ຂປລ. ໃຫ້ກຽດເປັນປະທານຮ່ວມຂອງທ່ານ ສະເຫລີມໄຊ ກົມມະສິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ເລ ມິງ ຮຶງ ນາຍົກລັດຖະມົນຕີ ແຫ່ງ ສສ ຫວຽດນາມ, ມີບັນດາການນຳພັກ, ລັດ, ນັກທຸລະກິດ, ຜູ້ປະກອບການທັງພາກລັດ ແລະ ເອກະຊົນຂອງທັງສອງປະເທດເຂົ້າຮ່ວມ. ກອງປະຊຸມຄັ້ງນີ້ຖືເປັນເວທີແຫ່ງການເສີມຂະຫຍາຍສາຍພົວພັນ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ໂດຍສະເພາະແມ່ນການສະເຫລີມສະຫລອງວັນສ້າງຕ້ັງສາຍພົວພັນການທູດ ລາວ- ຫວຽດນາມ ຄົບຮອບ 65 ປີ, ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 50 ປີ ແລະ ປະກອບສ່ວນໃຫ້ແກ່ການກະກຽມການສະຫລອງປີສາມັກຄີມິດຕະພາບ ລາວ- ຫວຽດນາມ ໃນປີ 2027 ທີ່ຈະມາເຖິງນີ້ໃຫ້ມີເນື້ອໃນຄວາມໝາຍເລິກເຊິ່ງ ແລະ ສົມກຽດ.

    ໃນກອງປະຊຸມໄດ້ເປີດໂອກາດໃຫ້ສະພາການຄ້າ ແລະ ອຸດສາຫະກໍາແຫ່ງຊາດລາວ, ສະມາຄົມນັກທຸລະກິດຫວຽດນາມປະຈຳລາວ, ວິສາຫະກິດລາວ ແລະ ຫວຽດນາມ ໄດ້ລາຍງານກ່ຽວກັບສະພາບການລົງທຶນຂອງຕົນເອງ ແລະ ຂໍສະເໜີຕ່າງໆ ເຊິ່ງໂດຍລວມວິສາຫະກິດຂອງທັງ 2 ປະເທດ ໄດ້ມີຄວາມເຊື່ອໝັ້ນສູງຕໍ່ນະໂຍບາຍຂອງພາກລັດໃນການສົ່ງເສີມການລົງທຶນຂອງເອກະຊົນເຮັດໃຫ້ທຸລະກິດ ມີການຂະຫຍາຍຕົວຢ່າງຕໍ່ເນື່ອງ ແລະ ສະເໜີຂໍໃຫ້ລັດຖະບານສືບຕ່ໍປັບປຸງບັນດາຂອດຂັ້ນ ແລະ ກົນໄກຂອງພາກລັດທ່ີກ່ຽວຂ້ອງກັບການດຳເນີນທຸລະກິດ ແລະ ການລົງທຶນໃຫ້ມີຄວາມສະດວກ ແລະ ວ່ອງໄວຂຶ້ນກວ່າເກົ່າ. 

     ໃນໂອກາດນ້ີ, ທ່ານ ສະເຫລີມໄຊ ກົມມະສິດ ໄດ້ມີຄຳເຫັນວ່າ: ລັດຖະບານ ສປປ ລາວ ໄດ້ຖືສຳຄັນການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ແລະ ໃຫ້ບູລິມະສິດສູງສຸດຕໍ່ການປັບປຸງສະພາບແວດລ້ອມການດຳເນີນທຸລະກິດ ແລະ ການລົງທຶນໃຫ້ດີຂຶ້ນ, ອັນພົ້ນເດັ່ນແມ່ນໄດ້ສ້າງຕັ້ງຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ເພື່ອເປັນເສນາທິການໃຫ້ແກ່ລັດຖະບານໃນການສົ່ງເສີມ ແລະ ຄຸ້ມຄອງການລົງທຶນຕາມທິດລວມສູນ ແລະ ປະຕູດຽວພາຍໃຕ້ການຊີ້ນຳໂດຍກົງຂອງທ່ານນາຍົກລັດຖະມົນຕີ. ທ່ານນາຍົກລັດຖະມົນຕີ ຍັງໄດ້ຍ້ອງຍໍຊົມເຊີຍຕໍ່ວິສາຫະກິດ ລາວ ແລະ ຫວຽດນາມ ທີ່ໄດ້ປະກອບສ່ວນສຳຄັນໃນການລົງທຶນເຂົ້າໃນບັນດາຂະແໜງການບູລິມະສິດເຮັດໃຫ້ມູນຄ່າການລົງທຶນ ຂອງພາກເອກະຊົນສາມາດບັນລຸເກີນແຜນທີ່ກຳນົດໄວ້. ສະເພາະ 9 ເດືອນ ປີ 2026 ລັດຖະບານໄດ້ອະນຸມັດການລົງທຶນໃນກິດຈະການຄວບຄຸມ ແລະ ສໍາປະທານ  45 ໂຄງການ,  ມູນຄ່າອະນຸມັດ 8,57 ຕື້ໂດລາສະຫະລັດ, ໃນນັ້ນການລົງທຶນຂອງ ສສ ຫວຽດນາມ ມີມູນຄ່າຫລາຍກວ່າໝູ່ (4,7 ຕ້ືໂດລາສະຫະລັດ). ເພ່ືອໃຫ້ການຮ່ວມມືເສດຖະກິດ, ການຄ້າ ແລະ ການລົງທຶນລະຫວ່າງສອງຊາດ ລາວ-ຫວຽດນາມ ສົມຄູ່ກັບການພົວພັນຮ່ວມມືທາງດ້ານການເມືອງ, ທ່ານ ເລ ມິງ ຮຶງ ໄດ້ຮຽກຮ້ອງໃຫ້ວິສາຫະກິດຫວຽດນາມ ຂະຫຍາຍການລົງທຶນຢູ່ໃນ ສປປ ລາວ ໃຫ້ລາຍຂ້ຶນໂດຍສະເພາະໃນບັນດາ  ຂະແໜງການບູລິມະສິດທີ່ 2 ລັດຖະບານຊຸກຍູ້ສ່ົງເສີມເປັນຕ້ົນຂະແໜງກະສິກຳທ່ີນຳໃຊ້ເຕັກໂນໂລຊີສູງ, ການປຸງແຕ່ງແຮ່ທາດ, ພະລັງງານສະອາດ, ທະນາຄານ- ການເງິນ,  ໂລຈິດສຕິກ,  ການທ່ອງທ່ຽວ, ການຫັນເປັນດີຈິຕອນ.  ພ້ອມທັງເຊີນຊວນວິສາຫະກິດ  ລາວໃຫ້ສຶກສາກາລະໂອກາດໃນການເຂົ້າມາລົງທຶນຢູ່ຫວຽດນາມ ໃຫ້ຫລາຍຂຶ້ນ.  

    ໃນໂອກາດດຽວກັນນີ້, ໄດ້ມີພິທີ ມອບ-ຮັບ ແລະ ແລກປ່ຽນເອກະສານວຽກງານລົງທຶນທັງໝົດ 18 ລາຍການ ຊຶ່ງເປັນສັນຍະລັກອັນເປັນຮູບປະທຳໃຫ້ແກ່ການເສີມຂະຫຍາຍການຮ່ວມມືດ້ານການລົງທຶນລະຫວ່າງ ສປປ ລາວ ແລະ ສສ ຫວຽດນາມ.

           ພາບ: ອ່າຍຄຳ

KPL