ຂປລ. ໃນປີ 2024 ຜ່ານ​ມາ, ທົ່ວປະເທດ ມີເຫດການໄພພິບັດເກີດຂຶ້ນ ທັງໝົດ 69 ຄັ້ງ, ສົ່ງຜົນກະທົບຢູ່ 16 ແຂວງ, 1 ນະຄອນຫລວງ, ມີ 147 ເມືອງ, 1.730 ບ້ານ, 58.753 ຄອບຄົວ, 271.168 ຄົນ, ຍິງ 124.213 ຄົນ, ເສຍຊີວິດ 17 ຄົນ, ບາດເຈັບ 58 ຄົນ, ເຮືອນເປ່ເພ 6.432 ຫລັງ, ເຮືອນຖືກເສຍຫາຍ 100% ມີ 110 ຫລັງ, ໂຮງຮຽນ 126 ແຫ່ງ, ສະໜາມບິນ 1 ແຫ່ງ, ສັດລ້ຽງ 4.349 ໂຕ, ເນື້ອທີ່ 41.027 ເຮັກຕາ ແລະ ຊົນລະປະທານ 118 ແຫ່ງ ລວມມູນຄ່າເສຍຫາຍທັງໝົດ 6.747 ຕື້​ກວ່າກີບ.

ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ທັງເປັນປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ (ຄພສ) ​ໄດ້ໃຫ້ຮູ້ ໃນກອງປະຊຸມຄະນະກຳມະການຄຸ້ມຄອງໄພພິ ບັດ ທົ່ວປະເທດ ປະຈຳປີ 2024, ວາງທິດທາງແຜນການປີ 2025 ແລະ ກໍານົດແຜນກຽມພ້ອມຕອບໂຕ້ໄພພິບັດ ປີ 2025 ໃນວັນທີ 21 ມັງກອນ 2025 ຜ່ານມານີ້ວ່າ: ໃນປີ 2024 ຜ່ານມາ, ໄດ້ມີເຫດການໄພພິບັດ ທີ່ເກີດຂຶ້ນຢູ່ບັນດາແຂວງ ໃນຂອບເຂດທົ່ວປະເທດ ເຊິ່ງເຫັນໄດ້ວ່າເປັນເຫດໜຶ່ງ ທີ່ມີຄວາມຮຸນແຮງ ໂດຍສະເພາະ ເຫດການລົມພາຍຸພັດ, ດິນເຈື່ອນ, ນ້ຳຖ້ວມຊຸ, ນໍ້າຖ້ວມຂັງ ແລະ ໄລ ຍະທ້າຍເດືອນກໍລະກົດ ຫາເດືອນກັນຍາ 2024 ມີເຫດການລົມພະຍຸດີເປເຊີນ, ພາຍຸພະພິລຸນ, ພາຍຸຢາກິ ແລະ ພາຍຸຊູລິກ ທີ່ພັດຜ່ານເຂົ້າມາ ສປປ ລາວ ເຮັດໃຫ້ຫລາຍແຂວງໄດ້ຮັບຜົນກະທົບ ທັງໝົດ 16 ແຂວງ 1 ນະຄອນຫລວງ, ຍັງແຕ່ແຂວງອັດຕະປື ແມ່ນບໍ່ໄດ້ຮັບຜົນກະທົບ ຕາມການເກັບກຳຂໍ້ມູນຂອງກອງເລຂາ ແລະ ລາຍງານຂອງບັນດາແຂວງ, ເຫັນໄດ້ວ່ານັບມື້ສະພາບໄພພິບັດ ມີຄວາມຮຸນແຮງ ເປັນຕົ້ນ ແຂວງທາງພາກເໜືອ ທີ່ບໍ່ເຄີຍມີນໍ້າຖ້ວມຂັງ ແລະ ຮຸນແຮງ ແຕ່ກໍ​ເກີດ​ຂຶ້ນ ຄື: ໃນປີ 2024 ແຂວງຫົວພັນ, ຫລວງນໍ້າທາ, ໄຊຍະບູລີ, ຫລວງພະບາງ ແລະ ແຂວງອື່ນໆ ເຊິ່ງສ້າງຄວາມເສຍຫາຍ ເປັນຈໍານວນຫລາຍສົມຄວນ.

