ຂປລ. ໃນວັນຈັນທີ 30 ກັນຍາ 2024 ຜ່ານມາ, ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ມໍຣະກົດ ສີສະຫວັດ ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ ພ້ອມດ້ວຍຄະນະ ​ໃນ​ໂອກາດນໍາເງິນ ຈໍານວນ 2,1 ລ້ານບາດ ມາເພື່ອອຸປະຖໍາການເປັນເຈົ້າພາບ ຈັດ ກອງປະຊຸມສະມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45.

ໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ທ່ານ ນາງ ມໍຣະກົດ ສີສະຫວັດ ທີ່ປະຕິບັດໜ້າທີ່ປະສານສົມທົບກັບ ສປປ ລາວ ທັງສາຍລັດ ບໍລິຫານ ແລະ ສາຍນິຕິບັນຍັດ ໂດຍສະເພາະເປັນເຈົ້າການໃນການຊຸກຍູ້, ສົ່ງເສີມ ແລະ ສະໜັບສະໜູນການເປັນປະທານອາຊຽນ ແລະ ປະທານໄອປາ ຂອງ ສປປ ລາວ ເຊິ່ງເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືອັນດີງາມ ຂອງສອງປະ ເທດ ກໍຄື ການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ເເລະ ການພັດທະນາເເບບຍືນຍົງ ໃຫ້ນັບມື້ຈະເລີນງອກງາມຍິ່ງໆຂຶ້ນ. ພ້ອມທັງ ສະແດງຄວາມຂອບໃຈລັດຖະບານ ແລະ ລັດຖະສະພາ ກໍຄື ປະຊາຊົນໄທ ທີ່ໃຫ້ການສະໜັບສະໜູນທັງດ້ານຊ່ຽວຊານ ແລະ ວັດຖຸປັດໄຈ ປະກອບສ່ວນຊ່ວຍໃນການຈັດຕັ້ງກອງປະຊຸມໄອປາ ຄັ້ງທີ 45 ທີ່ສະພາແຫ່ງຊາດລາວ ຈະເປັນເຈົ້າພາບໃນປີນີ້ ໃຫ້ໄດ້ຮັບຜົນສໍາເລັດຢ່າງຈົບງາມ.

ການພົວພັນຮ່ວມມືລະຫວ່າງ ສອງອົງການນິຕິບັນຍັດ ລາວ-ໄທ ໃນໄລຍະຜ່ານມາ ໄດ້ຮັບການພັດທະນາຢ່າງຕໍ່ເນື່ອງ, ສອງຝ່າຍມີການແລກປ່ຽນ ການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆນໍາກັນເປັນປົກກະຕິ, ອັນພົ້ນເດັ່ນໃນເດືອນຕຸລາ 2022 ທ່ານ ໄຊສົມພອນ ພົມວິຫານ ໄດ້ນໍາພາຄະນະຜູ້ແທນຂັ້ນສູງ ຂອງສະພາແຫ່ງຊາດລາວ ຢ້ຽມຢາມ ຢ່າງເປັນທາງການຢູ່ປະເທດໄທ ແລະ ໄດ້ລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງສະພາແຫ່ງຊາດລາວ ກັບລັດຖະສະພາໄທ ເປັນສະບັບທໍາອິດ ຂອງສອງອົງການນິຕິບັນຍັດ ລາວ-ໄທ ເຊິ່ງສອງຝ່າຍໄດ້ສະໜັບສະໜູນເຊິ່ງກັນ ແລະ ກັນຕະຫລອດມາ ທັງໃນຂອບສອງຝ່າຍ ແລະ ຫລາຍຝ່າຍ.

ທ່ານ ນາງ ມໍຣະກົດ ສີສະຫວັດ ກໍໄດ້ສະແດງຄວາມຂອບໃຈ ຕໍ່ທ່ານປະທານສະພາແຫ່ງຊາດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງແຈ້ງໃຫ້ຊາບກ່ຽວກັບ ຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ເພື່ອມອບ​ເງິນອຸປະຖໍາການເປັນເຈົ້າພາບ ຈັດກອງປະຊຸມສະມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຄັ້ງທີ 45 ເຊິ່ງຕາງໜ້າຮັບໂດຍທ່ານ ນາງ ອໍາໄພວອນ ລ້ອມບຸນແພງ ເລຂາທິການສະພາແຫ່ງຊາດ.

ຂ່າວ: ສອນສັກ ວັນວິໄຊ

KPL