ຂປລ
ທ່ານ ສີ ຈິ້ນຜິງ ໄດ້ກ່າວເນັ້ນໜັກວ່າ: ໃນປີໃໝ່ 2025, ສປ ຈີນ ຍິນດີ ຮ່ວມກັບ ທ່ານ ປະທານາທິບໍດີ ປູຕິນ ຮັບມືກັບ ຄວາມບໍ່ແນ່ນອນ ຂອງສະພາບແວດລ້ອມ ພາຍນອກ ດ້ວຍຄວາມໝັ້ນຄົງ ແລະ ຄວາມເຂັ້ມແຂງ ຂອງການພົວພັນຮ່ວມມື ຢ່າງແໜ້ນແຟ້ນ ລະຫວ່າງ ສປ ຈີນ-ຣັດເຊຍ ໃນໄລຍະໃໝ່.
ຂປລ.ວິທະຍຸ ສາກົນ ແຫ່ງ ສປ ຈີນ,ເມື່ອບໍ່ດົນມານີ້, ທ່ານ ສີ ຈິ້ນຜິງ, ປະທານ ປະເທດຈີນ ໄດ້ພົບປະກັບ ທ່ານ ວາລາດີເມຍ ປູຕິນ, ປະທານາທິບໍດີ ຣັດເຊຍ ຜ່ານທາງວິດີໂອ ຢູ່ຫໍສະພາ ປະຊາຊົນແຫ່ງຊາດ ທີ່ນະຄອນຫລວງປັກກິ່ງ.ໃນໂອກາດນີ້ ທ່ານ ສີ ຈິ້ນຜິງ ໄດ້ກ່າວເນັ້ນໜັກວ່າ: ໃນປີໃໝ່ 2025, ສປ ຈີນ ຍິນດີ ຮ່ວມກັບ ທ່ານ ປະທານາທິບໍດີ ປູຕິນ ຮັບມືກັບ ຄວາມບໍ່ແນ່ນອນ ຂອງສະພາບແວດລ້ອມ ພາຍນອກ ດ້ວຍຄວາມໝັ້ນຄົງ ແລະ ຄວາມເຂັ້ມແຂງ ຂອງການພົວພັນຮ່ວມມື ຢ່າງແໜ້ນແຟ້ນ ລະຫວ່າງ ສປ ຈີນ-ຣັດເຊຍ ໃນໄລຍະໃໝ່. ໂດຍສອງຝ່າຍ ຄວນສືບຕໍ່ ລົງເລິກ ການປະສານງານ ທາງຍຸດທະສາດ, ຍຶດໝັ້ນ ສະໜັບ ສະໜູນ ເຊິ່ງກັນ ແລະ ກັນ ຢ່າງເດັດດ່ຽວ, ປົກປັກຮັກສາ ຜົນປະໂຫຍດ ທີ່ຖືກຕ້ອງ ຕາມກົດໝາຍ ຂອງສອງປະເທດ. ສປ ຈີນ ຍິນດີຮ່ວມກັບ ຣັດເຊຍ ກໍຄື ປະເທດ ສະມາຊິກອື່ນໆ, ຊຸກຍູ້ໃຫ້ອົງການ ຮ່ວມມື ຊຽງໄຮ ກ້າວເຂົ້າສູ່ ໄລຍະໃໝ່ ທີ່ມີການພັດທະນາ ດ້ວຍຄຸນນະພາບສູງ ກວ່າເກົ່າ, ມີຄວາມຮັບຜິດຊອບ ແລະ ສ້າງຜົນງານ ຫລາຍກວ່າເກົ່າ. ສປ ຈີນ-ຣັດເຊຍ ຍັງຄວນຮ່ວມກັນຊຸກຍູ້ “ການຮ່ວມມື ບຣິກສ ໃຫຍ່” ເພື່ອຂຽນ ປະຫວັດສາດ ໜ້າໃໝ່ ແຫ່ງການສາມັກຄີກັນ ສ້າງຄວາມເຂັ້ມແຂງ ດ້ວຍຕົນເອງ ຂອງເຂດໂລກໃຕ້.ຈາກນັ້ນ ທ່ານ ວະລາດີເມຍ ປູຕິນ ໄດ້ສະແດງຄວາມເຫັນດີ ຕໍ່ທັດສະນະ ຂອງ ທ່ານ ສີ ຈິ້ນຜິງ, ພ້ອມກ່າວ ຢືນຢັນວ່າ: ການຮ່ວມມື ລະຫວ່າງ ຣັດເຊຍ-ຈີນ ແມ່ນຢູ່ບົນພື້ນຖານ ທີ່ສອງປະເທດ ມີຜົນປະໂຫຍດ ຮ່ວມທີ່ກວ້າງຂວາງ, ສາຍພົວພັນຣັດເຊຍ-ສປ ຈີນ ແມ່ນເປັນເອກະລາດ, ຈະບໍ່ຮັບຜົນກະທົບ ຈາກປັດໄຈ ການເມືອງ ພາຍໃນປະເທດ ແລະ ສະພາບການສາກົນ ໃນປັດຈຸບັນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
