ຂປລ. ສູນວັດທະນະທຳຈີນ ປະຈຳລາວ ຈັດກິດຈະກໍາ ສະເຫລີມສະຫລອງບຸນກຸດຈີນ ປີ 2025 ໃນຫົວຂໍ້ “ສໍາຜັດວັດທະນະທໍາຫູເປີຍທີ່ປະເທດລາວ” ໃນຕອນບ່າຍວັນທີ 17 ມັງກອນ 2025 ທີ່ສູນວັດທະນະທໍາຈີນ ປະຈໍາ ສປປ ລາວ ໂດຍມີ ທ່ານ ວັນສີ ກົວມົວ ຮອງລັດຖະມົນຕີ ກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ນາງ ຟາງຫົງ ເອກອັກຄະລັດຖະທູດ ແຫ່ງ ສປ ຈີນ ປະຈໍາລາວ,ທ່ານ ນາງ ຫລີຢີ່ຜິງ ຫົວໜ້າສູນວັດທະນະທໍາຈີນ ປະຈໍາລາວ ເຂົ້າຮ່ວມ.

ໃນປະເທດຈີນ, ບຸນກຸດຈີນ ແມ່ນສັນຍາລັກແຫ່ງການເລິ່ມຕົ້ນປີໃໝ່ ເຊິ່ງຈະເລີ່ມຕົ້ນໃນວັນທີ 1 ເດືອນ 1 ຕາມປະຕິທິນຈີນ. ໄລຍະກ່ອນ ແລະ ຫລັງບຸນກຸດຈີນ ຜູ້ຄົນຈະປະຕິບັດກິດຈະກໍາທາງສັງຄົມຕ່າງໆ ເພື່ອເປັນການບອກລາປີເກົ່າຕ້ອນຮັບປີໃໝ່ ແລະ ການອະທິຖານຂໍພອນໂຊກລາບ, ຄົນໃນຄອບຄົວເຕົ້າໂຮມ ກັນສະຫລອງ, ເສີມຂະຫຍາຍຄວາມສາມັກຄີໃນສັງຄົມ, ຂະບວນການດັ່ງກ່າວຖືກເອີ້ນວ່າ “ການສະເຫລີມສະຫລອງປີໃໝ່”. ອີງຕາມການຂະຫຍາຍຂອບເຂດ ການເຜີຍແຜ່ສູ່ຕ່າງປະເທດ, ບຸນກຸດຈີນ ກາຍເປັນສັນຍາລັກແຫ່ງວັດທະນະທໍາຈີນ ທີ່ທົ່ວໂລກໃຫ້ການຍອມຮັບ, ເຫັນພ້ອມ ແລະ ຊື່ນຊົມ.

ທ່ານ ວັນສີ ກົວມົວ ໄດ້ກ່າວວ່າ: ການຈັດກິດຈະກຳຄັ້ງນີ້, ເປັນການນຳເອົາວັດທະນະທຳ ອັນອຸດົມສົມບູນ ແລະ ເປັນເອກະລັກຂອງແຂວງຫູເປີຍ ມາສູ່ສາຍຕາຂອງປະຊາຊົນລາວ ໂດຍສະເພາະແມ່ນ ການສະແດງສິລະປະ, ດົນຕີ, ການວາງສະແດງມໍລະດົກ ວັດທະນະທຳນາມມະທຳ, ອາຫານພື້ນເມືອງ ແລະ ຜົນງານຮູບແຕ້ມ ລ້ວນແຕ່ສະທ້ອນ ໃຫ້ເຫັນເຖິງມູນເຊື້ອ ວັດທະນະທຳອັນເກົ່າແກ່ ແລະ ມີຊີວິດຊີວາຂອງແຂວງຫູເປີຍ. ກິດຈະກຳຄັ້ງນີ້, ບໍ່ພຽງແຕ່ເປັນການແລກປ່ຽນ ວັດທະນະທຳເທົ່ານັ້ນ, ແຕ່ຍັງເປັນການສະທ້ອນໃຫ້ເຫັນເຖິງ ສາຍພົວພັນອັນແໜ້ນແຟ້ນ ພາຍໃຕ້ກອບການຮ່ວມມື “ໜຶ່ງແລວ ໜຶ່ງເສັ້ນທາງ” ທີ່ນັບມື້ນັບມີຜົນ ສຳເລັດຢ່າງເປັນຮູບປະທຳ.

ໃນຂອບ “ໜຶ່ງແລວ ໜຶ່ງເສັ້ນທາງ” ໂຄງການທາງລົດໄຟ ລາວ-ຈີນ ເຊິ່ງເປັນໂຄງການເຊື່ອມຈອດ ຍຸດທະສາດລະຫວ່າງສອງປະເທດ ໄດ້ກາຍເປັນເສັ້ນທາງແຫ່ງການພັດທະນາ, ເສັ້ນທາງແຫ່ງຄວາມຜາສຸກ ຂອງປະຊາຊົນ ແລະ ເສັ້ນທາງແຫ່ງມິດຕະພາບ ທີ່ນັບມື້ນັບໃກ້ຊິດຍິ່ງຂຶ້ນ. ທ່ານຮອງລັດຖະມົນຕີ ຍັງໄອ້ສະແດງຄວາມ ເຊື່ອໝັ້ນວ່າກິດຈະກຳຄັ້ງນີ້, ຈະເປັນຂົວຕໍ່ໃນການແລກປ່ຽນຮຽນຮູ້ເຊິ່ງກັນ ແລະ ກັນ, ເພີ່ມພູນຄວາມເຂົ້າອົກເຂົ້າໃຈ, ຄວາມຮັກແພງລະຫວ່າງປະຊາຊົນສອງຊາດ, ທັງເປັນການສົ່ງເສີມການທ່ອງທ່ຽວ ແລະ ການຮ່ວມມືໃນດ້ານຕ່າງໆລະຫວ່າງລາວ ແລະ ແຂວງຫູເປີຍໃນອະນາຄົດ, ດັ່ງຄຳສຸພາສິດລາວທີ່ວ່າ "ຮັກແພງກັນ ຄືເຂົ້າໜຽວຕິດກະຕິບເຂົ້າ.

ຂ່າວ: ກິດຕາ

ພາບ: ເກດສະໜາ

KPL