ຂປລ. ກອງປະຊຸມໃຫຍ່ຜູ້ແທນຊາວໜຸ່ມ ກະຊວງສາທາລະນະສຸກ ສະໄໝທີ X ຈັດຂຶ້ນໃນວັນທີ 15 ມັງກອນ 2025 ເພື່ອຕີລາຄາຄືນການຈັດຕັ້ງປະຕິບັດ ວຽກງານຊາວໜຸ່ມໄລຍະ 2020-2024 ໂດຍມີ ສະຫາຍ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ມີ ສະຫາຍ ມອນໄຊ ລາວມົວຊົ່ງ  ຄະນະບໍລິຫານງານ ສູນກາງຊາວໜຸ່ມປະຊາຊົນ ປະຕິວັດລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ສະຫາຍ ນາງ ແສງຈັນ ຈັນທະສຸກ ເລຂາຄະນະບໍລິຫານງານຊາວໜຸ່ມ ກະຊວງສາທາລະນະສຸກ ໄດ້ຍົກໃຫ້ເຫັນຜົນງານ ການຈັດຕັ້ງປະຕິບັດ ວຽກງານຊາວໜຸ່ມ ກະຊວງ ສາທາລະນະສຸກ ໃນໄລຍະຜ່ານມາ ເຊິ່ງຊາວໜຸ່ມແມ່ນ ບຸກຄະລາກອນທີ່ສໍາຄັນ ແລະ ເປັນຜູ້ທີ່ແບກຫາບ ວຽກຂອງທຸກກົມກອງເປັນສ່ວນໃຫຍ່ ໄດ້ຕິດຕາມຊຸກຍູ້ ການປະຕິບັດວຽກງານ ຕາມນະໂຍບາຍ 5 ດີ 1 ພໍໃຈ, ຍົກສູງຄຸນນະພາບ ການບໍລິການ ດ້ານສາທາລະນະສຸກ,  ຊາວໜຸ່ມຢູ່ແຕ່ລະສະຖານທີ່ບໍລິການ ໄດ້ມີການພັດທະນາດ້ານວຽກງານ ວິຊາສະເພາະຂອງຕົນ, ສາມາດກວດ ແລະ ປີ່ນປົວ ດ້ວຍເຕັກນິກຕ່າງໆ ນຳໃຊ້ເຄື່ອງມືການແພດທີທັນສະໄໝ, ປະກອບສ່ວນຫັນໂຮງໝໍເປັນທັນສະໄໝ ແລະ ກຸ້ມຕົນເອງເທື່ອລະກ້າວ. ພ້ອມນີ້, ຍັງໄດ້ສົ່ງເສີມວິຊາຊີບຊາວໜຸ່ມ ຕັ້ງໜ້າປະກອບສ່ວນ ໜ້າທີ່ການເມືອງ ຕາມພາລະບົດບາດໜ້າທີ ການບໍລິການສາທາລະນະສຸກ ໃຫ້ນັບມື້ນັບທົ່ວເຖິງ ແລະ ມີຄຸນນະພາບດີ ຂຶ້ນເປັນກ້າວໆ, ການພັດທະນາບຸກຄະລາກອນ ສາທາລະນະສຸກ ສ່ວນໃຫຍ່ແມ່ນ ສະມາຊິກຊາວໜຸ່ມ ທີ່ຢູ່ທຸກຂົງເຂດວຽກງານ ນັບແຕ່ສູນກາງຮອດທ້ອງຖິ່ນ ໄດ້ຮັບການກໍ່ສ້າງ ເປັນລະບົບຄົບຊຸດທັງຢູ່ພາຍໃນປະເທດ, ນອກຈາກວຽກງານ ໃນໂມງລັດຖະການແລ້ວ ໄດ້ຊຸກຍູ້ໃຫ້ສະມາຊິກຊາວໜຸ່ມ ຜູ້ມີເງື່ອນໄຂສ້າງອາຊີບເສີມ ນອກໂມງລັດຖະການ ຖືກຕ້ອງຕາມ ລະບຽບກົດໝາຍ ເພື່ອສ້າງຄວາມເຂັ້ມແຂງ ໃຫ້ແກ່ເສດຖະກິດຂອງຄອບຄົວ; ຄະນະຊາວໜຸ່ມຖືວຽກງານກວດກາ ເປັນວຽກງານໜຶ່ງທີ່ສຳຄັນ ແລະ ຂາດບໍ່ໄດ້ຂອງການນໍາພາ ຂອງຄະນະຊາວໜຸ່ມ, ການກວດກາດ້ວຍການຕິດຕາມ ການປະຕິບັດກົດລະບຽບ ຂອງສະມາຊິກຊາວໜຸ່ມ, ກົດລະບຽບຂອງການຈັດຕັ້ງ, ການຕິດຕາມມະຫາຊົນກ້າວໜ້າ ຢູ່ຮາກຖານ ຂອງຕົນຂະຫຍາຍເຂົ້າພັກ, ຫາງສຽງສັງຄົມທາງສື່ຕ່າງໆ. ເຖິງຢ່າງໃດກໍຕາມຍັງມີບາງຂໍ້ຄົງຄາງທີ່ຕ້ອງປັບປຸງ ເຊັ່ນ: ການເຕົ້າໂຮມຊາວໜຸ່ມ ເພື່ອສຶກສາອົບຮົມການເມືອງ-ແນວ ຄິດສະເພາະຂອງຊາວໜຸ່ມ ຈັດຂຶ້ນເອງຍັງບໍ່ທັນກວ້າງຂວາງ-ເລິກເຊິ່ງ, ເນື້ອໃນ, ຮູບການ, ວິທີການສືກສາອົບຮົມ ຍັງບໍ່ທັນອຸດົມສົມບູນ; ຄະນະພັກ-ອຳນາດ ປົກຄອງບາງບ່ອນ ຍັງບໍ່ໄດ້ຕັ້ງໜ້ານຳພາ-ຊີ້ນຳ ແລະ ນໍາໃຊ້ກຳລັງແຮງຂອງຊາວໜຸ່ມ ເຂົ້າໃນການປະຕິບັດໜ້າທີ່ ການເມືອງຂອງຕົນເທົ່າທີ່ຄວນ.

