ຂປລ
ໃນຕອນບ່າຍວັນທີ 6 ຕຸລາ 2026, ທີ່ສໍານັກງານນາຍົກລັດຖະມົນຕີ, ທ່ານ ສະເຫລີມໄຊ ກົມມະສິດ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ຄຣອງຂະນິດ ຣັກຈະເລີນ ເອກອັກຄະລາຊະທູດ ແຫ່ງ ລາຊະອານາຈັກໄທ ປະຈຳ ສປປ ລາວ ທ່ີໄດ້ຕາງໜ້າໃຫ້ທ່ານນາຍົກລັດຖະມົນຕີ ກໍຄື ລັດຖະບານ ແຫ່ງ ລາຊະອານາຈັກໄທ ນຳເອົາກະຕ່າດອກໄມ້ ແລະ ຄຳອວຍພອນມາຍັງທ່ານ ສະເຫລີມໄຊ ກົມມະສິດ ທີ່ໄດ້ຮັບແຕ່ງຕັ້ງດຳລົງຕຳແໜ່ງນາຍົກລັດຖະມົນຕີ ແຫ່ງ ສປປ ລາວ.
ຂປລ. ໃນໂອກາດດັ່ງກ່າວ, ທ່ານ ນາງ ຄຣອງຂະນິດ ຣັກຈະເລີນ ໄດ້ກ່າວສະແດງຄວາມຍິນດີ ແລະ ຊົມເຊີຍ ມາຍັງທ່ານ ສະເຫລີມໄຊ ກົມມະສິດ ທ່ີໄດ້ຮັບຄວາມໄວ້ວາງໃຈຢ່າງສູງຈາກສະພາແຫ່ງຊາດ ແລະ ປະຊາຊົນລາວ ໃຫ້ດຳລົງຕຳແໜ່ງນາຍົກ ລັດຖະມົນຕີ, ພ້ອມທັງນຳເອົາສານອວຍພອນຈາກທ່ານນາຍົກລັດຖະມົນຕີ ແຫ່ງ ລາຊະອານາຈັກໄທ ເຖິງທ່ານ ສະເຫລີມໄຊ ກົມມະສິດ ໂດຍໄດ້ສະແດງຄວາມເຊື່ອໝັ້ນຢ່າງໜັກແໜ້ນວ່າດ້ວຍປະສົບການ ແລະ ຄວາມຮູ້ຄວາມສາມາດອັນສູງສ່ົງຂອງທ່ານນາຍົກລັດຖະມົນຕີ ຈະນຳພາການບໍລິຫານວຽກງານຂອງລັດຖະບານລາວ ໃຫ້ບັນລຸຜົນສຳເລັດຕາມຄາດໝາຍທີ່ກຳນົດໄວ້, ຄຽງຄູ່ກັບການສືບຕໍ່ເພີ່ມພູນຄູນສ້າງສາຍພົວພັນມິດຕະພາບ ແລະ ການເປັນຫຸ້ນສ່ວນຍຸດທະສາດ ເພື່ອການເຕີບໂຕ ແລະ ການພັດທະນາແບບຍືນຍົງລະຫວ່າງສອງປະເທດລາວ-ໄທ ນັບມື້ເກີດດອກອອກຜົນ ແລະ ຈະເລີນງອກງາມຍິ່ງໆຂຶ້ນ.
ທ່ານນາຍົກລັດຖະມົນຕີ ໄດ້ ກ່າວສະແດງຄວາມຂອບໃຈຕ່ໍຄໍາອວຍພອນອັນຈົບງາມຈາກລັດຖະບານ ແລະ ປະຊາຊົນໄທ, ພ້ອມທັງຕີລາຄາສູງຕໍ່ສາຍພົວພັນມິດຕະພາບຖານບ້ານໃກ້ເຮືອນຄຽງທີ່ມີຄວາມໃກ້ຊິດສະໜິດສະໜົມກັນມາຢ່າງຍາວນານ ໂດຍຢືນຢັນຄວາມໝາຍໝັ້ນຂອງລັດຖະບານລາວ ທ່ີຈະສືບຕໍ່ຮ່ວມມືຢ່າງໃກ້ຊິດກັບຝ່າຍໄທ ເພື່ອຊຸກຍູ້ການຈັດຕັ້ງປະຕິບັດບັນດາຂໍ້ຕົກລົງ ແລະ ໂຄງການຮ່ວມມືດ້ານເສດຖະກິດ, ການຄ້າ, ການລົງທຶນ, ການເຊ່ືອມໂຍງ-ເຊ່ືອມຈອດພື້ນຖານໂຄງລ່າງ, ການໄປມາຫາສູ່ເຊິ່ງກັນ ແລະ ກັນ ໃຫ້ປະກົດຜົນເປັນຮູບປະທຳຫລາຍຂຶ້ນເພື່ອນຳເອົາຜົນປະໂຫຍດຕົວຈິງ ມາສູ່ປະຊາຊົນທັງສອງຊາດລາວ- ໄທ, ປະກອບສ່ວນສໍາຄັນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງໃນເຂດພາກພື້ນ ແລະ ສາກົນ. ພ້ອມກັນນີ້, ທ່ານຍັງໄດ້ຝາກຄວາມຢື້ຢາມຖາມຂ່າວອັນອົບອຸ່ນຜ່ານທ່ານເອກອັກຄະລາຊະທູດ ໄປຍັງທ່ານນາຍົກລັດຖະມົນຕີ ແຫ່ງ ລາຊະອານາຈັກໄທ ໂດຍສະແດງຄວາມຫວັງວ່າຈະໄດ້ພົບປະ ແລະ ຮ່ວມມືຢ່າງໃກ້ຊິດກັບທ່ານນາຍົກລັດຖະມົນຕີ ແຫ່ງ ລາຊະອານາຈັກໄທ ໃນໂອກາດທີ່ເໝາະສົມ.
ຂ່າວ: ກົມປະຊາສຳພັນ ຫສນຍ.
KPL
