ຂປລ
ໃນວັນທີ 9 ຕຸລາ 2026 ນ້ີ, ສະຫາຍ ສະເຫລີມໄຊ ກົມມະສິດ ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ສະຫາຍ ເລ ມິງ ຮຶງ ນາຍົກລັດຖະມົນຕີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍຄະນະຜູ້ແທນຂ້ັນສູງ ໄດ້ເຂ້ົາວາງກະຕ່າ ດອກໄມ້ຢູ່ຕໍ່ໜ້າຮູບປັ້ນຂອງ ຜູ້ນຳທີ່ເຄົາລົບຮັກຂອງທັງສອງປະເທດ ຢູ່ສວນສາທາລະນະມິດຕະພາບ ລາວ-ຫວຽດນາມ ບ້ານດ່ານຊ້າງ ເມືອງໄຊທານີ ນະຄອນຫລວງວຽງຈັນ.
ຂປລ. ໃນໂອກາດທີ່ນາຍົກລັດຖະມົນຕີ ສສ ຫວຽດນາມເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນວັນທີ 8-9 ຕຸລາ 2026 ເພ່ືອສືບຕ່ໍເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລາວ-ຫວຽດນາມ, ຫວຽດນາມ- ລາວ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ການວາງກະຕ່າດອກໄມ້ໃນຄັ້ງນີ້, ເປັນການສະແດງຄວາມຮູ້ບຸນຄຸນ ແລະ ລະນຶກເຖິງຄຸນງາມຄວາມດີ, ຜົນງານ ແລະ ວິລະກຳອັນຍິ່ງໃຫຍ່ຂອງບັນດາຜູ້ນຳທີ່ເຄົາລົບຮັກຂອງທັງສອງປະເທດຜູ້ທີ່ໄດ້ອຸທິດຊີວິດ ແລະ ສະຕິປັນຍາ ເພ່ືອພາລະກິດການປົດປ່ອຍຊາດ, ການສ້າງສັນສັນຕິພາບ, ເອກະລາດ ແລະ ຄວາມຜາສຸກຂອງປະຊາຊົນ.
ໃນໂອກາດນ້ີ, ສອງນາຍົກລັດຖະມົນຕີ ລາວ-ຫວຽດນາມ ຍັງໄດ້ຮ່ວມກັນປູກຕົ້ນໄມ້ຢູ່ສວນສາທາລະນະ ດັ່ງກ່າວຕື່ມອີກ ຊຶ່ງສວນສາທາລະນະມິດຕະພາບ ລາວ- ຫວຽດນາມ ເປັນໂຄງການທີ່ມີຄວາມໝາຍສຳຄັນພິເສດພາຍໃຕ້ການຊີ້ນໍາໂດຍກົງຂອງສອງກົມ ການເມືອງສູນກາງພັກ ລາວ- ຫວຽດນາມ, ເປັນໂຄງການທີ່ມີຄວາມໝາຍທາງປະຫວັດສາດ- ການເມືອງຢ່າງເລິກເຊິ່ງລະຫວ່າງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ເປັນສັນຍະລັກແຫ່ງການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການພົວພັນຮ່ວມມືຮອບດ້ານ ແລະ ຫຸ້ນສ່ວນຍຸດທະສາດຂອງສອງຊາດ.
ໂຄງການດັ່ງກ່າວ, ມີເນື້ອທີ່ທັງໝົດ 3 ເຮັກຕາ, ເປັນບ່ອນພັກຜ່ອນ, ອອກກໍາລັງກາຍ, ທ່ອງທ່ຽວທາງດ້ານວັດທະນະທຳ, ເປັນສະຖານທ່ີສຶກສາ, ຮໍ່າຮຽນຂອງປະຊາຊົນລາວ ໂດຍສະເພາະແມ່ນຂອງຊາວນະຄອນຫລວງວຽງຈັນ ໄດ້ເຂ້ົາມາທັດສະນະສຶກສາ, ຄົ້ນຄວ້າ, ເຄື່ອນໄຫວກິດຈະກໍາເສີມຂະຫຍາຍມູນເຊື້ອອັນດີງາມຂອງສອງພັກ- ສອງລັດ ແລະ ປະຊາຊົນສອງຊາດ ລາວ-ຫວຽດນາມ.
ໃນວັນດຽວກັນ, ສະຫາຍ ເລ ມິງ ຮຶງ ພ້ອມດ້ວຍຄະນະຍັງໄດ້ໄປຢ້ຽມຢາມຖາມຂ່າວຄອບຄົວ ຂອງທ່ານ ໄຊສົມພອນ ພົມວິຫານ, ພ້ອມທັງຢ້ຽມຢາມບໍລິສັດສະຕາໂທລະຄົມ ຈຳກັດ. ພ້ອມນ້ີ ຍັງໄດ້ເດີນທາງໄປຢ້ຽມຢາມສະຖານທູດຫວຽດນາມ ປະຈຳລາວ ເພື່ອພົບປະກັບພະນັກງານພາຍໃນສະຖານທູດ ແລະ ຊາວຫວຽດນາມ ທີ່ດຳລົງຊີວິດຢູ່ ສປປ ລາວ ຕື່ມອີກ.
ຂ່າວ: ທະນູທອງ
KPL
