ຂປລ. ພິທີວາງສີລາລືກໂຄງການ ກໍ່ສ້າງສວນສາທາລະນະມິດຕະພາບ ລາວ-ຫວຽດນາມ ຈັດຂຶ້ນຢ່າງເປັນທາງການ ໃນວັນທີ 10 ມັງກອນ 2025 ຢູ່ບ້ານດ່ານຊ້າງ ເມືອງໄຊທານີ ນະຄອນຫລວງວຽງຈັນ ສປປ ລາວ, ໃຫ້ກຽດເຂົ້າຮ່ວມຂອງ ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຟ້າມ ມິງ ຈິງ ກໍາມະການກົມການເມືອງສຸນກາງພັກ, ນາຍົກລັດຖະມົນຕີ ແຫ່ງ ສສ ຫວຽດນາມ, ມີບັນດາສະຫາຍການນໍາຂັ້ນສູງ ແລະ ພາກສ່ວນກ່ຽວຂ້ອງ ຂອງສອງຝ່າຍ ລາວ-ຫວຽດນາມ ເຂົ້າຮ່ວມ.

ໃນໂອກາດນີ້, ສະຫາຍ ທອງສະລິດ ມັງໜໍ່ເມກ ເລຂາທິການສູນກາງພັກ, ເລຂາຄະນະພັກ, ຫົວໜ້າຫ້ອງວ່າການສູນກາງພັກ ໄດ້ມີຄໍາເຫັນໃນພິທີ ໂດຍໄດ້ຍົກໃຫ້ເຫັນເຖິງ ຄວາມໝາຍຄວາມສໍາຄັນ, ປະຫວັດຄວາມເປັນມາ ແລະ ຈຸດປະສົງຂອງໂຄງການ ກໍ່ສ້າງສວນສາທາລະນະມິດຕະພາບ ລາວ-ຫວຽດນາມ ແຫ່ງນີ້ ເຊິ່ງປະຕິບັດຕາມການຕົກລົງຂອງສອງພັກ, ສອງລັດຖະບານ ແລະ ກົມການເມືອງຂອງສອງປະເທດ ລາວ-ຫວຽດນາມ ວ່າດ້ວຍການກໍ່ສ້າງສວນສາທາລະນະມິດຕະພາບ ລາວ-ຫວຽດນາມ ຢູ່ ສປປ ລາວ ເພື່ອເປັນສັນຍາລັກ ແຫ່ງຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນານ.

ໂຄງການກໍ່ສ້າງສວນສາທາລະນະມິດຕະພາບ ລາວ-ຫວຽດນາມ ແຫ່ງນີ້ ເປັນໂຄງການໜຶ່ງທີ່ມີຄວາມໝາຍສໍາຄັນທາງດ້ານປະຫວັດສາດ-ການເມືອງ ຢ່າງເລິກເຊິ່ງ, ເປັນສັນຍາລັກແຫ່ງການພົວພັນ ມິດຕະພາບແບບພິເສດ ແລະ ຍິ່ງໃຫຍ່ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ. ໂຄງການດັ່ງກ່າວ, ມີເນື້ອທີ່ທັງໝົດ 3 ເຮັກຕາ ໂດຍຈະມີຮູບປັ້ນຂອງ ປະທານ ໄກສອນ ພົມວິຫານ, ປະທານ ສຸພານຸວົງ ແລະ ປະທານ ໂຮ່ຈີ່ມິງ ຕັ້ງຢູ່ເທິງແທ່ນຫີນອ່ອນ, ທັງສອງຂ້າງ ແລະ ເບື້ອງຫລັງຝາແກະສະຫລັກຮູບພາບ ທີ່ສະແດງເຖິງວັດທະນະທໍາ, ການດໍາລົງຊີວິດ ແລະ ການຮ່ວມສໍາພັນສູ້ຮົບທີ່ໂດດເດັ່ນຫາຍາກ ຂອງປະຊາຊົນສອງ ຊາດ ລາວ-ຫວຽດນາມ ຢ່າງອົງອາດກ້າຫານ ແລະ ສວຍສົດງົດງາມທີ່ສຸດ. ນອກນັ້ນ, ໃນເນື້ອທີ່ 3 ເຮັກຕາ ຍັງຈະມີອາຄານບໍລິຫານ, ສະຖານທີ່ຕ້ອນຮັບແຂກ, ຫ້ອງນໍ້າສາທາລະນະ, ອ່າງນໍ້າຕົກ, ສະຖານທີ່ພັກຜ່ອນ, ສະໜາມຫລິ້ນເດັກນ້ອຍ ແລະ ປະດັບປະດາເຕັມໄປດ້ວຍດອກໄມ້, ຕົ້ນໄມ້ ທີ່ຂຽວງາມທົ່ວທັງສວນ.

ພາຍຫລັງກໍ່ສ້າງສໍາເລັດ ສວນແຫ່ງນີ້ຈະກາຍເປັນໜຶ່ງ ໃນສວນສາທາລະນະ ທີ່ຂຽວສົດງົດງາມທີ່ສຸດ ຂອງນະຄອນຫລວງວຽງຈັນ, ເປັນບ່ອນຈັດກິດຈະກໍາຕ່າງໆ, ໃຫ້ປະຊາຊົນໄດ້ມາພັກຜ່ອນ, ອອກກໍາລັງກາຍ, ພ້ອມທັງໄດ້ຮຽນຮູ້ເຖິງມູນເຊື້ອ ປະຫວັດສາດການພົວພັນຮ່ວມມື, ຄວາມສາມັກຄີພິເສດ ແລະ ຍິ່ງໃຫຍ່ ຂອງສອງຊາດ ລາວ-ຫວຽດນາມ. ພ້ອມກັນນັ້ນ, ສວນແຫ່ງນີ້ ຍັງຈະກາຍເປັນອີກໜຶ່ງສັນຍາ ລັກອັນສໍາຄັນປະກອບສ່ວນເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ສວຍສົດງົດງາມຕະຫລອດກາລະນານ.

ກ່ອນໜ້ານີ້, ໃນປີ 2022 ໄດ້ມີພິທີເປີດສະໜາມຢ່າງເປັນທາງການ ເພື່ອກໍານົດຈຸດທີ່ຕັ້ງຂອງໂຄງການ ແລະ ດໍາເນີນການແຂ່ງຂັນ ອອກແບບສະຖາປັດຕະຍະກໍາ, ຄັດເລືອກບໍລິສັດຮັບເໝົາ, ຈາກນັ້ນ ຈຶ່ງໄດ້ຂໍຄວາມເຫັນນໍາການນໍາ ຂອງທັງສອງປະເທດ ເພື່ອເອກະພາບແບບແຜນຜັງລວມ ແລະ ແບບສະຖາປັດຕະຍະກໍາ ຂອງສວນເນື່ອງຈາກສ່ວນດັ່ງກ່າວ, ມີຄວາມໝາຍສໍາຄັນທາງປະຫວັດສາດ, ການເມືອງ ແລະ ເປັນຂອງຂວັນຂອງສູນກາງພັກ, ລັດຖະບານ ແລະ ປະຊາຊົນຫວຽດນາມ ມອບໃຫ້ ສປປ ລາວ ເພື່ອເປັນສັນຍາລັກຂອງ ການພົວພັນຮ່ວມມືຂອງສອງປະເທດ ຈຶ່ງເຮັດໃຫ້ຂັ້ນຕອນໃນການອອກແບບ ແລະ ຜ່ານແບບ ແຕ່ລະຂັ້ນຕອນໃຊ້ເວລາດົນພໍສົມຄວນ.

ພາບ: ອ່າຍຄຳ

KPL