ສຳລັບທິດທາງຕໍ່ໜ້າ ແຕ່ປີ 2025-2029 ຄະນະບໍລິຫານງານຊາວໜຸ່ມ ກະຊວງສາທາລະນະສຸກ ຈະເພີ່ມທະວິການສືກສາອົບຮົມ ການເມືອງ-ແນວຄິດໃຫ້ຄະນະຊາວໜຸ່ມ, ສະມາຊິກຊາວໜຸ່ມ ດ້ວຍຫລາຍຮູບຫລາຍວິທີ, ມີເນື້ອອຸດົມສົມບູນ ແທດເໝາະກັບກຸ່ມເປົ່າໝາຍ; ປັບປຸງການຈັດຕັ້ງໃຫ້ເຂັ້ມແຂງ ແລະ ຄົບຊຸດ, ປັບປຸງກອງອາສາສະໝັກໃຫ້ເຂັ້ມແຂງ ແລະ ຍືນຍົງ ສາມາດປະກອບສ່ວນຢ່າງແຂງແຮງ ເຂົ້າໃນທຸກວຽກງານ ທີ່ການຈັດຕັ້ງ ກໍຄື ຂັ້ນເທິງຕ້ອງການ; ຈັດຕັ້ງ ແລະ ນຳພາຂະບວນການ ຂອງຊາວໜຸ່ມໃຫ້ຟົດຟື້ນ ປົກກະຕິ ແລະ ຕໍ່ເນື່ອງ, ຍູ້ຂະບວນການຂອງຊາວໜຸ່ມ ປະກອບສ່ວນເຂົ້າໃນວຽກງານ ປ້ອງກັນຊາດ-ປ້ອງກັນຄວາມສະຫງົບ, ວຽກງານວິຊາສະເພາະ ແລະ ວຽກງານວັດທະນະທຳ-ສັງຄົມ; ສູ້ຊົນຕ້ານ ແລະ ສະກັດກັ້ນປະກົດການຍໍ້ທໍ້ ຖັນແຖວຊາວໜຸ່ມໃຫ້ໄດ້. ໃນນັ້ນ, ຕ້ອງສະກດກັ້ນບັນຫາສິ່ງເສບຕິດ, ການລະເມີດລະບຽບກົດໝາຍ, ອຸບັດເຫດການສັນຈອນ, ການຫລິ້ນກິນ ຟຸມເຟື່ອຍ ແລະ ບັນຫາໄພສັງຄົມ.

