ປະເພນີແຫ່ຜາສາດເຜິ້ງ ມໍລະດົກວັດທະນະທຳອັນລ້ຳຄ່າຂອງຄົນລາວ

18/11/2026 12:17
ຂປລ ຂປລ. ປະເພນີການແຫ່ຜາສາດເຜິ້ງ ເປັນໜຶ່ງໃນຮີດຄອງອັນດີງາມທີ່ສະທ້ອນເຖິງວິຖີຊີວິດ, ສັດທາຄວາມເຊື່ອຖື ແລະ ພູມປັນຍາຂອງຄົນລາວທີ່ຜູກພັນກັບພຸດທະສາສະໜາມາແຕ່ບູຮານນະການ,

   ຂປລ. ປະເພນີການແຫ່ຜາສາດເຜິ້ງ ເປັນໜຶ່ງໃນຮີດຄອງອັນດີງາມທີ່ສະທ້ອນເຖິງວິຖີຊີວິດ, ສັດທາຄວາມເຊື່ອຖື ແລະ ພູມປັນຍາຂອງຄົນລາວທີ່ຜູກພັນກັບພຸດທະສາສະໜາມາແຕ່ບູຮານນະການ, ທັງເປັນການເຕົ້າໂຮມຄວາມສາມັກຄີລະຫວ່າງຄອບຄົວ, ບ້ານ ແລະ ເມືອງ ໂດຍຈັດຂຶ້ນທຸກໆປີໃນມື້ຂຶ້ນ 14 ຄໍ່າ ເດືອນສິບສອງລາວ ຊຶ່ງປີນີ້ ກົງກັບວັນທີ 23 ພະຈິກ 2026.
   ການແຫ່ຜາສາດເຜິ້ງ ເປັນປະເພນີທີ່ໄດ້ສືບທອດປະຕິບັດກັນມາແຕ່ດົນນານຕາມຄວາມເຊື່ອທີ່ວ່າ:“ການແຫ່ຜາສາດເຜິ້ງ ເປັນການສ້າງບຸນກຸສົນເພື່ອໃຫ້ເກີດອານິສົງແກ່ຕົນເອງ ແລະ ຄອບຄົວ. ຄວາມເຊື່ອນີ້ມີຄວາມກ່ຽວພັນກັບພຸດທະປະຫວັດຕອນພະພຸດທະເຈົ້າສະເດັດຂຶ້ນໄປຈຳພັນສາຢູ່ສະຫວັນຊັ້ນດາວະດຶງ ເພື່ອເທສະໜາໂປດພະພຸດທະມານດາ ແລະ ເຫລົ່າເທວະດາ. ເມ່ື່ອພະອົງສະເດັດກັບລົງສູ່ໂລກມະນຸດໄດ້ເກີດເຫດການເປີດໂລກທັງສາມຄື: ສະຫວັນພູມ, ມະນຸດພູມ ແລະ ນະລົກພູມ ໄດ້ເຫັນເຊິ່ງກັນ ແລະ ກັນ. ເຮັດໃຫ້ຄົນເຫັນຄວາມແຕກຕ່າງຂອງຄວາມສະດວກສະບາຍເທິງສະຫວັນຊັ້ນຟ້າ ແລະ ຄວາມຕົກທຸກໄດ້ຍາກຢູ່ນະລົກພູມ. ເຫດການດັ່ງກ່າວ ໄດ້ກາຍເປັນຄະຕິສອນໃຈໃຫ້ຜູ້ຄົນໝັ່ນເຮັດຄວາມດີ, ສ້າງບຸນກຸສົນ ແລະ ອື່ນໆ ເພື່ອທີ່ຈະໄດ້ໄປເກີດເທິງສະຫວັນ. ປະເພນີແຫ່ຜາສາດເຜິ້ງ ຈຶ່ງບໍ່ແມ່ນພຽງການສະແດງອອກເຖິງສັດທາທາງສາສະໜາ ຫລື ການສ້າງບຸນກຸສົນເທົ່ານັ້ນ, ແຕ່ຍັງມີຄຸນຄ່າສຳຄັນໃນການສືບສານມໍລະດົກທາງວັດທະນະທຳ, ຮັກສາສິລະປະຫັດຖະກຳ, ສົ່ງເສີມຄວາມສາມັກຄີໃນຊຸມຊົນ ແລະ ປູກຝັງຈິດສຳນຶກໃຫ້ຄົນຮຸ່ນໃໝ່ເຫັນຄຸນຄ່າຂອງຮີດຄອງປະເພນີອັນດີງາມ.ດັ່ງນັ້ນ, ການຮ່ວມກັນອະນຸລັກ ແລະ ສືບທອດປະເພນີແຫ່ຜາສາດເຜິ້ງ ຈຶ່ງເປັນພາລະໜ້າທີ່ຂອງຄົນລາວທຸກຮຸ່ນຄົນ ເພື່ອໃຫ້ມູນເຊື້ອວັດທະນະທຳອັນລ້ຳຄ່ານີ້ ໃຫ້ຢູ່ຄູ່ກັບສັງຄົມລາວຢ່າງຍືນຍົງ ແລະ ຖ່າຍທອດສູ່ລູກຫລານສືບໄປ.

