ຂປລ. ສປປ ລາວ ແລະ ສ ອິນເດຍ ລົງນາມເອກະສານຮ່ວມມືສອງຝ່າຍ ຈໍານວນ 7 ສະບັບ ປະກອບມີ: ການຮ່ວມມືຂົງເຂດວຽກງານປ້ອງກັນຊາດ; ສັນຍາ ວ່າດ້ວຍການຮ່ວມມືການຊ່ວຍເຫລືອເຊິ່ງກັນ ແລະ ກັນໃນດ້ານວຽກງານພາສີ; ການຮ່ວມມືການກະຈາຍສຽງ ແລະ ພາບ ລະຫວ່າງ ລາວ-ອິນເດຍ; ໂຄງການປົກປັກຮັກສາມໍລະ ດົກການສະແດງລະຄອນ ພະລັກ-ພະລາມ ຢູ່ແຂວງຫລວງພະບາງ; ໂຄງການບູລະນະສ້ອມແປງຫລັງຄາວັດປ່າແຄ ແຂວງຫລວງພະບາງ; ໂຄງການປົກປັກຮັກສາ ການສະແດງປະລັດຕື້ ແລະ ການພັດທະນາບຸກຄະລາກອນ ລຸ້ນສືບທອດ ເພື່ອໃຫ້ສະມາຄົມປະລັດຕື້ມີຄວາມຍືນຍົງ ບ້ານວັດທົ່ງ ເມືອງຈໍາປາສັກ ແຂວງຈໍາປາສັກ; ໂຄງການກໍ່ສ້າງທາງຮ່ອມ ແລະ ຮ່ອງລະບາຍນໍ້າ ຢູ່ຮ່ອມ 5 ທີ່ ບ້ານໂສກປ່າຫລວງ ເມືອງສີສັດຕະນາກ, ນະຄອນຫລວງວຽງຈັນ ເຊິ່ງ ພິທີລົງນາມດັ່ງກ່າວ ໄດ້ຈັດຂຶ້ນໃນວັນທີ 11 ຕຸລາ 2024 ໂດຍມີ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ນາເລັນດຣາ ໂມດີ ນາຍົກລັດຖະມົນຕີ ແຫ່ງ ສາທາລະນະລັດ ອິນເດຍ ເຂົ້າຮ່ວມເປັນສັກຂີພິຍານ.

