ຂປລ
ໃນວັນທີ 13 ກັນຍາ 2026 ນີ້, ຄະນະຜູ້ແທນສາກົນ ທີ່ເດີນທາງມາຮ່ວມກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 (The 3rd Review Conference of Convention on Cluster Munitions) ທີ່ ສປປ ລາວ ເປັນເຈົ້າພາບໃນລະຫວ່າງວັນທີ 14-18 ກັນຍາ 2026 ນີ້, ໄດ້ໄປຢ້ຽມຢາມສະໜາມກວດກູ້ລະເບີດບໍ່ທັນແຕກ ຊຶ່ງຢູ່ພາຍໃຕ້ເຂດຮັບຜິດຊອບຂອງໂຄງການເກັບກູ້ລະເບີດແຫ່ງຊາດ ຢູ່ບ້ານພິກໃຫຍ່ ນະຄອນຫຼວງພະບາງ, ນຳພາໂດຍ ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ, ຮອງປະທານຜູ້ປະຈຳການ ຄະນະກຳມະການແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ (ຄຊກລ), ມີຜູ້ແທນຫຼາຍກວ່າ 270 ທ່ານ ທີ່ເດີນທາງມາຈາກ 120 ກວ່າປະເທດ ແລະ ອົງການຈັດຕັ້ງສາກົນ ເຂົ້າຮ່ວມ.
ຄະນະຜູ້ແທນທີ່ມາຢ້ຽມຢາມສະໜາມກວດກູ້ລະເບີດຄັ້ງນີ້, ໄດ້ຮັບການຕ້ອນຮັບຈາກ ທ່ານ ບຸນເຫຼືອ ສິນໄຊວໍຣະວົງ ປະທານຄະນະກຳມະການປົກຄອງແຂວງຫຼວງພະບາງ ແລະ ໄດ້ຮັບຟັງການລາຍງານ ຈາກຜູ້ອຳນວຍການໂຄງການເກັບກູ້ລະເບີດແຫ່ງຊາດ ແລະ ຜູ້ຄຸ້ມຄອງພາກສະໜາມ ກ່ຽວກັບການຈັດຕັ້ງປະຕິບັດວຽກງານສຳຫຼວດ-ກວດກູ້ລະເບີດບໍ່ທັນແຕກ (ລບຕ) ຢູ່ແຂວງຫຼວງພະບາງ, ລວມທັງຂໍ້ມູນສະຖິຕິການຕົກຄ້າງຂອງ ລບຕ, ຜົນສຳເລັດໃນໄລຍະຜ່ານມາ, ສິ່ງທ້າທາຍ ແລະ ແຜນການຈັດຕັ້ງປະຕິບັດວຽກງານສຳຫຼວດ-ກວດກູ້ ລບຕ ໃນຕໍ່ໜ້າ ຊຶ່ງແຂວງຫຼວງພະບາງ ເປັນໜຶ່ງໃນບັນດາແຂວງທີ່ໄດ້ຮັບຜົນກະທົບໜັກໜ່ວງ ຈາກລະເບີດບໍ່ທັນແຕກຕົກຄ້າງແຕ່ປາງສົງຄາມ ໃນນັ້ນ ບ້ານພິກໃຫຍ່ ເປັນບ້ານໜຶ່ງທີ່ໄດ້ຮັບຜົນກະທົບສູງ. ອີງຕາມການສຳຫຼວດດ້ານວິຊາການ ນັບແຕ່ປີ 2016 ພື້ນທີ່ສຳຫຼວດກວມເອົາເນື້ອທີ່ທັງໝົດ 423 ເຮັກຕາ. ໃນນັ້ນ, ສາມາດກຳນົດເປັນພື້ນທີ່ທີ່ໄດ້ຮັບການຢືນຢັນມີຄວາມອັນຕະລາຍຈາກ ລບຕ (ຫຼື CHA) 347,2 ເຮັກຕາ. ການກວດກູ້ພື້ນທີ່ຜ່ານມາມີຈຳນວນ 119,73 ເຮັກຕາ, ໃນນັ້ນ ພື້ນທີ່ກະສິກຳກວມເອົາ 117,3 ເຮັກຕາ ແລະ ພື້ນທີ່ພັດທະນາອື່ນໆ 2,39 ເຮັກຕາ, ໄດ້ພົບເຫັນ ແລະ ທຳລາຍລະເບີດທັງໝົດ 3.461 ໜ່ວຍ, ໃນນັ້ນ ມີລູກບົ່ມໃຫຍ່ 2 ໜ່ວຍ, ລະເບີດລູກຫວ່ານ 2.775 ໜ່ວຍ ແລະ ສຳພະວຸດອື່ນໆ 684 ໜ່ວຍ.
