ຂປລ
ຂປລ. ໂຮງຮຽນວັດທະນະທຳຊົນເຜົ່າກອງທັບ ໄດ້ຈັດພິທີປິດສົກຮຽນ 2023-2024 ໃນວັນທີ 5 ມິຖຸນາ 2024 ໂດຍການເຂົ້າຮ່ວມເປັນປະທານຂອງ ສະຫາຍ ພົນຕີ ສອນທອງ ພົມລາວົງ ກຳມະການຄະນະປະຈຳພັກກະຊວງ ຮອງຫົວໜ້າກົມໃຫຍ່ ການເມືອງກອງທັບ, ມີຄະນະພັກ-ຄະນະອຳນວຍການໂຮງຮຽນ, ພະນັກງານ, ຄູອາຈານແລະ ນ້ອງນັກຮຽນເຂົ້າຮ່ວມ.
ຂປລ. ໂຮງຮຽນວັດທະນະທຳຊົນເຜົ່າກອງທັບ ໄດ້ຈັດພິທີປິດສົກຮຽນ 2023-2024 ໃນວັນທີ 5 ມິຖຸນາ 2024 ໂດຍການເຂົ້າຮ່ວມເປັນປະທານຂອງ ສະຫາຍ ພົນຕີ ສອນທອງ ພົມລາວົງ ກຳມະການຄະນະປະຈຳພັກກະຊວງ ຮອງຫົວໜ້າກົມໃຫຍ່ ການເມືອງ ກອງທັບ, ມີຄະນະພັກ-ຄະນະອຳນວຍການໂຮງຮຽນ, ພະນັກງານ, ຄູອາຈານແລະ ນ້ອງນັກຮຽນເຂົ້າຮ່ວມ.
ສະຫາຍ ພັນເອກ ສັງທອງ ສຸກສີສະຫວາດ ຫົວໜ້າຫ້ອງສຶກສາ ໂຮງຮຽນວັດທະນະທຳກອງທັບ ໄດ້ຜ່ານບົດສະຫລຸບວຽກງານການສຶກສາ ປະຈຳສົກຮຽນ 2023-2024 ໂດຍຍົກໃຫ້ເຫັນຫລາຍດ້ານທີ່ພົ້ນເດັ່ນ ໃນການຮຽນ-ການສອນ ຕະຫລອດ ໄລຍະການຮໍ່າຮຽນ ໃນສົກຮຽນນີ້, ຄະນະພັກ-ຄະນະອຳນວຍການໂຮງຮຽນ ໄດ້ຖືສຳຄັນໃນການສຶກສາອົບຮົມ ການເມືອງນຳພາແນວຄິດ ໃຫ້ພະນັກງານຄູ-ອາຈານ, ນັກຮຽນຢ່າງເປັນປົກກະຕິ ດ້ວຍຫລາຍຮູບການ ແລະ ເນື້ອໃນແຕກຕ່າງກັນ ໂດຍສະເພາະ ຄູ-ອາຈານ ໄດ້ເອົາໃຈໃສ່ປະຕິບັດ ຫຼັກສູດການຮຽນ-ການສອນ, ການຄົ້ນຄວ້າທວນຄືນສອບເສັງເລື່ອນຂັ້ນ ໃຫ້ນັກຮຽນໄດ້ຄົບຖ້ວນທັນກຳນົດເວລາ ທີ່ກະຊວງສຶກສາທິການ ແລະ ກິລາວາງອອກ ສະແດງອອກໃນການດໍາເນີນ ການສິດສອນຮໍ່າຮຽນຕາມ 3 ລັກສະນະ, 5 ຫລັກມູນ ການສຶກສາໄດ້ເປັນຢ່າງດີ ແລະ ສາມາດຕີລາຄາຜົນໄດຮັບ ໃນການຄົ້ນຄວ້າຮໍ່າຮຽນ ຂອງນັກຮຽນບັນລຸຕາມຄາດໝາຍ 100% ເຊິ່ງສາມາດໄດ້ຮັບໝາກຜົນ ການສອບເສັງໄດ້ດັ່ງນີ້: ສອບເສັງເລື່ອນຊັ້ນ ມ1 ຂຶ້ນ ມ2 ຈຳນວນ 134 ຄົນ, ເສັງໄດ້ 134 ຄົນ ເທົ່າກັບ 100%, ສອບເສັງເລື່ອນຊັ້ນ ມ5 ຂຶ້ນ ມ6 ຈຳນວນ 130 ຄົນ, ເສັງໄດ້ 130 ຄົນ ເທົ່າກັບ 100%, ສອບເສັງເລື່ອນຊັ້ນ ມ6 ຂຶ້ນ ມ7 ຈຳນວນ 132 ຄົນ, ເສັງໄດ້ 132 ຄົນ ເທົ່າກັບ 100%. ຈາກນັ້ນໃນພິທີ ກໍໄດ້ມອບໃບຍ້ອງຍໍ ນັກຮຽນດີຮຽນເກັ່ງ.
