ຂປລ. ແຫລ່ງຂ່າວຈາກ ເມືອງໝື່ນ ແຂວງວຽງຈັນ ໃຫ້ຮູ້ວ່າ: ເມືອງໝື່ນ ແຂວງວຽງຈັນ ສະເຫລີມສະຫລອງ ວັນເດັກນ້ອຍສາກົນຄົບຮອບ 100 ປີ, ວັນປູກຕົ້ນໄມ້ແຫ່ງຊາດ ຄົບຮອບ 44 ປີ ຕິດພັນກັບການສະເຫລີມສະຫລອງວັນສິ່ງແວດລ້ອມແຫ່ງຊາດ ຄົບຮອບ 25 ປີ ແລະ ວັນສິ່ງແວດລ້ອມໂລກຄົບຮອບ 52 ປີ ໃນວັນທີ 4 ມິຖຸນາ 2024 ທີ່ໂຮງຮຽນ ມັດທະຍົມຕອນຕົ້ນ ນາປ່າໄຜ່ ເມືອງໝື່ນ, ແຂວງວຽງຈັນ ໂດຍການເປັນປະທານຂອງ ທ່ານ ພອນເທີດ ສຸຫວັດດີ ເຈົ້າເມືອງໆໝື່ນ, ທ່ານ ຊົກຈູນຫົງ ຜູ້ອຳນວຍການໃຫຍ່ ອົງການ ກູດເນເບີ ປະຈຳ ສປປ ລາວ ພ້ອມດ້ວຍພະນັກງານ-ລັດຖະກອນ ອ້ອມຂ້າງເມືອງ, ສະມາຊິກຊາວໜຸ່ມ-ເຍົາວະຊົນ ເຂົ້າຮ່ວມຢ່າງເປັນຂະບວນຟົດຟື້ນ.
  ທ່ານ ສາຍຝົນ ສໍສັກສິດ ຫົວໜ້າ ຫ້ອງການ ສຶກສາທິການ ແລະ ກິລາເມືອງ ໄດ້ລາຍງານ: ການ ສະເຫລີມສະຫລອງວັນເດັກນ້ອຍສາກົນ ຄັ້ງນີ້ ກໍເພື່ອເປັນການປູກຈິດສຳນຶກ ໃຫ້ເດັກນ້ອຍ ມີນ້ຳໃຈຮັກຊາດ, ຮັກບ້ານເກີດເມືອງນອນ, ມີຄວາມຮູ້ຄວາມສາມາດ, ມີສະຕິປັນຍາ, ມີຄຸນສົມບັດສິນທຳປະຕິວັດ ທັງເປັນການສ້າງເງື່ອນໄຂໂອກາດ ໃຫ້ເດັກນ້ອຍມີສ່ວນຮ່ວມ ໃນການສະແດງຄວາມຄິດເຫັນ ແລະ ຄວາມສາມາດຂອງຕົນເອງໃນດ້ານຕ່າງໆ.
  ທ່ານ ພອນເທີດ ສຸຫວັດດີ ໄດ້ກ່າວວ່າ: ຄະນະພັກ-ອົງການປົກຄອງ ເມືອງໝື່ນ ໄດ້ຖືສໍາຄັນຕໍ່ກັບການຂະຫຍາຍເນື້ອທີ່ປູກຕົ້ນໄມ້ ເພື່ອຟື້ນຟູປ່າໄມ້ ໂດຍມອບໃຫ້ຫ້ອງການ ກະສິກໍາ-ປ່າໄມ້ເມືອງ, ຫ້ອງການ ຊັບພະຍາກອນທໍາມະຊາດ-ສິ່ງແວດລ້ອມເມືອງ ແລະ ພາກສ່ວນກ່ຽວຂ້ອງ ເພື່ອກໍານົດວາງແຜນການຈັດພິທີປູກຕົ້ນໄມ້ ພ້ອມທັງປຸກລະດົມ ອົງການຈັດຕັ້ງ ທັງພາກລັດ-ເອກະຊົນ ໃນທົ່ວເມືອງ ປູກຕົ້ນໄມ້ໃຫ້ໄດ້ຫລາຍໆ ເພື່ອທົດແທນຕົ້ນໄມ້ທີ່ຕາຍແລ້ວ, ປູກຕົ້ນໄມ້ວັນນີ້ເພື່ອລູກຫລານ ໃນວັນໜ້າ  ພ້ອມທັງຮຽກຮ້ອງ ແລະ ເນັ້ນໃຫ້ຄະນະພັກ, ຄະນະນໍາທຸກຂັ້ນ ປຸກລະດົມທົ່ວສັງຄົມ ມີສ່ວນຮ່ວມຕໍ່ວຽກງານຄຸ້ມຄອງປ່າໄມ້, ບົວລະບັດຮັກສາຕົ້ນໄມ້ທີ່ປູກແລ້ວ ດ້ວຍການຫົດນໍ້າ, ໃສ່ຝຸ່ນ, ພວນດິນ, ເຮັດຮົ້ວອ້ອມ ແລະ ວິທີການອື່ນໆ ເພື່ອບໍ່ໃຫ້ຕົ້ນໄມ້ຕາຍ ຫລື ຖືກທໍາລາຍ. ການປູກຕົ້ນໄມ້ຄັ້ງນີ້ ໃນເນື້ອທີ່ທັງໝົດ 7.000 ຕາແມັດ, ໄມ້ທີ່ນໍາມາປູກ ມີໄມ້ດູ່ 350 ເບ້ຍ ແລະ ຕົ້ນໄມ້ປະດັບຈຳນວນໜຶ່ງ.
ໃນພິທີ ບັນດາຜູ້ເຂົ້າຮ່ວມ ຍັງໄດ້ຮັບຟັງສານ ຂອງນາຍົກລັດຖະມົນຕີ ໃນໂອກາດສະເຫລີມສະຫລອງ ວັນສິ່ງແວດລ້ອມແຫ່ງຊາດ ຄົບຮອບ 25 ປີ ແລະ ວັນສິ່ງແວດລ້ອມໂລກ ຄົບຮອບ 52 ປີ ພ້ອມທັງຊົມການສະແດງສິລະປະ ຂອງຫລານນ້ອຍນັກຮຽນ, ກິດຈະກຳແຕ້ມຮູບ, ຕອບຄຳຖາມວິທະຍາສາດ, ສະແດງລະຄອນ, ຮ້ອງເພັງ ແລະ ແຈກຂອງຂວັນຕ່າງໆໃຫ້ເດັກນ້ອຍ, ເຊິ່ງໄດ້ຮັບການສະໜັບສະໜູນຈາກອົງການກູດເນເບີ ປະຈຳ ສປປ ລາວ.

KPL