ຂປລ. ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ໄດ້ຕ້ອນຮັບທ່ານ ນາງ ວິລະວອນ ພັນທະວົງ ຮອງຫົວໜ້າຄະນະ ໂຄສະນາອົບຮົມສູນກາງພັກ (ຄອສພ) ເຂົ້າຢ້ຽມພົບປະ ໃນວັນທີ 28 ພະຈິກ 2024 ທີ່ຫ້ອງວ່າການແຂວງເຊກອງ ໃນໂອກາດມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງເຊກອງ ໃນລະຫວ່າງວັນທີ 28-30 ພະຈິກ 2024.
  ໂອກາດນີ້, ທ່ານ ເຫລັກໄຫລ ສີວິໄລ ໄດ້ກ່າວສະແດງຄວາມຕ້ອນຮັບ ແລະ ຍ້ອງຍໍຊົມເຊີຍ ພ້ອມທັງຕີລາຄາສູງຕໍ່ການມາເຄື່ອນຢ້ຽມຢາມ ແລະ ເຮັດວຽກ ຂອງທ່ານຮອງຫົວໜ້າ ຄອສພ ໃນຄັ້ງນີ້, ຊຶ່ງສະແດງໃຫ້ເຫັນເຖິງຄວາມເປັນຫ່ວງເປັນໄຍ ຂອງຄະນະພັກ-ຄະນະນໍາ ຄອສພ ທີ່ມີຕໍ່ຄະນະໂຄສະນາອົບຮົມແຂວງເຊກອງ. ໃນໄລຍະຜ່ານມາ, ຄະນະພັກ-ຄະນະນໍາແຂວງເຊກອງ ຍາມໃດກໍໄດ້ເອົາໃຈໃສ່ນໍາພາ-ຊີ້ນໍາ ຄະນະໂຄສະນາອົບຮົມແຂວງ ເຄື່ອນໄຫວຕິດຕາມ, ຊຸກຍູ້ບັນດາຂະແໜງການຕ່າງໆອ້ອມຂ້າງແຂວງ ແລະ 4 ຕົວເມືອງ ຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ-ລັດ ຕິດພັນກັບວຽກງານສ້າງຂະບວນການ ຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນ ຂອງພັກ ແລະ ການສະເຫລີມສະຫລອງ 3 ວັນປະຫວັດສາດສໍາຄັນ ໃນປີ 2025 ຄື: ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 94 ປີ ແລະ ວັນເກີດປະທານ ໄກສອນ ພົມວິຫານ ທີ່ເຄົາລົບຮັກ ຄົບຮອບ 104 ປີ; ວຽກງານໂຄສະນາສຶກສາອົບຮົມການເມືອງ-ນໍາພາແນວຄິດ ພະນັກງານ-ສະມາຊິກພັກ ເຮັດໃຫ້ແຂວງເຊກອງ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ປະຊາຊົນບັນດາເຜົ່າພາຍໃນແຂວງ ມີຄວາມສາມັກຄີເປັນປຶກແຜ່ນ ແລະ ເຊື່ອໝັ້ນຕໍ່ການນໍາພາຂອງພັກ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ ກໍຄືແຂວງເຊກອງຕາມແນວທາງຂອງພັກ-ລັດວາງອອກໃນແຕ່ລະໄລຍະ.
  ທ່ານ ນາງ ວິລະວອນ ພັນທະວົງ ກໍໄດ້ສະແດງຄວາມຂອບໃຈຕໍ່ທ່ານເຈົ້າແຂວງ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມທັງແຈ້ງຈຸດປະສົງ ການມາເຄື່ອນໄຫວເຮັດວຽກໃນຄັ້ງນີ້ ເພື່ອຕິດຕາມ, ຊຸກຍູ້ການເຄື່ອນໄຫວວຽກງານວິຊາສະເພາະ ຂອງຄະນະໂຄສະນາອົບຮົມແຂວງ ແລະ ເມືອງ ໂດຍສະເພາະຕິດຕາມ, ເກັບຜົນໄດ້ຮັບຈາກບັນດາໂຄງການຝຶກອົບຮົມ ແລະ ການແກ້ໄຂປະກົດການຫຍໍ້ທໍ້ ໃນຖັນແຖວພະນັກງານ-ສະມາຊິກພັກ ທີ່ຢູ່ໃນຄວາມຮັບຜິດຊອບຂອງຕົນ ແລະ ວຽກງານອື່ນໆ. ທັງນີ້ ກໍເພື່ອເຮັດໃຫ້ການເຄື່ອນໄຫວວຽກງານວິຊາສະເພາະ ຂອງຄະນະໂຄສະນາອົບຮົມໃນແຕ່ລະຂັ້ນມີຄວາມເຂັ້ມແຂງ ແລະ ພັດທະນາດີຂຶ້ນ.

KPL