ກອງປະຊຸມ, ຍັງໄດ້ປ່ອນບັດຄັດເລືອກ ເອົາຄະນະບໍລິຫານງານຊາວໜຸ່ມຊຸດໃໝ່ ຈໍານວນ 21 ສະຫາຍ, ຍິງ  6 ສະຫາຍ. ກອງປະຊຸມຄັ້ງປະຖົມມະລືກ ຂອງຄະນະຊຸດໃໝ່ ໄດ້ເລືອກເອົາ ຄະນະປະຈໍາ 17 ສະຫາຍ, ຍິງ 4 ສະຫາຍ. ໃນນັ້ນ,ເລືອກເອົາ ສະຫາຍ ສະຫາຍ ນາງ ແສງຈັນ ຈັນທະສຸກ ເປັນເລຂາຄະນະບໍລິຫານງານ ຊາວໜຸ່ມ ກະຊວງສາທາລະນະສຸກ,  ສະຫາຍ ຫວັງນະຄອນ ດິດຕະພົງ, ສະຫາຍ ນາງ ໄພຄຳ ແກ້ວບູນໄຊ ແລະ ສະຫາຍ ຄຳຫລ້າ ພົນໄຊຍະລິນຄຳ ເປັນຮອງເລຂາ ຄະນະບໍລິຫານງານຊາວໜຸ່ມ ກະຊວງສາທາລະນະສຸກ.

ໃນກອງປະຊຸມ, ສະຫາຍ ບຸນແຝງ ພູມມະໄລສິດ ໄດ້ຕີລາຄາສູງຕໍ່ ຜົນສໍາເລັດຜ່ານມາ ຂອງຊາວໜຸ່ມສົມແລ້ວ ທີ່ເປັນກະດູກສັນຫລັງຂອງຊາດ, ສົມແລ້ວທີ່ເປັນ ນົກອິນຊີທີ່ບໍ່ຫວັນກົວ ຕໍ່ພາຍຸລົມແດງ, ສົມແລ້ວທີ່ໄດ້ຮັບສັນຍານາມວ່າ ເປັນນັກຮົບເສື້ອຂາວ ຫລື ແພດປະຕິວັດ, ໄລຍະມີການລະບາດ ຂອງພະຍາດໂຄວິດ-19, ພະຍາດໄຂ້ຍຸງລາຍ ແລະ ພະຍາດລະບາດ ຕາມລະດູການ ອື່ນໆ ສະມາຊິກຊາວໜຸ່ມ ຂອງຂະແໜງການສາທາລະນະສຸກ ໄດ້ເປັນກໍາລັງແຮງ ປະຈັນບານດ່ານໜ້າ, ໄດ້ມີໜ່ວຍຊາວໜຸ່ມຕະລຸມບອນ ທີ່ອາສາສະໝັກ ເຂົ້າຮ່ວມທຸກຂະບວນການຂອງວຽກງານ ໂດຍຍົກສູງຜົນປະໂຫຍດສ່ວນລວມ ສູງກວ່າສ່ວນຕົວ, ເພີ່ມທະວີ ຄວາມສາມັກຄີເປັນປຶກແຜ່ນ ຈັບມືກັນ ແໜ້ນຜ່ານຜ່າ ທຸກອຸປະສັກ ພາຍໃຕ້ການນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ໄດ້ຮັບຜົນສໍາເລັດຢ່າງເພີ່ງພໍໃຈ ເຊິ່ງສະແດງອອກຄະນະຊາວໜຸ່ມ, ສະມາຊິກຊາວໜຸ່ມ ກໍຄື ຮາກຖານຊາວໜຸ່ມ ໄດ້ຮັບນາມມະຍົດ ເປັນຊາວໜຸ່ມກະຊວງ 4 ບຸກ ແລະ ໄດ້ຮັບທຸງໄຊ ຈາກສູນກາງຊາວໜຸ່ມ ປະຊາຊົນປະຕິວັດລາວ.

ຂ່າວ: ກິດຕາ

ພາບ: ຂັນໄຊ

KPL