ຂປລ. ເມືອງອາດສະພັງທອງ ​ແຂວງ​ສະຫວັນ​ນະ​ເຂດ ມີ​ເປົ້າ​ໝາຍກຸ້ມ​ເປົ້າ​ໝາຍ​ສັກ​ວັກ​ຊິນ​ ກັນ​ພະຍາດໝາກ​ແດງ​ນ້ອບ ​ແລະ ໝາກ​ແດງ​ໃຫຍ່ ​ໃຫ້​ເດັກ​ອາຍຸ​ຕໍ່າ​ກວ່າ 5 ປີ​ລົງ​ມາ ຈໍານວນ 3 ພັນກວ່າຄົນ ​ໂດຍ​​ໄດ້​ເປີດ​ຂະ​ບວນສັກ​ວັກ​ຊິນ​ດັ່ງກ່າວ ແຕ່ວັນທີ 20-26 ພຶດສະພາ 2024 ສາມາດສັກວັກຊິນໃຫ້ເດັກກຸ່​ເປົ້າ​ໝາຍ ໄດ້ 2.800 ກວ່າຄົນ ຫລື ປະມານ 71,35%.

ໃນວັນທີ 27 ພຶດສະພາ 2024 ຜ່ານ​ມາ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແລະ ກະຊວງສາທາລະນະສຸກ ຮ່ວມກັບ ພະແນກສາທາລະນະສຸກ ແຂວງສະຫວັນນະເຂດ ໄດ້ລົງຕິດຕາມການສັກ​ວັກ​ຊິນ ​ກັນ​ພະຍາດໝາກ​ແດງ​ນ້ອບ ​ແລະ ໝາກ​ແດງ​ໃຫຍ່ ໂດຍມີ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ທ່ານ ວິສິດ ຄໍາລືຊາ ຫົວໜ້າສູນສະຖິຕິ ແລະ ຂ່າວສານກະຊວງສາທາລະນະສຸກ, ມີພະນັກງານແພດໝໍແຂວງ,  ພະນັກງານແພດໝໍປະຈໍາສຸກສາລາເມືອງ  ແລະ ປະຊາຊົນ ເຂົ້າຮ່ວມ.

ທ່ານ ໄພທູນ ສີດາວົງ ຮອງຫົວໜ້າຫ້ອງການສາທາລະນະສຸກ ເມືອງອາດສະພັງທອງ ​ໄດ້​ໃຫ້​ຮູ້ວ່າ: ຂະບວນການສັກວັກຊິນໝາກແດງນ້ອຍ ແລະ ໝາກແດງ​ໃຫຍ່ ​ແມ່ນ​ເນັ້ນໃສ່ເດັກນ້ອຍທີ່ມີອາຍຸຕ່ຳກວ່າ 5 ປີ ​ໂດຍ​ບໍ່​ເສຍ​ຄ່າ. ທັງ​ນີ້, ກໍ​​ເພື່ອຊ່ວຍສະກັດກັ້ນ ການແພ່ລະບາດຂອງພະຍາດດັ່ງກ່າວ ​ເພາະປັດຈຸບັນເຫັນໄດ້ວ່າ ​ໃນ​ທົ່ວ​ໂລກມີກໍລະນີ​ຜູ້​ຕິ​ດ​ເຊື້ອພະຍາດ​ດັ່ງກ່າວ ​ເພີ່ມ​ຂຶ້ນ ເນື່ອງຈາກມີອັດຕາການສັກວັກ​ຊິນ ກັນພະຍາດຕ່ຳລົງໃນກຸ່ມເດັກນ້ອຍ ເຊິ່ງການສັກວັກຊິນມີບົດບາດສໍາຄັນ ໃນການຕໍ່ສູ້ກັບພະຍາດ ຄຸກຄາມຮ້າຍແຮງ ທີ່ເກີດຈາກພະຍາດໝາກແດງນ້ອຍ ແລະ ໝາກແດງ​ໃຫຍ່. ສະ​ເພາະເມືອງອາດສະພັງທອງ ​​ແມ່ນມີ​ເປົ້າ​ໝາຍກຸ້ມ​ເປົ້າ​ໝາຍ​ສັກ​ວັກ​ຊິນ ​ກັນ​ພະຍາດໝາກ​ແດງ​ນ້ອບ ​ແລະ ໝາກ​ແດງ​ໃຫຍ່ ຈໍານວນ 3 ພັນກວ່າຄົນ, ປັດຈຸບັນ​ປະຕິບັດ​ໄດ້​ແລ້ວ 2.800 ກວ່າຄົນ.