ກ່ອນພິທີລົງນາມ, ສອງນາຍົກລັດຖະມົນຕີ ລາວ-ອິນເດຍ ໄດ້ພົບປະສອງຝ່າຍນໍາກັນ ເພື່ອປຶກສາຫາລື ແລະ ແລກປ່ຽນຄໍາຄິດເຫັນ ສົ່ງເສີມການຮ່ວມມື ລະຫວ່າງສອງປະເທດ ໃຫ້ໄດ້ຮັບການພັດທະນາຍິ່ງໆຂຶ້ນ. ໃນໂອກາດນີ້, ສອງຝ່າຍໄດ້ສະແດງຄວາມຍິນດີທີ່ເຫັນວ່າ ໃນຕະຫລອດ 68 ປີ ແຫ່ງການພົວພັວຮ່ວມມື ຂອງສອງປະເທດ ຍັງສືບຕໍ່ຮັກສາໄວ້ມິດຕະພາບ, ມູນເຊື້ອອັນດີງາມ ທີ່ມີຮີດຄອງປະເພນີ ແລະ ວັດທະນະທໍາໃກ້ຄຽງກັນ, ປະຊາຊົນສອງຊາດມີການໄປມາຫາສູ່ກັນ, ມີການພົບປະຢ້ຽມຢາມເຊິ່ງກັນ ແລະ ກັນ ລະຫວ່າງ ການນໍາຂັ້ນສູງຂອງສອງປະເທດ ຢ່າງເປັນປົກກະຕິ, ລວມທັງມີການຊ່ວຍເຫລືອ ແລະ ສະໜັບສະໜູນເຊິ່ງກັນ ແລະ ກັນ ທັງໃນຂອບສອງຝ່າຍ ແລະ ຫລາຍຝ່າຍ ໃນຂົງເຂດພາກພື້ນ ແລະ ສາກົນ. ສອງຝ່າຍເປັນເອກະພາບຈະສືບຕໍ່ຊຸກຍູ້ ແລະ ລົງເລິກການຮ່ວມມືບາງດ້ານໃນຕໍ່ໜ້າ ໂດຍສະເພາະ ການຮ່ວມມືດ້ານ ພະລັງງານແສງຕາເວັນ, ການຊຸກຍູ້ນັກທຸລະກິດອິນເດຍ ເຂົ້າມາລົງທຶນຢູ່ ສປປ ລາວ ໃນຂົງເຂດທີ່ ສປປ ລາວ ມີທ່າແຮງ ເປັນຕົ້ນ ດ້ານພະລັງງານສະອາດ, ກະສິກໍາ, ອຸດສາຫະກໍາປຸງແຕ່ງ, ວັດທະນະທໍາ ແລະ ການທ່ອງທ່ຽວແບບທໍາມະຊາດ ແລະ ຂົງເຂດອື່ນໆ. ພ້ອມນັ້ນ, ສອງຝ່າຍຍັງໄດ້ ແລກປ່ຽນ ຄໍາຄິດຄໍາເຫັນຕໍ່ກັບການຮ່ວມມື ອາຊຽນ-ອິນເດຍ ແລະ ຕໍ່ກັບສະພາບການພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.

ໃນໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍຕໍ່ ທ່ານ ນາເລັນດຣາ ໂມດີ ທີ່ໄດ້ຖືກເລືອກຕັ້ງໃຫ້ດໍາລົງຕໍາແໜ່ງເປັນ ນາຍົກລັດຖະມົນຕີ ແຫ່ງ ສ ອິນເດຍ ອີກສະໄໝໜຶ່ງ, ພ້ອມທັງໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ລັດຖະບານ ແລະ ປະຊາຊົນອິນເດຍ ທີ່ໄດ້ໃຫ້ການ ຊ່ວຍເຫລືອ ສປປ ລາວ ໃນໄລຍະຜ່ານມາ ໂດຍສະເພາະ ບັນດາໂຄງການຊ່ວຍເຫລືອເພື່ອການພັດທະນາ ແລະ ເສດຖະກິດຂອງອິນເດຍ (IDEAS), ໂຄງການເຫັນຜົນໄວ (Quick Impact Project) ພາຍໃຕ້ຂອບແມ່ນໍ້າຂອງ-ແມ່ນໍ້າຄົງຄາ, ການຊ່ວຍເຫລືອທຶນຝຶກ ອົບຮົມໄລຍະສັ້ນ ແລະ ໄລຍະຍາວ, ການຊ່ວຍເຫລືອວຽກງານ ບູລະນະບູຮານສະຖານຂອງ ສປປ ລາວ ແລະ ການຊ່ວຍເຫລືອ ເຄື່ອງບັນເທົາທຸກສຸກເສີນ ໄພນໍ້າຖ້ວມ ແກ່ ສປປ ລາວ.

ໃນຂະນະດຽວກັນ, ທ່ານ ນາເລັນດຣາ ໂມດີ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ໄດ້ຢືນຢັນວ່າຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ໃນຕໍ່ໜ້າ, ພ້ອມທັງໄດ້ສະແດງຄວາມຊົມເຊີຍ ແລະ ອວຍພອນໃຫ້ການເປັນເຈົ້າພາບ ແລະ ປະທານ ອາຊຽນຂອງ ສປປ ລາວ ໃນປີ 2024 ນີ້ ປະສົບຜົນສໍາເລັດຢ່າງຈົບງາມ.

KPL