ຂປລ
ຫ້ອງວ່າການສູນກາງພັກ ຈັດເຜີຍແຜ່ເຊື່ອມຊຶມເນື້ອໃນມະຕິຂອງຄະນະບໍລິຫານງານສູນກາງພັກ ສະບັບເລກທີ 67/ຄບສພ, ລົງວັນທີ 20 ສິງຫາ 2026 ວ່າດ້ວຍການເພ່ີມທະວີການສະກັດກ້ັນ, ຕ້ານ ແລະ ແກ້ໄຂພະຍາດອາດຍາສິດ, ການສໍ້ລາດບັງຫລວງ, ປະກົດການຫຍໍ້ທໍ້ໃນກົງຈັກການຈັດຕັ້ງພັກ-ລັດ ແລະ ສັງຄົມ; ເອກະສານການແກ້ໄຂຄໍາຮ້ອງຟ້ອງ ແລະ ຄໍາສະເໜີໃຫ້ພະນັກງານ-ລັດຖະກອນ ໃນຕອນເຊົ້າວັນທີ 5 ຕຸລາ 2026.
ຂປລ. ໂດຍການເຜີຍແຜ່ເອກະສານຂອງ ທ່ານ ຜາຄໍາ ອິນແສງ ກໍາມະການສູນກາງພັກ, ຄະນະປະຈໍາພັກ, ຮອງຫົວໜ້າຫ້ອງວ່າການສູນກາງພັກ, ມີຄະນະພັກ-ຄະນະຫ້ອງ, ຄະນະກົມ, ຄະນະພະແນກ ແລະ ພະນັກງານ- ລັດຖະກອນພາຍໃນຫ້ອງວ່າການສູນກາງພັກເຂົ້າຮ່ວມ.
ຈຸດປະສົງໃນການເຜີຍແຜ່ເຊື່ອມຊຶມທັງສອງເອກະສານໃນຄັ້ງນ້ີ ເພື່ອສ້າງຄວາມຮັບຮູ້ເຂົ້າໃຈຢ່າງຖືກຕ້ອງ, ເລິກເຊ່ິງ ແລະ ເປັນເອກະພາບສູງພາຍໃນຄະນະພັກ, ສະມາຊິກພັກ, ພະນັກງານ-ລັດຖະກອນທຸກຂັ້ນກ່ຽວກັບຄວາມສໍາຄັນຂອງວຽກງານສະກັດກັ້ນ ແລະ ຕ້ານການສໍ້ລາດບັງຫລວງໃນໄລຍະໃໝ່; ສ້າງຄວາມເປັນເອກະພາບທາງດ້ານແນວຄິດ, ການກະທໍາ ແລະ ຍົກສູງຄວາມຮັບຜິດຊອບການເມືອງຂອງຄະນະພັກ, ຄະນະກວດກາຕໍ່ກັບວຽກງານສະກັດກັ້ນ, ຕ້ານ ແລະ ແກ້ໄຂພະຍາດອາດຍາສິດ, ການສໍ້ລາດບັງຫລວງ, ປະກົດການຫຍໍ້ທໍ້, ການຟຸມເຟືອຍ; ຫັນເອົາເນື້ອໃນຈິດໃຈຂອງເອກະສານດັ່ງກ່າວໃຫ້ເປັນທິດທາງ, ແຜນການດໍາເນີນງານຕົວຈິງຂອງຄະນະພັກຫ້ອງວ່າການສູນກາງພັກຢ່າງມີຈຸດສຸມ, ພ້ອມທັງເປັນເຈົ້າການນໍາພາ-ຊີ້ນໍາຈັດຕັ້ງປະຕິບັດໃຫ້ມີປະສິດທິຜົນແນໃສ່ຍົກສູງປະສິດທິພາບການເຄື່ອນໄຫວວຽກງານກວດກາໃຫ້ເດັດຂາດ, ເຂັ້ມງວດໃນການແກ້ໄຂທຸກການລະເມີດລະບຽບວິໄນຂອງພັກ, ກົດໝາຍ ແລະ ລະບຽບການຂອງລັດ ໃນຖັນແຖວສະມາຊິກພັກ, ພະນັກງານ-ລັດຖະກອນ ຫສພ ໂດຍຖືເອົາການສະກັດກ້ັນແຕ່ຫົວທີເປັນຕົ້ນຕໍ ແລະ ເປັນບັນຫາພື້ນຖານຍາວນານ, ເອົາການຕ້ານ ແລະ ການແກ້ໄຂ ເປັນບັນຫາຈໍາເປັນທີ່ຕ້ອງໄດ້ປະຕິບັດຢ່າງເຂັ້ມງວດ.
ໃນໂອກາດນີ້, ທ່ານ ຜາຄໍາ ອິນແສງ ກໍາມະການສູນກາງພັກ, ຄະນະປະຈໍາພັກ, ຮອງຫົວໜ້າຫ້ອງວ່າການສູນກາງພັກ, ໄດ້ຮຽກຮ້ອງມາຍັງບັນດາພະນັກງານ-ລັດຖະກອນພາຍໃນຫ້ອງວ່າການສູນກາງພັກ ໂດຍສະເພາະກົມກວດກາຈົ່ງພ້ອມກັນນໍາເອົາແນວທາງ ແລະ ເນ້ືອໃນຈິດໃຈຂອງເອກະສານຜັນຂະຫຍາຍເຂົ້າໃນວຽກງານຕົວຈິງ; ເອົາໃຈໃສ່ຕິດຕາມ, ຊຸກຍູ້ ແລະ ກວດກາສ້າງບາດກ້າວບຸກທະລຸທ່ີໂປ່ງໃສໃນວຽກງານນໍາພາທ່ີເຂ້ັມແຂງຂອງພັກ, ການຄຸ້ມຄອງ-ບໍລິຫານທີ່ສັກສິດຂອງລັດ.
ພາບ: ຂັນໄຊ
KPL
