ຂປລ
ທ່ານ ຫລີ ເຈ່ຍຊ່າວ, ຜູ້ວ່າການ ອົງການປົກຄອງ ເຂດບໍລິຫານພິເສດ ຮົງກົງຂອງ ສປ ຈີນ ໄດ້ປະກາດ “ແຜນພັດທະນາ ເສດຖະກິດ-ສັງຄົມເຂດບໍລິຫານ ພິເສດຮົງກົງ 5 ປີຄັ້ງທຳອິດ(2026-2030)”ໃນກອງປະຊຸມສະພານິຕິບັນຍັດຂອງເຂດພິເສດ ແລະ ໄດ້ເຜີຍແຜ່ ບົດລາຍງານ ການບໍລິຫານການເມືອງປີ 2026.
ຂປລ.ວິທະຍຸ ໂທລະພາບ ສູນກາງຈີນ, ວັນທີ 16 ກັນຍານີ້, ທ່ານ ຫລີ ເຈ່ຍຊ່າວ, ຜູ້ວ່າການ ອົງການປົກຄອງ ເຂດບໍລິຫານພິເສດ ຮົງກົງຂອງ ສປ ຈີນ ໄດ້ປະກາດ “ແຜນພັດທະນາ ເສດຖະກິດ-ສັງຄົມເຂດບໍລິຫານ ພິເສດຮົງກົງ 5 ປີຄັ້ງທຳອິດ(2026-2030)”ໃນກອງປະຊຸມສະພານິຕິບັນຍັດຂອງເຂດພິເສດ ແລະ ໄດ້ເຜີຍແຜ່ ບົດລາຍງານ ການບໍລິຫານການເມືອງປີ 2026. ທ່ານ ຫລີ ເຈ່ຍຊ່າວ ກ່າວວ່າ: ແຜນພັດທະນາ ເສດຖະກິດ-ສັງຄົມ ເຂດບໍລິຫານພິເສດຮົງກົງ 5 ປີ ຄັ້ງທຳອິດ ແມ່ນແຜນຜັງ ສຳລັບ ການພັດທະນາ ເສດຖະກິດ-ສັງຄົມຂອງຮົງກົງ, ແມ່ນຂີດໝາຍທີ່ສຳຄັນ ຂອງຮົງກົງໃນການຫັນປ່ຽນຈາກໄລຍະການບໍລິຫານ ໄປສູ່ໄລຍະຄວາມຈະເລີນຮຸ່ງເຮືອງ. ແຜນການດັ່ງກ່າວລວມມີ 7 ພາກເຊິ່ງຕ່າງມີຫົວຂໍ້ຫລັກວ່າ: “ສ້າງສະພາບການໃໝ່ ຂຽນໜ້າໃໝ່” “ເສີມສ້າງການກໍ່ສ້າງສູນໃຫຍ່ 4 ແຫ່ງ, ການສ້າງສູນເຕົ້າໂຮມບຸກຄະລາກອນ ເພື່ອຍົກລະດັບ ແລະ ເສີມຂະຫຍາຍ ຄວາມໄດ້ປຽບໃນການແຂ່ງຂັນລະດັບສາກົນ ໃຫ້ດີຂຶ້ນ” “ເລັ່ງລັດການສ້າງຕົວເມືອງພາກເໜືອ ເພື່ອນຳພາການປັບປຸງ ສະພາບຊ່ອງຫວ່າງ ໃຫ້ດີຂຶ້ນ” “ເພີ່ມທະວີ ການສ້າງເຂດອ່າວໃຫຍ່ ກວາງຕຸ້ງ-ມາກາວ-ຮົງກົງ ແລະ ສ້າງເຄືອຂ່າຍ ການຮ່ວມມື ລະດັບສາກົນ” “ຍົກລະດັບຄວາມຜາສຸກ ຂອງປະຊາຊົນໃຫ້ສູງຂຶ້ນຢ່າງແທ້ຈິງ,ປັບປຸງລະບົບປະກັນສັງຄົມໃຫ້ດີຂຶ້ນ” “ປະສານງານ ດ້ານການພັດທະນາ ແລະ ຄວາມໝັ້ນຄົງ ເພື່ອຍົກປະສິດທິພາບ ດ້ານການບໍລິຫານສາທາລະນະໃຫ້ສູງຂຶ້ນ” ແລະ “ເພີ່ມທະວີກົນໄກຮັບປະກັນການປະຕິບັດ ແຜນພັດທະນາ ເສດຖະກິດ-ສັງຄົມເຂດບໍລິຫານພິເສດຮົງກົງ 5 ປີຄັ້ງທຳອິດ ຢ່າງແຂງແຮງ”. ແຜນການດັ່ງກ່າວ ຍຶດໝັ້ນ 7 ແນວຄິດ: ຍຶດໝັ້ນທິດທາງ ປະເທດດຽວສອງລະບອບ,ຍຶດໝັ້ນຖືປະຊາຊົນເປັນຫລັກ, ຍຶດໝັ້ນຖືການບໍລິຫານການເມືອງເປັນທິດຫລັກ,ຍຶດໝັ້ນການປະຕິຮູບ ແລະ ການປະດິດສ້າງໃໝ່, ຍຶດໝັ້ນການປະສານສົມທົບກັນ ລະຫວ່າງ “ຕະຫລາດທີ່ມີປະສິດທິພາບ”ກັບ “ອົງການປົກຄອງທີ່ມີຄວາມສາມາດ”,ຍຶດໝັ້ນການປະສານງານລະຫວ່າງການພັດທະນາ ແລະ ຄວາມໝັ້ນຄົງ ແລະ ຍຶດໝັ້ນວາງແຜນການທີ່ຕິດແທດຕົວຈິງ. ແຜນການຍັງໄດ້ລະບຸ 5 ເປົ້າໝາຍ ສຳຄັນຄື: ການພັດທະນາ ເສດຖະກິດ ໄດ້ຮັບການກ້າວກະໂດດອັນໃໝ່,ຄວາມສາມາດແຂ່ງຂັນ ລະດັບສາກົນ ແລະ ອິດທິພົນໄດ້ຮັບການຍົກສູງຂຶ້ນ ຢ່າງຕໍ່ເນື່ອງ, ການສ້າງຕົວເມືອງພາກເໜືອເລັ່ງໄວ ແລະ ຍົກປະສິດທິພາບໃຫ້ສູງຂຶ້ນ,ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງໃຫ້ດີຂຶ້ນ ຢ່າງຊັດເຈນ,ການຮັບໃຊ້ ແລະ ເຊື່ອມໂຍງເຂົ້າກັນ ກັບພາກສ່ວນໃຫຍ່ການພັດທະນາແຫ່ງຊາດ ໄດ້ຮັບຄວາມຄືບໜ້າທີ່ສຳຄັນ. ທ່ານ ຫລີເຈ່ຍຊ່າວ ກ່າວວ່າ: ອົງການປົກຄອງເຂດບໍລິຫານພິເສດຮົງກົງ ຍຶດໝັ້ນສະແຫວງຫາ ການພັດທະນາ ໄລຍະຍາວ, ຊຸກຍູ້ການພັດທະນາ ດ້ວຍການປະຕິຮູບ. ເມື່ອຢືນຢູ່ຈຸດເລີ່ມຕົ້ນອັນໃໝ່, ໂດຍອາໄສ ການສະໜັບສະໜູນ ທີ່ເຂັ້ມແຂງຈາກ ປະເທດຊາດ, ສະຕິປັນຍາ ແລະ ຄວາມພະຍາຍາມ ຂອງປະຊາຊົນຮົງກົງ ແນ່ນອນຈະສາມາດເຮັດໃຫ້ໝາກຜົນ ຂອງການພັດທະນາ ເປັນປະໂຫຍດ ຕໍ່ທຸກຄອບຄົວ ແລະ ເຮັດໃຫ້ຮົງກົງມີຄວາມສວຍສົດງົດງາມ ແລະ ຄວາມຈະເລີນຮຸ່ງເຮືອງ ຫລາຍກວ່າເກົ່າ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