ໂອກາດ​ນີ້, ທ່ານ ໂພສີ ແກ້ວມະນີວົງ ໄດ້ມີ​ຄຳ​ເຫັນວ່າ: ກະຊວງ ຖວທ ໄດ້ປະກອບສ່ວນຢ່າງ​ແຂງ​ແຮງ ໃນການໂຄສະນາ ໃຫ້ຄວາມຮູ້ແກ່ຊຸມຊົນກ່ຽວກັບ ຜົນດີຂອງການສັກວັກຊິນກັນພະຍາດ   ໝາກແດງນ້ອຍ ແລະ ໝາກແດງ​ໃຫຍ່ ຜ່ານວິທະຍຸ, ໂທລະພາບ, ໜັງສືພິມ, ສື່ສັງຄົມອອນລາຍ ແລະລະບົບໂທລະໂຄ່ງຊຸມຊົນ. ສື່​ມວນ​ຊົນ​ ມີ​ຄວາມ​ສາມາດ ​ໃນ​ການ​ເຂົ້າ​ເຖິງ​ຊຸມຊົນຢ່າງ​ກວ້າງຂວາງ ​ແລະຫລາກ​ຫລາຍ​ດ້ວຍ​ຂໍ້ຄວາມ​ທີ່ເຂົ້າໃຈງ່າຍ ​​ທີ່​ຈະ​ສົ່ງ​ຜົນ​ສະທ້ອນ​ທາງ​ບວກ ໃຫ້ແກ່ສຸຂະພາບຂອງແມ່ແລະ ເດັກ, ເຮັດໃຫ້ຄອບຄົວມີຂໍ້ມູນ ໃນການຕັດສິນໃຈ ກ່ຽວກັບການສັກວັກຊິນ ໃຫ້ລູກຂອງເຂົາເຈົ້າ, ບົດບາດ. ພ້ອມ​ນີ້, ສື່ມວນຊົນລາວ ແມ່ນໄດ້ຊ່ວຍ​ປຸກລະດົມ​ພໍ່​-ແມ່​ຜູ້ປົກຄອງ ແລະ ​ຜູ້ເບິ່ງແຍງ ເພື່ອຮັບປະກັນ​ວ່າ ຈະ​ບໍ່​ມີ​ເດັກນ້ອຍ​ຖືກ​ປະ​ຖິ້ມ​ໄວ້​ ໂດຍ​ບໍ່​ມີ​ການ​ປົກ​ປ້ອງ.

ພ້ອມ​ນີ້, ທ່ານ ວິສິດ ຄໍາລືຊາ ຍັງ​ໄດ້ກ່າວວ່າ: ວຽກງານໂຄສະນາ ສັກ​ວັກ​ຊິນ​ກັນ​ພະຍາດໝາກ​ແດງ​ນ້ອບ ​ແລະ ໝາກ​ແດງ​ໃຫຍ່ ແມ່ນໄດ້ອາ​​ໄສບັນດາສື່ເຊັ່ນ: ວິທະຍຸ, ໂທລະພາບ, ໜັງສືພີມ, ສື່ອອນລາຍ, ເຟສບຸກ ແລະ ໂຄສະນາເຄື່ອນໄຫວຢູ່ແຂວງ, ເມືອງ, ຊຸມຊົນ, ໂທລະໂຄງເມືອງ ແລະ ບ້ານ ໄດ້ຮັບການອະນຸມັດຈາກອົງການອະນາໄມໂລກ, ກະຊວງສາທາລະນະສຸກ ແລະ ໄດ້ຮັບການຢັ້ງຢືນວ່າປອດໄພ ແລະ ມີປະສິດທິພາບໃນການປົກປ້ອງເດັກນ້ອຍ ຈາກພະຍາດຮ້າຍແຮງ ແລະ ພະຍາດທີ່ອັນຕະລາຍ ເຖິງຊີວິດ.

ຂ່າວ-ພາບ: ຂັນໄຊ

KPL