*ຄໍລໍາສົ່ງເສີມທຸລະກິດຫລາຍສະບັບຜ່ານມາ ບ່ໍຄ່ອຍໄດ້ນໍາສະເໜີທຸລະກິດກ່ຽວກັບໂຮງແຮມສະນັ້ນ, ນີ້ມື້ຈຶ່ງພາບັນດາທ່ານອອກຈາກນະຄອນຫລວງວຽງຈັນ ເຖິງນະຄອນຫລວງພະບາງ ເພື່ອຮູ້ຈັກໂຮງແຮມຫລວງຜາສຸກເປັນອີກໂຮງ ແຮມໜຶ່ງທີ່ມີຊື່ສຽງໃນພາກເໜືອຂອງລາວ  ທ່ີນັກທ່ອງທ່ຽວທັງພາຍໃນ ແລະ ຕ່າງປະເທດ ນິຍົມພັກເຊົາເພາະມີຄວາມສວຍງາມດ້ານການຕົບແຕ່ງທີ່ສື່ເຖິງເອກະລັກວັດທະນະທໍາລາວ, ຄວາມສະອາດ, ປອດໄພ ແລະ ການບໍລິການທີ່ຈິງໃຈ ຈຶ່ງເຮັດໃຫ້ຄອງໃຈນັກທ່ອງທ່ຽວມາຍາວນານ.

    ທ່ານ ນາງ ວິດາລີ ຈັນທະຜາສຸກ ຜູ້ບໍລິຫານໂຮງແຮມຫລວງຜາສຸກ ໄດ້ໃຫ້ສໍາພາດວ່າ:  ໂຮງແຮມຫລວງຜາສຸກ ເປັນໂຮງແຮມທີ່ຕັ້ງຢູ່ໃຈກາງນະຄອນຫລວງພະບາງ ທີ່ຖືກອອກແບບໃຫ້ຄົງໄວ້ເອກະລັກຂອງຄວາມເປັນລາວ ມີຫ້ອງພັກທີ່ສະດວກສະບາຍການຕົບແຕ່ງລົົງຕົວ ຫ້ອງນ້ຳສະອາດເໝາະສຳລັບຄອບຄົວ ແລະ ຄູ່ຮັກເຂົ້າພັກແຮມບັນຍາກາດພາຍໃນ ແລະ ອ້ອມຮອບເປັນເອກະລັກສະເພາະຂອງເມືອງມໍລະດົກໂລກ ເນື່ອງຈາກຕັ້ງຢູ່ຈຸດໃຈກາງເຂດມໍລະດົກ ເຮັດໃຫ້ໂຮງ ແຮມຫລວງຜາສຸກ ໃກ້ກັບສະຖານທີ່ທ່ອງທ່ຽວ ແລະ ວັດສຳຄັນຕ່າງໆເຊັ່ນ: ພູສີ, ພະຣາຊະວັງ, ວັດຊຽງທອງ, ເຮືອນຈັນ, ທ່າເຮືອ ໂດຍສະເພາະຕະຫລາດກາງຄືນ ແລະ ຕະຫລາດເຊົ້າທີ່ຕັ້ງຫ່າງຈາກໂຮງແຮມປະມານ 200 ແມັດ. 

    ໂດຍຮູບແບບການບໍລິການ ແມ່ນເນັ້ນໃສ່ບໍລິການດ້ວຍຄວາມຈິງໃຈອົບອຸ່ນໃຫ້ຄວາມເປັນກັນເອງກັບແຂກທຸກທ່ານ  ແລະ ເປັນເອກະລັກຂອງຄວາມເປັນວັດທະນະທໍາລາວດ້ວຍໄມຕິຈິດມິດຕະພາບ ຈຶ່ງເຮັດໃຫ້ລູກຄ້າທີ່ເຄີຍມາໃຊ້ບໍລິການແລ້ວເກີດຄວາມປະທັບໃຈຫລາຍຄົນ ກໍກາຍມາເປັນຄົນຮັກແພງ ພ້ອມທັງບອກຕໍ່ໆກັບໜູ່ເພື່ອນຍາດພີ່ນ້ອງ ຈຶ່ງເຮັດໃຫ້ໂຮງແຮມເປັນທ່ີຮູ້ຈັກຢ່າງກວ້າງຂວາງ. ສໍາລັບຫ້ອງພັກມີ 2 ປະເພດຄື: ຫ້ອງມາດຕະຖານ (Standard Room); ຫ້ອງພິເສດ (Superior Room) ນອກຈາກວຽກຕ້ອນຮັບ ລູກຄ້າແລ້ວທາງໂຮງແຮມຫລວງ ຜາສຸກ ຍັງມີການປະກອບສ່ວນຊ່ວຍ ເຫລືອອົງການຈັດຕັ້ງ ແລະ ສັງຄົມ ຕ່າງໆ ບໍ່ວ່າຈະເປັນທາງດ້ານເຫື່ອ ແຮງ ແລະ ປັດໄຈ ພ້ອມທັງໃຫ້ເປັນສະຖານທີ່ສຳລັບການສຶກສາຮຽນຮູ້ໃຫ້ຂໍ້ມູນແກ່ນັກສຶກສາທີ່ລົງມາຝຶກງານຫລາຍຊຸດທີ່ກຽມເສັງຈົບດ້ານການໂຮງແຮມ.

    ທ່ານ ນາງ ວິດາລີ ຈັນທະຜາສຸກ ຝາກເຖິງຖ້າທ່ານໃດໄດ້ມາທ່ຽວແຂວງຫລວງພະບາງສາມາດໄປພັກເຊົາໄດ້ຊຶ່ງໂຮງແຮມຫລວງຜາສຸກ ຕັ້ງຢູ່ໃຈກາງນະຄອນຫລວງພະບາງ ຕັ້ງຢູ່ບ້ານຈູມຄ້ອງ ນະຄອນຫລວງພະບາງ ສາມາດຕິດຕໍ່ໄດ້ເບີໂທລະສັບ +856 20 5150 4922; +856 20 5884 4446.

ໂດຍ: ມາລິດາ

KPL