ຕໍ່ກັບສະພາບໄພພິບັດທີ່ເກີດຂຶ້ນ, ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ທ້ອງ ຖິ່ນ ໄດ້ເອົາໃຈໃສ່ນໍາພາ-ຊີ້ນໍາ, ຕິດຕາມ, ຊຸກຍູ້ການຄວບຄຸມ, ແກ້ໄຂສຸກເສີນ, ຊ່ວຍເຫລືອປະຊາຊົນ ທີ່ໄດ້ຮັບຜົນກະທົບຈາກໄພພິບັດ ຢູ່ບັນດາແຂວງ ໃຫ້ສາມາດກັບສູ່ສະພາບປົກກະຕິໄດ້ຢ່າງວ່ອງໄວ, ໄດ້ຮີບຮ້ອນຟື້ນຟູສຸກເສີນ, ຮີບດ່ວນດ້ານພື້ນຖານໂຄງລ່າງ, ດ້ານການຜະລິດກະສິກຳ ແລະ ສະເໜີລັດ ຖະບານ ອະນຸມັດແກ້ໄຂໂຄງການຟື້ນຟູສຸກເສີນ ແລະ ຟື້ນຟູໄລຍະຍາວ ເຂົ້າໃນແຜນຟື້ນຟູປົກກະຕິ ແຜນລົງທຶນຂອງລັດ ປີ 2025 ນີ້. ພ້ອມນີ້, ເພື່ອເປັນການປັບປຸງກົນໄກ ການປະສານງານ ຂອງຄະນະກຳມະການຄຸ້ມຄອງໄພພິບັດ ຢູ່ແຕ່ລະຂັ້ນ ໃຫ້ມີຄວາມເຂັ້ມແຂງ ແນໃສ່ເຮັດໃຫ້ການຈັດຕັ້ງປະຕິບັດວຽກງານປ້ອງກັນ, ຄວບຄຸມ ແລະ ຟື້ນຟູຫລັງໄພພິບັດ ໃຫ້ໄດ້ຮັບຜົນດີ ໂດຍໄດ້ຊຸກຍູ້ການສ້າງຄວາມເຂັ້ມແຂງໃຫ້ແກ່ກອງທຶນຄຸ້ມຄອງໄພພິບັດຂັ້ນສູນກາງ, ລັດຖະບານ ກໍອະນຸມັດງົບປະມານຈໍານວນໜຶ່ງ ເຂົ້າກອງທຶນ, ຂັ້ນສູນກາງ ແລະ ທ້ອງຖິ່ນ ກໍໄດ້ມີການສ້າງຕັ້ງກອງທຶນໃນຂັ້ນຂອງຕົນ ໃຫ້ສາມາດສະໜອງຕໍ່ວຽກງານ ການຕອບໂຕ້ສຸກເສີນ, ຊຸກຍູ້ການສ້າງແຜນຍຸດທະສາດ ຫລຸດຜ່ອນຄວາມສ່ຽງ ໄພພິບັດຂັ້ນແຂວງ ແລະ ແຜນປະຕິບັດງານ ຫລຸດຜ່ອນຄວາມສ່ຽງໄພພິບັດຂັ້ນເມືອງ ແລະ ສ້າງແຜນກຽມພ້ອມຕອບໂຕ້ໄພພິບັດ ປະຈໍາປີ ແຕ່ສູນກາງຮອດທ້ອງຖິ່ນ, ສ້າງຄວາມເຂັ້ມແຂງໃຫ້ພາກສ່ວນທີ່ກ່ຽວຂ້ອງໃນວຽກງານຄຸ້ມຄອງໄພພິບັດໃນຂອບເຂດທົ່ວປະເທດ, ສ້າງທີມງານປະເມີນຜົນສຸກເສີນຂັ້ນສູນກາງ ແລະ ຂັ້ນທ້ອງຖິ່ນ, ຍົກລະດັບວຽກງານເຕືອນໄພ ໃຫ້ສັງຄົມສາມາດຮັບຮູ້ຂໍ້ມູນຂ່າວສານຢ່າງວ່ອງໄວ, ຊັດເຈນ ແລະ ສ້າງສູນປະຕິບັດງານສຸກເສີນໃຫ້ບາງແຂວງ.

ພ້ອມນີ້, ລັດຖະບານ ກໍຄື ຄະນະກໍາມະການຄຸ້ມຄອງໄພພິບັດຂັ້ນສູນກາງ ຍັງໄດ້ມອບຕົວເລກ ໂຄງການຟື້ນຟູແກ້ໄຂ ໃຫ້ບັນດາແຂວງ ທີ່ໄດ້ຮັບຜົນກະທົບຈາກໄພພິບັດ ໃນປີ 2024 ຜ່ານມາ, ຈໍາ​ນວນ 7 ແຂວງ ຄື: ແຂວງຫລວງນໍ້າທາ 50 ໂຄງການ, ມູນຄ່າ 144 ຕື້​ກວ່າກີບ. ໃນນີ້, ດ້ານການຊ່ວຍ ເຫລືອສັງຄົມສົງເຄາະ, ດ້ານກະສິກໍາ ແລະ ປ່າໄມ້, ດ້ານໂຍທາທິການ ແລະ ຂົນສົ່ງ ແລະ ດ້ານສຶກສາທິການ ແລະ ກິລາ;  ແຂວງຫົວພັນ 42 ໂຄງການ, ມູນຄ່າ 33,9 ຕື້​ກວ່າກີບ; ໄຊຍະບູລີ        28 ໂຄງການ, ມູນຄ່າ 17,4 ຕື້​ກວ່າກີບ; ແຂວງຊຽງຂວາງ 27 ໂຄງການ, ມູນຄ່າ  5,3 ຕື້​ກວ່າກີບ; ແຂວງຫລວງພະບາງ 11 ໂຄງການ, ມູນຄ່າ 27,9 ຕື້​ກວ່າກີບ;  ແຂວງບໍລິຄໍາໄຊ (ກັນຕາຝັ່ງເຈື່ອນ) 1 ໂຄງການ, ມູນຄ່າ 14,6 ຕື້​ກວ່າກີບ; ແຂວງບໍ່ແກ້ວ (ກະສິກໍາ) 1 ໂຄງການ, ມູນຄ່າ 424 ລ້ານ​ກວ່າກີບ ແລະ ມອບໃຫ້ ກະຊວງປ້ອງກັນປະເທດ (ເຂດພັດນາຊົນນະບົດ) 4 ໂຄງການ, ມູນຄ່າ 18,6 ຕື້​ກວ່າກີບ.

ຂ່າວ: ທະນູທອງ

ຂໍ້ມູນ-ພາບ: ຮສສ

KPL