ຂປລ
ຂປລ. ແຫລ່ງຂ່າວຈາກ ແຂວງຈຳປາສັກ ໃຫ້ຮູ້ວ່າ: ທ່ານ ໄພວີ ສີບົວລິພາ ກໍາມະການສູນກາງພັກ ລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ພົບປະໂອ້ລົມຄະນະພັກ-ຄະນະນໍາ, ສະມາຊິກພັກ ແລະ ພະນັກງານ ພະແນກຍຸຕິທໍາ ແຂວງຈໍາປາສັກ ໃນວັນທີ 5 ສິງຫາ 2024
ຂປລ. ແຫລ່ງຂ່າວຈາກ ແຂວງຈຳປາສັກ ໃຫ້ຮູ້ວ່າ: ທ່ານ ໄພວີ ສີບົວລິພາ ກໍາມະການສູນກາງພັກ ລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ພົບປະໂອ້ລົມຄະນະພັກ-ຄະນະນໍາ, ສະມາຊິກພັກ ແລະ ພະນັກງານ ພະແນກຍຸຕິທໍາ ແຂວງຈໍາປາສັກ ໃນວັນທີ 5 ສິງຫາ 2024 ທີ່ນະຄອນປາກເຊ ໂດຍມີທ່ານ ບຸນຄົງ ພັນວົງສາ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ພ້ອມດ້ວຍຄະນະພັກ-ຄະນະນໍາ, ສະມາຊິກພັກ ແລະ ພະນັກງານພາຍໃນພະແນກ, ກອງຈັດຕັ້ງປະຕິບັດຄໍາຕັດສິນຂອງສານ, ສະຖາບັນຍຸຕິທໍາພາກໃຕ້ ແລະ ຫ້ອງການສະພາທະນາຍຄວາມແຂວງ ເຂົ້າຮ່ວມ. ໂອກາດນີ້, ທ່ານ ໄພວີ ສີບົວລິພາ ໄດ້ເນັ້ນໜັກໃຫ້ຄະນະພັກ-ຄະນະນໍາພະແນກຍຸຕິທໍາແຂວງ, ກອງຈັດຕັ້ງປະຕິບັດຄໍາຕັດສິນຂອງສານປະຈໍາແຂວງ, ສະຖາບັນຍຸຕິທໍາພາກໃຕ້ ແລະ ຫ້ອງການສະພາທະນາຍຄວາມແຂວງ ເອົາໃຈໃສ່ສໍາຫລວດກວດກາຄືນ ການຈັດຕັ້ງປະຕິບັດຄໍາຕັດສິນຂອງສານ, ການໂຄສະນາເຜີຍແຜ່ກົດໝາຍ, ເອົາໃຈໃສ່ໃນການນໍາພາ ສູ້ຊົນ ໃຫ້ຈັດຕັ້ງປະຕິບັດຕາມພາລະບົດບາດ ຂອງຂະແໜງຍຸຕິທໍາ ໃຫ້ມີຄຸນນະພາບ ແລະ ມີຜົນສໍາເລັດ. ນອກນີ້, ການນໍາພາດ້ານການເມືອງ-ແນວຄິດ, ການຈັດຕັ້ງ, ແບບແຜນວິທີນໍາພາ ແລະ ແບບແຜນວິທີເຮັດວຽກ ກໍຕ້ອງໃຫ້ລະອຽດຈະແຈ້ງ, ເຕົ້າໂຮມຄວາມສາມັກຄີພາຍໃນ ໃຫ້ເປັນປຶກແຜ່ນແໜ້ນໜາ ມີຄວາມເປັນເອກະພາບ ໃນການຈັດຕັ້ງປະຕິບັດໜ້າທີ່ວຽກງານ, ເອົາໃຈໃສ່ປະສານສົມທົບກັບການນໍາແຂວງ, ການນໍານະຄອນ-ເມືອງ ເພື່ືອສູ້ຊົນເຮັດໃຫ້ຈໍານວນຄະດີ ທີ່ສານຕັດສິນແລ້ວ ໃຫ້ໄດ້ຮັບການຈັດຕັ້ງປະຕິບັດ ຢ່າງມີຜົນສໍາເລັດ ແລະ ນັບມື້ຫລຸດໜ້ອຍຖອຍລົງ ໂດຍນໍາໃຊ້ມາດຕະການທາງກົດໝາຍຢ່າງເຂັ້ມງວດ, ສືບຕໍ່ເອົາໃຈໃສ່ສ້າງຄວາມເຂັ້ມແຂງ ໃຫ້ສະພາທະນາຍຄວາມ ຍົກສູງພາລະບົດບາດຂອງທະນາຍຄວາມ ໃຫ້ມີຄວາມຮູ້ຄວາມສາມາດ, ເຊື່ອມຊຶມກໍາແໜ້ນບັນດານິຕິກໍາທີ່ກ່ຽວຂ້ອງ, ມີຈັນຍາບັນ-ຈັນຍາທໍາ ແລະ ມີຄວາມທ່ຽງທໍາ, ມີຄວາມຮູ້ດ້ານພາສາຕ່າງປະເທດ ເພື່ອສາມາດເຄື່ອນໄຫວວຽກງານຮ່ວມມືກັບສາກົນ ແລະ ພາກພື້ນ ທັງນີ້ກໍເພື່ອເຮັດສໍາເລັດໜ້າທີ່ການເມືອງ ທີ່ພັກ-ລັດ ແລະ ການຈັດຕັ້ງມອບໝາຍໃຫ້.
ຂ່າວ-ພາບ: ທູນທອງໃຈ
KPL
