ຂປລ.ວິທະຍຸສາກົນແຫ່ງ ສປ ຈີນ, ວັນ​ທີ 21 ມັງ​ກອນ​ນີ້, ສູນ​ຮ່ວມ​ມື​ ປະ​ຕິ​ບັດ​ ກົດ​ໝາຍ​ ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ ໄດ້​ຈັດ​ກອງ​ປະ​ຊຸມ ​ສະ​ຫລຸບ ຜົນ​ການ​ປະ​ຕິ​ບັດ​ ການ​ຮ່ວມ​ພາຍ​ໃຕ້​ ລະ​ຫັດ “ນົກ​ນາງນວນ” (SEAGULL) ຢູ່​ນະ​ຄອນ​ຄຸນ​ໝິງ ​ແຂວງ​ຢຸນ​ນານ​ຂອງ ສປ ​ຈີນ.ສູນ​ດັ່ງ​ກ່າວ ​ໄດ້​ແຈ້ງ​​ສະ​ພາບ​ການ​ ປະ​ຕິ​ບັດ​ການ “ນົກ​ນາງນວນ” ​ພ້ອມ​ດ້ວຍ​​ ຜົນງານ​ຕົ້ນ​ຕໍ ທີ່​ໄດ້​ຮັບ, ​ແລະ ໄດ້​ຍ້ອງ​ຍໍ​ຝ່າຍທີ່​ກ່ຽວ​ຂ້ອງ ​ທີ່​ໄດ້​ຮັບ​ຜົນ​ງານ​ ອັນ​ພົ້ນ​ເດັ່ນ​ ໃນ​ການ​ປະ​ຕິ​ບັດ​ ການ​ຮ່ວມ​ຄັ້ງ​ນີ້, ​ພ້ອມ​ທັງ ໄດ້​ແນະ​ນຳ ​ແຜນ​ດຳ​ເນີນງານ ​ໄລ​ຍະ​ທີ 2 ຂອງ​ການ​ປະ​ຕິ​ບັດ​ການ “ນົກ​ນາງນວນ” ທີ່​ສູນ​ດັ່ງ​ກ່າວ​ ຈະ​ຈັດ​ຕັ້ງປະ​ຕິ​ບັດ​ໃນ​ປີ 2025.ລະ​ຫວ່າງ​ ເດືອ​ນ​ສິງ​ຫາ ຫາ ເດືອນ​ທັນ​ວາ ປີ 2024, ສູນ​ຮ່ວມ​ມື​ ປະ​ຕິ​ບັດ​ກົດ​ໝາຍ ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ ​ໄດ້​ດຳ​ເນີນ​ການ​ປະ​ຕິ​ບັດ​ກົດ​ໝາຍ​ຮ່ວມ “ນົກ​ນາງນວນ” ​ໄລ​ຍະ​ທີ 1, ໃນ​ໄລ​ຍະ​ດັ່ງ​ກ່າວ, ຝ່າຍ​ຕ່າງໆ​​ໄດ້​ມ້າງ​ຄະ​ດີ​ ປະ​ເພດ​ຕ່າງໆ​ ຫລາຍກວ່າ 160 ເລື່ອງ ​ທີ່​ມີ​ຄະ​ດີ​​ສໍ້​ໂກງ​ຊັບ ​ທາງໂທ​ລະ​ຄົມ​ເປັນ​ຕົ້ນ​ຕໍ, ໄດ້​ຈັບ​ກຸ່ມ​ຜູ້​ຕ້ອງ​ຫາ​ ຫລາຍກວ່າ 70.000 ​ຄົນ ແລະ ຊ່ວຍ​ເຫລືອ ​ຜູ້​ປະ​ສົບ​ເຄາະ​ຮ້າຍ 160 ກວ່າ​ຄົນ.ປີ​ນີ້, ສູນ​ປະ​ຕິ​ບັດ​ກົດ​ໝາຍ ​ແມ່​ນ້ຳ​ລ້ານ​ຊ້າງ-ແມ່​ນ້ຳ​ຂອງ​ ຈະ​​ເປີດ​ການປະ​ຕິ​ບັດ​​ການ​ຮ່ວມ “ນົກ​ນາງນວນ” ໄລ​ຍະ​ທີ 2 ໃນ​ເວ​ລາທີ່​ເໝາະ​ສົມ, ເພື່ອສືບ​ຕໍ່​ສຸມ​ໃສ່​​ປາບ​ປາມ ​ການ​ສໍ້​ໂກ​ງ​ຊັບ ​ທາງ​ໂທ​ລະ​ຄົມ ແລະ ອາ​ຊະ​ຍາ​ກຳ​ອື່ນໆ, ເພື່ອ​ປົກ​ປັກ​ຮັກ​ສາ​ ຄວາມ​ປອດ​ໄພ ດ້ານ​ຊີ​ວິດ ແລະ ຊັບ​ສິນ ​ຂອງ​ປະ​ຊາ​ຊົນ​ປະ​ເທດ​ຕ່າງໆ​ ໃນ​ພາກ​ພື້ນ ກໍ​ຄື​ ຄວາມ​ໝັ້ນ​ຄົງ ແລະ ​ສະ​ຖຽນ​ລະ​ພາບ ​ຂອງ​ພາກ​ພື້ນ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL