍ່, ສຳເລັດການປັບປຸງກົດໝາຍວ່າດ້ວຍສະຫະພັນແມ່ຍິງລາວ ແລະ ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ (ສະບັບປັບປຸງ) ຊຶ່ງຖືກຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນເດືອນທັນວາ 2024; ໃນນີ້ ສິ່ງທີ່ພາກພູມໃຈແມ່ນໄດ້ຮັບໜ້າທີ່ເປັນ ປະທານຄະນະກຳມະການແມ່ຍິງ ອາຊຽນ (ACM)  ແລະ ໄດ້ເປັນ ເຈົ້າພາບກອງປະຊຸມ ACM ຄັ້ງທີ 21; ກອງປະຊຸມສຳມະນາກ່ຽວກັບ ວຽກງານດູແລຮ່ວມກັບບັນດາປະ ເທດສະມາຊິກອາຊຽນ ປີ 2023 ແລະ ກອງປະຊຸມສຸດຍອດການນຳ ແມ່ຍິງອາຊຽນ ຄັ້ງທີ 3 ພາຍໃຕ້ຫົວຂໍ້: ເສີມຂະຫຍາຍເສດຖະກິດການດູແລເບິ່ງແຍງ ແລະ ຄວາມ ເຂັ້ມແຂງ ເພື່ອນຳໄປສູ່ປະຊາຄົມອາຊຽນ ພາຍຫລັງ 2025 ແລະ ກອງປະຊຸມປິ່ນອ້ອມປີ 2024 ມີ 14 ປະເທດອາຊຽນເຂົ້າຮ່ວມ.

   ໂດຍ: ແສງສະຫວັນ

KPL