*ທ່ານ ແກ້ວ ພິມມະວົງ ເຈົ້າເມືອງຊະນະຄາມ ແຂວງວຽງຈັນ ໄດ້ໃຫ້ສຳພາດເມື່ອບໍ່ດົນມານີ້ໃນການກະກຽມວຽກງານຮອບດ້ານໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນຂອງພັກວ່າ: ພາຍຫລັງໄດ້ມີຄໍາສັ່ງຂອງຄະນະເລຂາທິການສູນກາງພັກເລກທີ 411/ຄລສພ, ລົງວັນທີ 8 ສິງຫາ2023; ຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 211/ຄຈສພ, ລົງວັນທີ 16 ສິງຫາ 2023; ຄຳສັ່ງຂອງຄະນະປະຈຳພັກແຂວງວຽງຈັນເລກທີ 019, ເລກທີ 020/ຄປພ.ວຈ; ຄຳແນະນຳຂອງຄະນະຈັດຕັ້ງແຂວງ ວຽງຈັນ ເລກທີ 785/ຄຈຂ.ວຈ, ລົງວັນທີ 2 ຕຸລາ 2023 ວ່າດ້ວຍການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ແລະ ໜັງສືແຈ້ງການຂອງຫ້ອງວ່າການແຂວງ ວຽງຈັນ ເລກທີ 889/ຫວຂ.ວຈ, ລົງວັນທີ 22 ທັນວາ 2023 ກ່ຽວກັບແຜນການເຄື່ອນໄຫວລົງຊຸກຍູ້ການກະກຽມດ້ານເນື້ອໃນຮອບດ້ານກອງປະຊຸມໃຫຍ່ຂອງອົງຄະນະພັກເມືອງ, ຄະນະພັກກໍໄດ້ຈັດຕັ້ງຜັນຂະຫຍາຍອອກເປັນຄໍາສັ່ງ ແລະ ມະຕິຕົກລົງຂອງຄະນະປະຈຳພັກເມືອງວ່າດ້ວຍການແຕ່ງຕັ້ງຄະນະຮັບຜິດຊອບກະກຽມ ແລະ ດຳເນີນກອງປະຊຸມໃຫຍ່ສະໄໝທີ VIII.

    ທ່ານ ແກ້ວ ພິມມະວົງ ໃຫ້ຮູ້ອີກວ່າ: ມາຮອດປັດຈຸບັນເມືອງໄດ້ສໍາເລັດການດໍາເນີນກອງປະຊຸມໃຫຍ່ຄະນະອົງການປົກຄອງບ້ານສຳເລັດ 32 ບ້ານ, ຍັງ 1 ບ້ານ ແລະ ກໍາລັງດໍາເນີນກອງປະຊຸມໃຫຍ່ຂອງ ບັນດາໜ່ວຍພັກພາຍໃນສໍານັກງານ, ອົງການ ແລະ ກົມກອງພາຍໃນເມືອງ, ຫລັງຈາກອະນຸກຳມະການເນື້ອໃນ ແລະ ອະນຸກຳມະການດ້ານບຸກຄະລາກອນຂັ້ນແຂວງໄດ້ລົງມາຕິດຕາມກວດກາ ແລະ ຊຸກຍູ້ ການກະກຽມຄວາມພ້ອມຮອບດ້ານ (ຮອບທີ I) ແລ້ວ, ເມືອງໄດ້ເປີດກອງປະຊຸມຈັດຕັ້ງເຜີຍແຜ່ເຊື່ອມຊຶມໃຫ້ຄະນະບໍຫານງານພັກເມືອງ, ຄະນະພັກຮາກຖານ, ຄະນະໜ່ວຍພັກ ແລະ ອະນຸກຳມະການຮັບຜິດຊອບແຕ່ລະດ້ານໄດ້ຮັບຮູ້ເຂົ້າໃຈ, ກຳແໜ້ນເນື້ອໃນດັ່ງກ່າວ, ສ້າງຄວາມເປັນເອກະພາບໃນການຈັດຕັ້ງປະຕິບັດໂດຍມອບໃຫ້ແຕ່ລະອະນຸກຳມະການຈັດຕັ້ງຜັນຂະຫຍາຍເປັນແຜນການ, ແຜນວຽກລະອຽດຕາມຄວາມຮັບຜິດຊອບຂອງຕົນເປັນຕົ້ນ: ການກະກຽມດ້ານເນື້ອໃນບົດຕ່າງໆ, ສັບຊ້ອນຈັດວາງບຸກຄະລາກອນຂຶ້ນແຜນງົບປະມານ-ແຜນອຸປະກອນຮັບໃຊ້ຕ່າງໆ, ແຜນຄາດຄະເນເປົ້າໝາຍເຂົ້າຮ່ວມກອງປະຊຸມໃຫຍ່ສ້າງຂະບວນການ, ພິທີການ, ສະຖານທີ່ຕ່າງໆ, ຂະບວນການປ້ອງກັນຄວາມສະຫງົບເປັນລະບຽບຮ້ອຍໃນທົ່ວເມືອງ ແລະ ເອກະພາບກໍານົດໄລຍະເວລາເປີດກອງປະຊຸມໃຫຍ່ຂັ້ນເມືອງ ສະໄໝທີ VIII.

     ຈາກນັ້ນ, ອະນຸກໍາມະການແຕ່ລະດ້ານໄດ້ເອົາໃຈໃສ່ເຕົ້າໂຮມຄະນະຮັບຜິດຊອບຂອງຕົນເພື່ອປຶກສາຫາລື, ສ້າງຄວາມເປັນເອກະພາບ, ແບ່ງຄວາມຮັບຜິດຊອບຢ່າງລະອຽດໂດຍສະເພາະອະນຸກຳມະການເນື້ອໃນໄດ້ກວດກາຄືນຈຳນວນເອກະສານຕ່າງໆ ທີ່ໃຊ້ເຂົ້າໃນກອງປະຊຸມໃຫຍ່, ກຳນົດຫ້ອງເຮັດວຽກພ້ອມທັງແບ່ງຄວາມຮັບຜິດຊອບ ຢ່າງລະອຽດໃນການກະກຽມບົດຈຳນວນ 24 ບົດ. ໂດຍເບື້ອງຕົ້ນ ແມ່ນເລັ່ງໃສ່ກະກຽມເນື້ອໃນ 4 ບົດ ໃຫຍ່ຄື: ບົດລາຍງານການເມືອງ, ບົດແຜນພັດທະນາເສດຖະກິດ-ສັງຄົມໂດຍໄດ້ແບ່ງອອກ ເປັນ 2 ທີມ ງານຮັບຜິດຊອບ, ມາຮອດປັດຈຸບັນ ການກະກຽມເນື້ອໃນບົດລາຍງານ ການເມືອງແມ່ນສຳເລັດ 30% ແລະ ແຜນພັດທະນາເສດຖະກິດ- ສັງຄົມສຳເລັດ 30% ແລະ ບົດປິ່ນ ອ້ອມຕ່າງໆຄາດວ່າຈະໃຫ້ສຳເລັດ ໃນລະຫວ່າງເດືອນ 4 ຫາເດືອນ 6 ປີ 2024, ສໍາລັບການເປີດກອງປະຊຸມໃຫຍ່ ສະໄໝທີ VIII ຜູ້ແທນອົງ ຄະນະພັກເມືອງຊະນະຄາມ ຄາດວ່າຈະໃຫ້ສໍາເລັດໃນລະຫວ່າງເດືອນ 10 ຫາເດືອນ 12 ປີ 2024.