ຂປລ
ອົງການສະຖິຕິສະຫະພັນ ເຢຍລະມັນ ເປີດເຜີຍເມື່ອບໍ່ດົນມານີ້ ວ່າ, ສ.ອາເມລິກາ ບໍ່ໄດ້ເປັນຄູ່ຮ່ວມການຄ້າ ຂະໜາດໃຫຍ່ທີ່ສຸດ ຂອງ ເຢຍລະມັນ.
ຂປລ. ວິທະຍຸໂທລະພາບ ສູນກາງຈີນ ຊີເອັມຈີ ລາຍງານວ່າ: ອົງການສະຖິຕິສະຫະພັນ ເຢຍລະມັນ ເປີດເຜີຍເມື່ອບໍ່ດົນມານີ້ ວ່າ, ສ.ອາເມລິກາ ບໍ່ໄດ້ເປັນຄູ່ຮ່ວມການຄ້າ ຂະໜາດໃຫຍ່ທີ່ສຸດ ຂອງ ເຢຍລະມັນ. ໃນຂະນະທີ່ 8 ເດືອນ ເລີ່ມແຕ່ ມັງກອນ-ເດືອນສິງຫາ ທີ່ຜ່ານມາ, ຈີນ ໄດ້ກາຍເປັນຄູ່ຮ່ວມ ການຄ້າ ໃຫຍ່ທີ່ສຸດ ຂອງ ເຢຍລະມັນ.
ຕົວເລກ ສະຖິຕິ ດັ່ງກ່າວ ໄດ້ສະແດງ ໃຫ້ເຫັນວ່າ: ໃນ 8 ເດືອນປີນີ້, ຍອດມູນຄ່າ ການສົ່ງອອກ ຂອງ ເຢຍລະມັນ ໄປຍັງ ສ.ອາເມລິກາ ບັນລຸ 101 ຕື້ເອີໂຣ, ຫລຸດລົງ 6,5% ເມື່ອທຽບໃສ່ ໄລຍະດຽວກັນ ຂອງ ປີກາຍ, ໃນນັ້ນ, ຍອດມູນຄ່າ ການສົ່ງອອກ ໃນເດືອນສິງຫາ ລວມມີ 10,9 ຕື້ເອີໂຣ, ຫລຸດລົງ 2,5% ເມື່ອທຽບໃສ່ ເດືອນກໍລະກົດ ປີນີ້ ແລະ ຫລຸດລົງ 20,1% ເມື່ອທຽບໃສ່ ໄລຍະດຽວກັນ ຂອງ ປີກາຍ, ເປັນລະດັບ ຕ່ຳສຸດ ນັບແຕ່ ເດືອນພະຈິກ 2021 ເປັນຕົ້ນມາ. ໃນ 8 ເດືອນຜ່ານມາ, ຍອດມູນຄ່າ ການນຳເຂົ້າ ຂອງ ເຢຍລະມັນ ຈາກ ສ.ອາເມລິກາ ລວມມີ 63,4 ຕື້ເອີໂຣ. ສະມາຄົມການຂາຍຍົກ ແລະ ການຄ້າກັບຕ່າງປະເທດ ເຢຍລະມັນ ກ່າວວ່າ: ເນື່ອງຈາກນະໂຍບາຍພາສີ ຂອງ ສ.ອາເມລິກາ ເປັນສາເຫດ ສຳຄັນ ທີ່ເຮັດໃຫ້ ຍອດມູນຄ່າ ການສົ່ງອອກ ຂອງ ເຢຍລະມັນ ຕໍ່ກັບສ.ອາເມລິກາ ຫລຸດໜ້ອຍຖອຍລົງ./
KPL
