ຂປລ
ຂປລ. ກອງປະຊຸມຄະນະຊີ້ນຳ ໂຄງການການສົ່ງເສີມການພັດທະນາ ແລະ ສ້າງຄວາມເຂັ້ມແຂງລັດ ທີ່ປົກຄອງດ້ວຍກົດໝາຍໃນຂົງເຂດຍຸຕິທຳ ໄລຍະທີ II (J-ROL 2) ຄັ້ງທີ 3 ຈັດຂຶ້ນໃນວັນທີ 22 ມັງກອນ 2025 ຢູ່ນະຄອນຫລວງວຽງຈັນ
ຂປລ. ກອງປະຊຸມຄະນະຊີ້ນຳ ໂຄງການການສົ່ງເສີມການພັດທະນາ ແລະ ສ້າງຄວາມເຂັ້ມແຂງລັດ ທີ່ປົກຄອງດ້ວຍກົດໝາຍໃນຂົງເຂດຍຸຕິທຳ ໄລຍະທີ II (J-ROL 2) ຄັ້ງທີ 3 ຈັດຂຶ້ນໃນວັນທີ 22 ມັງກອນ 2025 ຢູ່ນະຄອນຫລວງວຽງຈັນ ໂດຍການເປັນປະທານຮ່ວມ ທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ, ທ່ານ ຄຳເພັດ ສົມວໍລະຈິດ ຮອງຫົວໜ້າອົງການໄອຍະການປະຊາ ຊົນສູງສຸດ, ທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທຳ, ທ່ານ ອຸ່ນຫລ້າ ສີວັນເພັງ ຮອງອະທິການບໍດີ ມະຫາວິທະຍາໄລແຫ່ງຊາດ ແລະ ທ່ານ ນາງ ມິຢາໂກະ ໂຄບາຢາຊິ ຫົວໜ້າຫ້ອງ ການຜູ້ຕາງໜ້າ ອົງການຮ່ວມມືສາກົນຍີ່ປຸ່ນ (JICA) ປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມ, ໄດ້ລາຍງານຄວາມຄືບໜ້າ ກ່ຽວກັບຜົນຂອງການຈັດຕັ້ງກິດຈະກຳ ທີ່ເຄື່ອນໄຫວ ແລະ ແຜນການໃນຕໍ່ໜ້າ ໃນໄລຍະທີ II ຂອງບັນດາກຸ່ມຄົ້ນຄວ້າທັງ 3 ກຸ່ມ ຄື: ກຸ່ມຄົ້ນຄວ້າປະມວນກົດໝາຍອາຍາ, ກຸ່ມຄົ້ນຄວ້າປະມວນກົດໝາຍແພ່ງ ແລະ ກຸ່ມພັດທະນາການສຶກສາ ແລະ ຝຶກອົບຮົມ (ກົດໝາຍແພ່ງ). ໃນນັ້ນ, ແຜນການກິດຈະກຳ ທີ່ຈະຈັດຕັ້ງປະຕິບັດໃນຕົ້ນປີ 2025 ສຳລັບກຸ່ມຄົ້ນຄວ້າປະມວນກົດໝາຍອາຍາ ຈະຈັດກອງປະຊຸມຜ່ານກໍລະນີສຶກສາ 12 ກໍລະນີ ທີ່ຈະຂຽນໃນປື້ມຄູ່ມືໃນເດືອນກຸມພາ 2025. ສ່ວນກຸ່ມຄົ້ນຄວ້າປະມວນກົດໝາຍແພ່ງ ຈະໄປຝຶກອົບຮົມຢູ່ປະເທດຍີ່ປຸ່ນ ໃນເດືອນ ມີນາ 2025 ແລະ ກຸ່ມພັດທະນາການສຶກສາ ແລະ ຝຶກອົບຮົມ (ກົດໝາຍແພ່ງ) ຈະຈັດກອງປະຊຸມການສອນຈຳລອງ ກ່ຽວກັບການກຳນົດຂໍ້ເທັດຈິງ ໃນການດຳເນີນຄະດີແພ່ງ ທີ່ຄະນະນິຕິ ສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໃນເດືອນ ກຸມພາ 2025.
ຕອນທ້າຍຂອງກອງປະຊຸມ, ທ່ານປະທານກອງປະຊຸມ ໄດ້ມີຄຳເຫັນໃຫ້ແຕ່ລະກຸ່ມຄົ້ນຄວ້າໃຫ້ສືບຕໍ່ຕັ້ງໜ້າ ຈັດຕັ້ງປະຕິບັດຕາມແຜນການເຄື່ອນໄຫວ ກິດຈະກຳໃຫ້ມີປະສິດພາບ ແລະ ບັນລຸຜົນສຳ ເລັດຕາມເປົ້າໝາຍທີ່ວາງໄວ້.
ຂ່າວ-ພາບ: ມະໂນປະພາ
KPL