ບ້ານພິກໃຫຍ່ ຕັ້ງຢູ່ຫ່າງຈາກໃຈກາງ ນະຄອນຫຼວງພະບາງ ພຽງແຕ່ 17 ກິໂລແມັດ, ການດຳລົງຊີວິດຂອງປະຊາຊົນສ່ວນໃຫຍ່ ແມ່ນອີງໃສ່ກະສິກຳ. ສະນັ້ນ, ການມອບເນື້ອທີ່ດິນທີ່ປອດໄພຈາກລະເບີດບໍ່ທັນແຕກ ແມ່ນຊ່ວຍໃຫ້ຊຸມຊົນສາມາດສ້າງພື້ນຖານເສດຖະກິດ ແລະ ສ້າງລາຍຮັບເພື່ອລ້ຽງຊີບໄດ້ຢ່າງຍືນຍົງ, ສາມາດພັດທະນາເນື້ອທີ່ດິນເພື່ອຂະຫຍາຍການຜະລິດ ເປັນຕົ້ນ ເຮັດນາ, ປູກພືດຜັກ, ໝາກໄມ້ ແລະ ລ້ຽງສັດ, ຫັນຈາກການຜະລິດແບບກຸ້ມກິນ ໄປສູ່ການຜະລິດເປັນສິນຄ້າເທື່ອລະກ້າວ ພ້ອມທັງພັດທະນາເຂດທ່ອງທ່ຽວໃຫ້ມີຄວາມປອດໄພ.
ໃນຖານະເປັນໜຶ່ງໃນບັນດາປະເທດທີ່ໄດ້ຮັບຜົນກະທົບຫຼາຍກວ່າໝູ່ຈາກລະເບີດລູກຫວ່ານ, ສປປ ລາວ ໄດ້ມີສ່ວນຮ່ວມຢ່າງຕັ້ງໜ້າໃນຂະບວນການຮ່າງ ແລະ ຮັບຮອງເອົາສົນທິສັນຍາສາກົນ ວ່າດ້ວຍການຕ້ານລະເບີດລູກຫວ່ານ. ເພື່ອໃຫ້ການຈັດຕັ້ງປະຕິບັດສົນທິສັນຍາສາກົນນີ້ ໃຫ້ບັນລຸຜົນສຳເລັດຕາມເປົ້າໝາຍ, ລັດຖະບານລາວ ໄດ້ເຊື່ອມສານບັນດາເປົ້າໝາຍຂອງສົນທິສັນຍາສາກົນ ເຂົ້າໃນແຜນຍຸດທະສາດແຫ່ງຊາດ ຫຼື ເອີ້ນວ່າ ເສັ້ນທາງກ້າວສູ່ຄວາມປອດໄພ ສະບັບທີ III (Safe Path Forward III) ໄລຍະແຕ່ 2021-2030 ແລະ ຮັບຮອງເອົາເປົ້າໝາຍການພັດທະນາແບບຍືນຍົງ (SDG) ເປົ້າໝາຍທີ 18: “ຊີວິດທີ່ປອດໄພຈາກລະເບີດບໍ່ທັນແຕກ”.
ໃນໂອກາດຢ້ຽມຢາມພາກສະໜາມດັ່ງກ່າວ, ຄະນະຜູ້ແທນສາກົນ ຍັງໄດ້ຮັບຊົມການທຳລາຍລູກລະເບີດບໍ່ທັນແຕກທີ່ຕົກຄ້າງ ທີ່ກວດຄົ້ນໄດ້ຈຳນວນໜຶ່ງ, ພ້ອມທັງຢ້ຽມຊົມສູນຂໍ້ມູນຂ່າວສານຂອງໂຄງການເກັບກູ້ລະເບີດແຫ່ງຊາດ ຕື່ມອີກ.
KPL
