ຂປລ. ໃນວັນທີ 9 ເມສາ 2024 ນີ້, ທ່ານ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍ ຜູ້ຕາງໜ້າຈາກຂະແໜງການ ທີ່ກ່ຽວຂ້ອງຂອງສູນກາງ ຮ່ວມກັບ ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນ ພ້ອມດ້ວຍຂະແໜງການ ທີ່ກ່ຽວຂ້ອງຂອງແຂວງສາລະວັນ ລົງເຄື່ອນໄຫວກວດກາ, ເກັບກໍາຂໍ້ມູນ ແລະ ປະຊຸມປຶກສາຫາລື ກ່ຽວກັບຄວາມຄືບໜ້າການກໍ່ສ້າງພື້ນຖານໂຄງລ່າງ ຂອງດ່ານທ້ອງຖິ່ນປາກຕາພານ ເມືອງລະຄອນເພັງ ແຂວງສາລະວັນ ເພື່ອກະກຽມຄວາມພ້ອມ ໃນການຍົກຂຶ້ນ ເປັນດ່ານສາກົນ.

ການລົງຕິດຕາມ, ກວດກາ ໃນຄັ້ງນີ້, ເປັນການປະຕິບັດຕາມກົດໝາຍ ວ່າດ້ວຍຊາຍແດນແຫ່ງຊາດ, ດໍາລັດວ່າດ້ວຍດ່ານຊາຍແດນ ແລະ ສະໜາມບິນສາກົນ ສະບັບເລກທີ 558/ລບ, ລົງວັນທີ 31 ທັນວາ 2018 ມາດຕາ 25 ແລະ ແຈ້ງການຂອງຫ້ອງວ່າການ ສໍານັກງານນາຍົກລັດຖະມົນຕີ ສະບັບເລກທີ 1581/ຫສນຍ, ລົງວັນທີ 24 ສິງຫາ 2023 ທີ່ເຫັນດີອະນຸມັດໃຫ້ອົງການ ປົກຄອງຂອງແຂວງສາລະວັນ ສືບຕໍ່ປັບປຸງໂຄງລ່າງພື້ນຖານ ເພື່ອກະ ກຽມຍົກລະດັບຂຶ້ນເປັນດ່ານສາກົນ ເຊິ່ງດ່ານດັ່ງກ່າວ ເປັນດ່ານຊາຍແດນທາງແມ່ນໍ້າຂອງ, ຕັ້ງຢູ່ເຊິ່ງໜ້າກັບຈຸດຜ່ານແດນຖາວອນ (ດ່ານສາກົນ) ປາກແຊງ, ກຸ່ມບ້ານພະລານ ເມືອງນາຕານ ແຂວງອຸບົນຣາຊະທານີ, ມີເສັ້ນທາງເຊື່ອມຕໍ່ ກັບເສັ້ນທາງຫລວງແຫ່ງຊາດ ເລກທີ 13 ໃຕ້, ເປັນທາງປູຢາງສອງຊັ້ນເລກທີ 2.6901 ຢູ່ຈຸດຕັດກັບສາມແຍກບ້ານຖໍ້າພວງ ເມືອງລະຄອນເພັງ ລວງຍາວປະມານ 17,5 ກິໂລແມັດ.