ໃນໂອກາດນີ້, ສະຫາຍ ພົນຕີ ສອນທອງ ພົມລາວົງ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຍາດມາໄດ້ ໂດຍສະເພາະຄະນະພັກ-ຄະນະອໍານວນການ, ພະນັກງານຫລັກແຫລງ, ຄູ-ອາຈານ, ຕະຫລອດພະນັກງານ-ນັກຮົບ ແລະ ນ້ອງນັກຮຽນ ທີ່ໄດ້ເອົາໃຈໃສ່ເຮັດ ສຳເລັດຕາມແຜນ ການຮຽນ-ການສອນໃນສົກຮຽນ 2023- 2024 ດ້ວຍຜົນສໍາເລັດອັນຈົບງາມ. ພ້ອມນີ້, ຍັງໄດ້ເນັ້ນຫນັກໃຫ້ຄະນະອຳນວຍການໂຮງຮຽນ ຈົ່ງສືບຕໍ່ອົບຮົມວຽກງານການເມືອງ ນໍາພາແນວຄິດໃຫ້ ພະນັກງານ-ນັກຮົບ ໃນທົ່ວໂຮງຮຽນ ເພື່ອກະກຽມ ປະຕິບັດເຮັດໜ້າທີ່ ໃນສົກຮຽນໃໝ່ໃຫ້ໄດ້ຮັບໝາກຜົນສູງ. ສໍາລັບນ້ອງນັກຮຽນ ຕ້ອງຕັ້ງໜ້າຄົ້ນຄ້ວາຮໍ່າຮຽນ, ກຳແໜ້ນບົດຮຽນທີ່ຄູ-ອາຈານ ຖ່າຍທອດໃຫ້, ເວລາພັກຮຽນຕ້ອງເອົາຕັ້ງໃຈ ຄົ້ນຄວ້າທວນຄືນບົດຮຽນ, ເອົາໃຈໃສ່ອອກແຮງ ຝຶກຝົນຫລໍ່ຫລອມຕົນເອງ ໃນທຸກດ້ານຕາມມາດຖານເງື່ອນໄຂທີ່ທາງກະຊວງ ກໍຄື ໂຮງຮຽນວາງອອກ ເປັນຕົ້ນ ການປະຕິບັດລະບຽບແບບແຜນ, ບັນດາຂໍ້ກຳນົດ ແລະ ລະບຽບຂອງໂຮງຮຽນ ຢ່າງເຂັ້ມງວດຕາມ 7 ລະບອບ 18 ວຽກຂອງກອງທັບ ໃຫ້ສົມວ່າຕົນເປັນນັກຮຽນຮູ້ ຜູ້ສືບທອດທີ່ດີຂອງຊາດ ແລະ ຂອງກອງທັບ.
ຂ່າວ: ຄຳອ້າຍ ທອງວັນ
KPL
