*ການກໍ່ສ້າງຂອງໂຄງການປັບປຸງ ແລະ ພັດທະນາພື້ນຖານໂຄງລ່າງສິ່ງອຳນວຍຄວາມສະດວກ ຢູ່ສະຖານທີ່ທ່ອງທ່ຽວເຂດອ່າງນ້ຳງື່ມ 1 ມາຮອດປະຈຸບັນແມ່ນໄດ້ສຳເລັດການກໍ່ສ້າງແລ້ວ 100% ແລະ ພວມກະກຽມພິທີເປີດນຳໃຊ້ຢ່າງເປັນທາງການ ໃນວັນທີ 3 ທັນວາ 2024 ທີ່ຈະມາເຖິງນີ້.

       ທ່ານ ດາວເຮືອງ ນັນທະວົງ ຮອງເຈົ້າແຂວງວຽງຈັນ ໄດ້ໃຫ້ສຳພາດ ໃນວັນທີ 28 ພະຈິກ 2024 ນີ້ວ່າ: ການກໍ່ສ້າງຂອງໂຄງການປັບປຸງ ແລະ ພັດທະນາພື້ນຖານໂຄງລ່າງສິ່ງອຳນວຍຄວາມສະດວກ ຢູ່ສະຖານທີ່ທ່ອງທ່ຽວເຂດອ່າງນ້ຳງື່ມ 1 ມາຮອດປະຈຸບັນແມ່ນໄດ້ສຳເລັດການກໍ່ສ້າງແລ້ວ 100% ມາຮອດປະຈຸນບັນແມ່ນໄດ້ມີການກະກຽມພິທີມອບ-ຮັບ ແລະ ເປີດນຳໃຊ້ຢ່າງເປັນທາງການ ໃນວັນທີ 3 ທັນວາ 2024 ທີ່ຈະມາເຖິງນີ້. ສຳລັບການກະກຽມງານເປີດງານແມ່ນໄດ້ປະສານສົມທົບກັບຄະນະກຳມະການຂັ້ນແຂວງ ຂໍອະນຸມັດຂໍ້ຕົກລົງວ່າດ້ວຍການແຕ່ງຕັ້ງຄະນຮັບຜິດຊອບການກະກຽມພິທີມອບ-ຮັບ ແລະ ເປີດການນຳໃຊ້ສະຖານທີ່ທ່ອງທ່ຽວໜ້າເຂື່ອນນ້ຳງື່ມ 1 ແລະ ພາຍໃນງານມີການຈະມີການສະແດງສິລະປະວັນນະຄະດີ, ວາງສະແດງສິນຄ້າ, ການບໍລິການທ່ອງທ່ຽວທ່ອງທ່ຽວ ແລະ ສິນຄ້າ ໂອດ໊ອບ ຄາດວ່າຈະມີແຂກທີ່ຖືກເຊີນນັບແຕກຂັ້ນສູນກາງຮອດທ້ອງຖິ່ນ ນັບທັງພາກລັດ ແລະ ພາກທຸລະກິດ ເຂົ້າຮ່ວມປະມານ 400 ກວ່າຄົນ.

       ທ່ານຮອງເຈົ້າແຂວງກ່າວອີກວ່າ: ສຳລັບການບໍລິຫານຈັດການໃນສະເພາະໜ້າ ແລະ ຍາວນານ ການນຳແຂວງວຽງຈັນ ໄດ້ອະນຸມັດຂໍ້ຕົກລົງວ່າດ້ວຍການຄຸ້ມຄອງການທ່ອງທ່ຽວທາງນ້ຳ ຢູ່ແຂວງວຽງຈັນ ສະບັບເລກທີ 2674/ຈຂ.ວຈ, ລົງວັນທີ 12 ພະຈິກ 2024 ແລະ ໄດ້ສ້າງມາດຕະຖານການບໍລິການເຮືອນຳທ່ຽວຢູ່ເຂື້ອນນ້ຳງື່ມ 1 ພ້ອມທັງປະເມີນມາດຕະຖານການບໍລິການເຮືອນຳທ່ຽວຮອບທີ 1 ແລະ ຮອບທີ 2 ຄະນະຮັບຜິດຊອບໂຄງການ ໄດ້ສຸ່ມໃສ່ວາງໜ້າວຽກດັ່ງນີ້: ປະດັບປະດາອານາໄມເສັ້ນທາງ, ອານຄານຮ້ານຄ້າ, ສະຖານທີ່ສາທາລະນະໃຫ້ສະອາດຈົບງາມ; ຈັດສັນແບ່ງໂຊນຮ້ານຄ້າຕາມແຕ່ລະປະເພດສິນຄ້າ ເຊັ່ນ: ອາຄານ A: ຂາຍຜະລິດຕະພັນປາ, ອາຄານ B: ຂາຍເຄື່ອງທີ່ລະນຶກ; ອາຄານ C: ຮ້ານຂາຍເຄື່ອງດື່ມ, ອາຄານ D: ຮ້ານອາຫານ, ອາຄານ E: ຮ້ານວາງສະແດງສິນຄ້າ ແລະ ອື່ນໆ ປະຈຸບັນມີຜູ້ປະກອບການຮ້ານຄ້າ, ຮ້ານອາຫານ-ເຄື່ອງດື່ມ ແລະ ຮ້ານຂາຍເຄື່ອງທີ່ລະນຶກ ຈໍານວນ 32 ຫົວໜ່ວຍ.

