ຂປລ
ໃນໄລຍະຜ່ານມາລັດຖະບານໄດ້ມີນະໂຍບາຍ ແລະ ວາງຫລາຍມາດຕະການ ເພື່ອສົ່ງເສີມໃຫ້ສັງຄົມຫັນມານໍາໃຊ້ລົດໄຟຟ້າ ແລະ ພະລັງງານທາງເລືອກໃຫ້ຫລາຍຂຶ້ນ ເປັນຕົ້ນໄດ້ໂຈະນໍາເຂົ້າຊົ່ວຄາວລົດເບົາທີ່ໃຊ້ນໍ້າມັນເຊື້ອໄຟ ຊຶ່ງໃນໄລຍະ 3 ເດືອນຜ່ານມາ, ຕົວ ເລກການນໍາເຂົ້າພາຫະນະໄຟຟ້າ ແລະ ພະລັງງານທາງເລືອກ ເພີ່ມຂຶ້ນ 5.514 ຄັນ (ບໍ່ລວມລົດ 2-3 ລໍ້), ຄິດເປັນມູນຄ່າ 101,6 ລ້ານ ໂດລາສະຫະລັດ ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນເຖິງ 140,7%.
ຂປລ.ທ່ານ ສອນໄຊ ສີພັນດອນ ນາຍົກລັດຖະມົນຕີໄດ້ຊີ້ແຈງຕໍ່ຄຳສັກຖາມຂອງສະມາຊິກສະພາແຫ່ງຊາດ ກ່ຽວກັບບັນຫາດັ່ງກ່າວ ໃນກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ X ໃນວັນທີ 8 ກໍລະກົດ 2026 ນີ້ວ່າ: ເພື່ອຮັບມືກັບຄວາມບໍ່ແນ່ນອນ ແລະ ຫລຸດຜ່ອນຜົນກະທົບຂອງລາຄານໍ້າມັນເຊື້ອໄຟ ທີ່ມີທ່າອ່ຽງເພີ່ມສູງຂຶ້ນ ທັງໃນສະເພາະໜ້າ ແລະ ຍາວນານລັດຖະບານ ໄດ້ອອກນິຕິກຳ ແລະ ມາດຕະການຕ່າງໆ ເພື່ອຊຸກຍູ້ສົ່ງເສີມໃຫ້ສັງຄົມຫັນມານຳໃຊ້ລົດໄຟຟ້າແທນລົດນ້ຳມັນໃຫ້ຫລາຍຂຶ້ນ ໂດຍໄດ້ຄົ້ນຄວ້າປັບປຸງລະບຽບການຕ່າງໆ ກ່ຽວກັບການຄຸ້ມຄອງຍານພາຫະນະທາງບົກໃຫ້ສອດຄ່ອງກັບການຂະຫຍາຍຕົວ ຂອງການນໍາໃຊ້ລົດໄຟຟ້າໃນປັດຈຸບັນ, ຄົ້ນຄວ້າ ແລະ ກຳນົດໂຄງສ້າງລາຄາຈໍາໜ່າຍລົດໄຟຟ້າ (EV) ໃຫ້ມີຄວາມເໝາະສົມ ເພື່ອປ້ອງກັນການສວຍໂອກາດຂຶ້ນລາຄາ ແລະ ສ້າງຄວາມເປັນທຳໃຫ້ຜູ້ບໍລິໂພກ, ພ້ອມທັງໄດ້ແຕ່ງຕັ້ງຄະນະກຳມະການຊີ້ນໍາລະດັບຊາດ ເພື່ອຜັນຂະຫຍາຍນະໂຍບາຍສົ່ງເສີມການໃຊ້ລົດໄຟຟ້າ ແລະ ພະລັງງານທາງເລືອກໃຫ້ເປັນຮູບປະທຳ.
ພ້ອມນີ້, ເພື່ອສ້າງຄວາມເຊື່ອໝັ້ນໃນການນໍາໃຊ້ລົດໄຟຟ້າ ລັດຖະບານໄດ້ອະນຸມັດໃຫ້ສະເພາະບໍລິສັດທີ່ເປັນຕົວແທນຈຳໜ່າຍ ແລະ ມີສູນບໍລິການຫລັງການຂາຍເທົ່ານັ້ນ ທີ່ຈະສາມາດນໍາເຂົ້າລົດໄຟຟ້າໄດ້, ທັງນີ້ກໍເພື່ອຮັບປະກັນ ແລະ ສາມາດຕອບສະໜອງການບໍລິການສ້ອມແປງໃຫ້ແກ່ສັງຄົມຢ່າງທົ່ວເຖິງ.
ຂ່າວ: ທະນູທອງ; ພາບ: ອ່າຍຄຳ
KPL
