ຂປລ. ໃນວັນທີ 12 ກໍລະກົດ 2024 ນີ້, ກະຊວງການຕ່າງປະເທດ ໃນນາມອະນຸກໍາມະການ ກອງເລຂາຄະນະຊີ້ນຳລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນ ປີ 2024 ຈັດເຜີຍແຜ່ ຽວກັບການກະກຽມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມທີ່ກ່ຽວຂ້ອງ ທີ່ຈະຈັດຂຶ້ນໃນວັນທີ 21-27 ກໍລະກົດ 2024 ທີ່ຈະມາເຖິງນີ້, ທີ່ ຫໍປະຊຸມແຫ່ງຊາດ, ນະຄອນຫລວງວຽງຈັນ ໃຫ້ແກ່ບັນດາທູຕານຸທູດ ປະເທດສະມາຊິກອາຊຽນ, ຄູ່ຮ່ວມເຈລະຈາອາຊຽນ ແລະ ຄູ່ຮ່ວມມືພາຍນອກອາຊຽນ ທີ່ຈະເຂົ້າຮ່ວມ       ບັນດາກອງປະຊຸມດັ່ງກ່າວ ໂດຍການເປັນປະທານຂອງ ທ່ານ ຈາຕຸລົງ ບົວສີສະຫວັດ ຫົວໜ້າກົມອາຊຽນ, ກະຊວງການຕ່າງປະເທດ ໂດຍມີຜູ້ຕາງໜ້າຈາກກົມພິທີການທູດ, ກົມການຂ່າວ, ກົມກົງສຸນ ແລະ ກົມເສດຖະກິດ, ກະ ຊວງການຕ່າງປະເທດ ແລະ ກົມການບິນພົນລະເຮືອນ, ກະຊວງໂຍທາທິການ ແລະ ຂົນສົ່ງ ເຂົ້າຮ່ວມບັນຍາຍ.

ການຈັດເຜີຍແຜ່ໃນຄັ້ງນີ້, ເພື່ອແຈ້ງກ່ຽວກັບການກະກຽມດ້ານພາລະທິການຕ່າງໆເຊັ່ນ: ສະຖານທີ່ຈັດກອງປະຊຸມ, ສະຖານທີ່ພັກເຊົາ, ພາຫະນະຮັບໃຊ້, ຂັ້ນຕອນການຂໍວິຊາເຂົ້າ-ອອກປະເທດ, ການກຽມຄວາມພ້ອມຂອງສະໜາມບິນ, ຄວາມພ້ອມຂອງສູນຂ່າວ ແລະ ແຜນການເຄື່ອນໄຫວ ອື່ນໆ.

ພາຍຫລັງໄດ້ຮັບຟັງການເຜີຍແຜ່ ຄວາມຄືບໜ້າດ້ານຕ່າງໆແລ້ວ, ບັນດາຜູ້ເຂົ້າຮ່ວມກອງປະຊຸມ ຍັງໄດ້ໄປຢ້ຽມຊົມ ສະຖານທີ່ປະຊຸມຕົວຈິງຢູ່ ຫໍປະຊຸມແຫ່ງຊາດ ໂດຍສະເພາະບັນດາຫ້ອງປະຊຸມ, ຫ້ອງຮັບແຂກ, ຫ້ອງທີ່ຈັດໃຫ້ແຕ່ລະປະເທດ, ຫ້ອງອາຫານ, ຫ້ອງງານລ້ຽງ ແລະ ຫ້ອງອື່ນໆ ທີ່ຈະຮັບໃຊ້ໃນໄລຍະກອງປະຊຸມ ລັດຖະມົນ ຕີຕ່າງປະເທດອາຊຽນ ໃນຄັ້ງນີ້. 

ໃນໂອກາດກອງປະຊຸມ ລັດຖະມົນຕີຕ່າງປະເທດອາຊຽນ ຄັ້ງທີ 57 ຄັ້ງນີ້, ຈະມີກອງປະຊຸມລະດັບລັດຖະ ມົນຕີຕ່າງປະເທດປິ່ນອ້ອມອື່ນໆ ກັບປະເທດຄູ່ເຈລະຈາ, ຄູ່ຮ່ວມມືຂະແໜງການ ແລະ ຄູ່ຮ່ວມມືໃນຂອບແມ່ນໍ້າຂອງ, ລວມແລ້ວຈະມີກອງປະຊຸມ ລະດັບລັດຖະມົນຕີ ປະມານ 25 ກອງປະຊຸມ ແລະ ມີລັດຖະມົນຕີຕ່າງປະເທດ ແລະ ຕາງໜ້າ 35 ປະເທດເຂົ້າຮ່ວມ. ຄະນະຜູ້ແທນທີ່ຈະເດີນທາງ ມາເຂົ້າຮ່ວມກອງປະຊຸມ ແມ່ນມີຫລາຍກວ່າ 1.000 ທ່ານ ແລະ ມີນັກຂ່າວຈາກພາຍໃນ ແລະ ຕ່າງປະເທດ ມາເກັບກຳຂ່າວ ຫລາຍກ່ວາ 500 ທ່ານ.

ພາບ: ຂັນໄຊ

KPL