ຜ່ານການລົງສໍາຫລວດ, ເກັບກໍາຂໍ້ມູນເຫັນວ່າ ເປັນຈຸດຍຸດທະສາດທີ່ມີຄວາມສໍາຄັນໃຫ້ແກ່ການປະກອບ ສ່ວນອຳນວຍຄວາມສະດວກໃນການບໍລິການ, ການຂົນສົ່ງສິນຄ້າ ລະຫວ່າງ ະເທດ, ຜູ້ໂດຍສານ, ນັກທ່ອງທ່ຽວ, ການເຂົ້າ-ອອກຂອງປະຊາຊົນ, ປະກອບສ່ວນສ້າງສາຍພົວພັນ ມິດຕະພາບທີ່ດີກັບປະເທດເພື່ອນບ້ານ, ບັນດາປະ ເທດໃນພາກພື້ນ ແລະ ສາກົນ ແນໃສ່ເຮັດໃຫ້ການພັດທະນາເສດຖະກິດ ແລະ ສັງຄົມແຫ່ງຊາດໃຫ້ມີການຂະຫຍາຍຕົວ ແລະ ຍືນຍົງ ໂດຍສະເພາະ ຊີວິດການເປັນຢູ່ຂອງປະຊາຊົນ ແຂວງສາລະວັນ ກໍຄື ປະຊາຊົນລາວບັນດາເຜົ່າໃຫ້ມີ ຄວາມສົມບູນພູນສຸກຂຶ້້ນໄປເລື້ອຍໆ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ໃຫ້ມີຄວາມຮຸ່ງເຮືອງສີລິວິໄລ.

ປັດຈຸບັນ, ການກໍ່ສ້າງພື້ນຖານໂຄງລ່າງຂອງດ່ານ ແມ່ນມີຄວາມພ້ອມສົມຄວນ ແລະ ສຳເລັດໃນຫລາຍດ້ານ ໂດຍສະເພາະແຜນຜັງລວມຂອງດ່ານ, ເສັ້ນທາງຄົມມະນາຄົມ, ຕຶກອາຄານຫ້ອງການຂອງເຈົ້າໜ້າທີ່ ກວດກາຄົນເຂົ້າ-ອອກເມືອງ, ເຈົ້າໜ້າທີ່ພາສີ, ເຮືອນພັກພະນັກງານ, ບຸກຄະລາກອນ ແລະ ດ້ານອື່ນໆເຫັນວ່າມີຄວາມພ້ອມສົມຄວນ.

ໃນກອງປະຊຸມປຶກສາຫາລື ທ່ານຮອງລັດຖະມົນຕີກະຊວງການຕ່າງປະເທດ ໄດ້ຮັບຟັງການລາຍງານລະອຽດກ່ຽວກັບ ຄວາມຄືບໜ້າຂອງການກໍ່ສ້າງດ່ານ ຈາກເຈົ້າໜ້າທີ່ຂອງແຂວງສາລະວັນ, ພ້ອມທັງຮັບຟັງການປະກອບຄວາມຄິດເຫັນ ຂອງບັນດາຜູ້ຕາງໜ້າຈາກ ຂະແໜງການທີ່ກ່ຽວຂ້ອງຂອງສູນກາງ ແລະ ທ້ອງຖິ່ນ. ພ້ອມທັງ ໄດ້ໃຫ້ທິດຊີ້ນຳກ່ຽວກັບການກະກຽມຄວາມພ້ອມ ຍົກລະດັບດ່ານທ້ອງຖິ່ນປາກຕາພານ ຂຶ້ນເປັນດ່ານສາກົນນັ້ນ, ຈະຕ້ອງໄດ້ສືບຕໍ່ປັບປຸງພື້ນຖານໂຄງລ່າງຂອງດ່ານ, ກະກຽມບຸກຄະລາກອນ ຂອງທຸກຂະແໜງການ, ເຄື່ອງມືອຸປະກອນຮັບໃຊ້ ແລະ ດ້ານອື່ນໆ ໃຫ້ຄົບເງື່ອນໄຂຕາມມາດຕະຖານ ທີ່ໄດ້ກຳນົດໄວ້ໃນດຳລັດວ່າດ້ວຍ ດ່ານຊາຍແດນ ແລະ ສະໜາມບິນສາກົນ ເພື່ອຈະໄດ້ນຳສະເໜີຕໍ່ລັດຖະບານ ພິຈາລະນາອະນຸມັດໃນຂັ້ນຕໍ່ໄປ.

ຂ່າວ-ພາບ: ກຕທ

KPL