ຂປລ
ຂປລ. ໃນງານຕະຫລາດນັດສາກົນ, ການຄ້າ, ການທ່ອງທ່ຽວ ແລະ ການລົງທຶນ ຕາມແລວເສັ້ນທາງເສດ ຖະກິດຕາເວັນອອກ-ຕາເວັນຕົກ ໄດ້ຈັດຫລາຍກິດຈະກໍາ ໃຫ້ບັນດາຜູ້ປະກອບການທຸລະກິດການທ່ອງທ່ຽວ ແລະ ທຸລະກິດປິ່ນອ້ອມ ໄດ້ມີໂອກາດແລກປ່ຽນຂໍ້ມູນຂ່າວສານ ການທ່ອງທ່ຽວ ໂດຍສະເພາະ ຄູ່ທຸລະກິດການທ່ອງທ່ຽວລາວ-ຫວຽດນາມ.
ຂປລ. ໃນງານຕະຫລາດນັດສາກົນ, ການຄ້າ, ການທ່ອງທ່ຽວ ແລະ ການລົງທຶນ ຕາມແລວເສັ້ນທາງເສດ ຖະກິດຕາເວັນອອກ-ຕາເວັນຕົກ ໄດ້ຈັດຫລາຍກິດຈະກໍາ ໃຫ້ບັນດາຜູ້ປະກອບການທຸລະກິດການທ່ອງທ່ຽວ ແລະ ທຸລະກິດປິ່ນອ້ອມ ໄດ້ມີໂອກາດແລກປ່ຽນຂໍ້ມູນຂ່າວສານ ການທ່ອງທ່ຽວ ໂດຍສະເພາະ ຄູ່ທຸລະກິດການທ່ອງທ່ຽວລາວ-ຫວຽດນາມ. ໃນນັ້ນ, ບໍລິສັດທ່ອງທ່ຽວພັດທະນາຈໍາປາໃໝ່ ກໍເປັນບໍລິສັດໜຶ່ງທີ່ໄດ້ຮ່ວມງານໃນຄັ້ງນີ້ ເຊິ່ງບໍລິສັດດັ່ງກ່າວ ແມ່ນໃຫ້ບໍລິການນັກທ່ອງທ່ຽວ ທັງພາຍໃນ ແລະ ຕ່າງເທດ ທີ່ມີຄວາມສົນໃຈ ຢາກເຂົ້າມາທ່ອງທ່ຽວຢູ່ ສປປ ລາວ ແລະ ນັກທ່ອງທ່ຽວລາວ ຢາກໄປທ່ອງທ່ຽວຕ່າງປະເທດ.
ທ່ານ ນາງ ສຸດທິດາ ອຸນາພົມ ຜູ້ອໍານວຍການ ບໍລິສັດທ່ອງທ່ຽວພັດທະນາຈໍາປາໃໝ່ ໄດ້ໃຫ້ຮູ້ວ່າ: ບໍລິສັດທ່ອງທ່ຽວພັດທະນາຈໍາປາໃໝ່ ເລີ່ມດໍາເນີນທຸລະກິດແຕ່ປີ 2003 ເປັນຕົ້ນມາ ແລະ ໄດ້ລົງທຶນພັດທະນາສະຖານທີ່ທ່ອງທ່ຽວຢູ່ 2 ແຫ່ງຄື: ສະຖານທີ່ທ່ອງທ່ຽວນໍ້າຕົກຕາດເຍືອງ ເມືອງຊ່ອງ ແຂວງຈໍາປາສັກ ແລະ ສະຖານທີ່ທ່ອງທ່ຽວຕາດເລາະ-ຕາດຮັງ ແຂວງສາລະວັນ. ການເຂົ້າຮ່ວມງານຕະຫລາດນັດສາກົນ, ການຄ້າ, ການທ່ອງທ່ຽວ ແລະ ການລົງທຶນ ຢູ່ສສ ຫວຽດນາມ ໃນຄັ້ງນີ້ ຖືວ່າເປັນໂອກາດອັນດີ ທີ່ບໍລິສັດພວກເຮົາ ຈະໄດ້ແລກປ່ຽນຂໍ້ມູນຂ່າວ ສານການທ່ອງທ່ຽວ, ໂຄສະນາແຫລ່ງທ່ອງທ່ຽວ ແລະ ບໍລິສັດທ່ອງທ່ຽວ ເພື່ອຫາຕະຫລາດການນໍາເຂົ້ານັກທ່ອງທ່ຽວ, ຮູບແບບການຈັດລາຍການທ່ອງທ່ຽວ, ການຮັບ-ສົ່ງນັກທ່ອງທ່ຽວ ແລະ ກ້າວໄປເຖິງການຊື້-ຂາຍລາຍການທ່ອງ ທ່ຽວເຊິ່ງກັນ ແລະ ກັນ ເປັນຕົ້ນ ບັນດາແຂວງທີ່ມີ ສາຍແດນຕິດຈອດກັບ ສປປ ລາວ ໃຫ້ເຂົ້າເຈົ້າໄດ້ຮູ້ຈັກຖະສະທີ່ທ່ອງທ່ຽວ ທີ່ມີຄວາມຫລາກຫລາຍທາງດ້ານວັດທະນະທໍາ, ທໍາມະຊາດ ແລະ ປະຫວາດສາດ ທີ່ມີຄວາມສວຍສົດງົດງາມ.
ທ່ານ ນາງ ສຸດທິດາ ອຸນາພົມ ຍັງໃຫ້ຮູ້ອີກວ່າ: ປັດຈຸບັນ, ບໍລິສັດທ່ອງທ່ຽວພັດທະນາ ຈໍາປາໃໝ່ ນອກຈາກບໍລິການໃຫ້ນັກທ່ອງທ່ຽວທັງພາຍໃນ ແລະ ຕ່າງເທດແລ້ວ, ຍັງມີສະຖານທີ່ທ່ອງທ່ຽວນໍ້າຕົກຕາດເຍືອງ ແລະ ສະຖານທີ່ທ່ອງທ່ຽວ ນໍ້າຕົກຕາດເລາະ-ຕາດຮັງ, ມີການບໍລິການ ຮ້ານອາຫານ ແລະ ຮ້ານກາເຟ ເມື່ອນັກທ່ອງທ່ຽວ ໄດ້ເຂົ້າໄປ ສໍາພັດເຖິງກິ່ນອາຍຂອງທໍາມະຊາດ, ອາກາດບໍລິສຸດ, ເຫັນນໍ້າຕົກຕາດ ທີ່ມີຄວາມສວຍສົດງົດງາມ ທີ່ທໍາມະຊາດສ້າງຂຶ້ນ.
ຂ່າວ-ພາບ: ວີລະວັນ
KPL