   ສຳລັບຈຸດເດັ່ນຂອງປະເພນີນີ້ ແມ່ນການປະດິດສ້າງຜາສາດເຜິ້ງທີ່ມີຮູບຊົງ ແລະ ລວດລາຍອັນປະນີດສວຍງາມ, ໃນມື້ແຫ່ຜາສາດເຜິ້ງ, ປະຊາຊົນລາວ ໄດ້ພ້ອມຈິດພ້ອມໃຈກັນປະດິດຕົ້ນເຜິ້ງຂອງໃຜລາວ, ບາງບ້ານ ບາງເມືອງ ປະດິດສ້າງຕົ້ນເຜິ້ງຂະໜາດໃຫຍ່ເປັນຮູບຄື ຜາສາດ ໂດຍໃຊ້ຫລາຍຄົນແບກຫາມ, ສ່ວນຂະບວນແຫ່ກໍມີສີສັນ ແຕກຕ່າງກັນຄື: ມີຂະບວນທັ່ງບັ້ງ, ຂະບວນຊຸດຊົນເຜົ່າ, ຕໍາເຂົ້າເປົ່າແຄນ, ທັງຕີກອງ, ຕີແຊ່ງ, ລໍາເຊີ້ງ,ມີຂະບວນນັກຮຽນ, ຂະບວນປະເພ ນີລາວຍິງສາວນຸ່ງຊຸດໄໝ, ເກົ້າຜົມ ບ່ຽງແພ, ຜູ້ຊາຍນຸ່ງເສື້ອຂາວ ມັດແພກັດຕ້ຽວ, ຂະບວນເຖົ້າແກ່ ແນວໂຮມ ນຳໜ້າໂດຍຂະບວນພະສົງ ແລະ ຜູ້ນຳລາວ...ເມື່ອໄປຮອດເດີ່ນພະທາດຫລວງ ຂະບວນໄດ້ຫລັ່ງໄຫລໄປແບບຊ້າໆ ຕາມຄວາມກວ້າງຂອງເດີ່ນ ແລະ ຄວາມອັ່ງອໍ ຂອງຜູ້ສັດທາ, ແຕ່ຜູ້ຄົນກໍຍັງຍີ້ມແຍ້ມແຈ່ມໃສ ແລະ ຖາມໄຖ່ກັນເໝືອນດັ່ງພີ່ນ້ອງໃນຄອບຄົວ...ຈາກນັ້ນ ກໍຍ່າງອ້ອມກົມມະລຽນພະທາດຫລວງ ແລະ ວາງຕົ້ນເຜິ້ງ ເປັນອັນວ່າ ສຳເລັດພິທີ, ໃນຕອນຄໍ່າ ມີການຄົບງັນຕາມປະເພນີ.

KPL

ຂ່າວອື່ນໆ

ads
ads

Top