     ພ້ອມນີ້ໄດ້ການຝຶກອົບຮົມ ໃຫ້ແກ່ປະຊາຊົນປະຜູ້ປະກອບການໃນຫລາຍຫົວຂໍ້ເຊັ່ນ: ການສ້າງແຜນດຳເນີນທຸລະກິດ;  ການນຳໃຊ້ພື້ນທີ່ທຸລະກິດ ແລະ ຮ້ານຄ້າໃຫ້ເກີດປະໂຫຍດສູງສຸດ; ການນຳໃຊ້ພາຊະນະໃສ່ອາຫານ ແລະ ເຄື່ອງດື່ມທີ່ເໝາະສົມ; ການຮັກສາຫລັກສຸຂະອານາໄມ ແລະ ການທຳຄວາມສະອາດຮ້ານຄ້າ, ຮ້ານອາຫານ, ສະຖານທີ່ທ່ອງທ່ຽວ; ໄດ້ກວດກາມາດຕະຖານເຮືອນໍາທ່ຽວ, ປະກອບຖັງບັນຈຸສິ່ງປະຕິກູນໃຫ້ກັບເຮືອນຳທ່ຽວທຸກລໍາ; ຝຶກອົບຮົມພະນັກງານຂັບເຮືອ, ພະນັກງານຕ້ອນຮັບແຂກ; ຊຸກຍູ້ຜູ້ປະກອບການເຮືອອານາໄມທາສີຕົບແຕ່ງສ້ອມແປງເຮືອຂອງຕົນໃຫ້ມີຄວາມສະອາດ ມີເຮືອນໍາທ່ຽວພ້ອມທີ່ຈະບໍລິການທັງໝົດ 35 ລຳ, ຈັດກອງປະຊຸມປຶກສາຫາລືກັບພາກສ່ວນທີ່ກ່ຽວຂ້ອງ ເພື່ອສ້າງຄວາມເປັນເອກະພາບກ່ຽວກັບການບໍລິຫານຄຸ້ມຄອງຊົ່ວຄາວສຳລັບສະຖານທີ່ທ່ອງທ່ຽວເຂດໜ້າເຂື່ອນນໍ້າງື່ມ 1 ໂດຍມອບໃຫ້ກຸ່ມເຮືອນໍາທ່ຽວເປັນຜູ້ບໍລິຫານຄຸ້ມຄອງ ເປັນການຊົ່ວຄາວຊຶ່ງຕາມແຜນແມ່ນຈະໄດ້ຈັດຫາບໍລິສັດທີ່ມີປະສົບການມາບໍລິຫານໃນຕໍ່ໜ້າ.

         ທ່ານ ຄຳຟອງ ພັນປະດິດ ປະທານບໍລິສັດຄຳຟອງກຣຸບ ຈຳກັດຜູ້ດຽວ ໃນນາມຜູ້ຮັບເໝົາກໍ່ສ້າງ ກ່າວວ່າ: ໂຄງການດັ່ງກ່າວເລີ່ມລົງມືກໍ່ສ້າງມາແຕ່ວັນທີ 1 ກໍລະກົດ 2021 ລວມເປັນມູນຄ່າທັງໝົດໃນສັນຍາ 5.330.799 ໂດລາສະຫະລັດ ມາຮອດປະຈຸບັນແມ່ນສຳເລັດ 100% ແລະ ຈະມີພິທີມອບ-ຮັບ ຢ່າງເປັນທາງການ ໃນວັນທີ 3 ທັນວາ 2024ນີ້.