ປະຊາຊົນບ້ານແກ້ງເກິກ ໄດ້ຊົມໃຊ້ນໍ້າລິນໃນການພັດທະນາຊີວິດການເປັນຢູ່

12/02/2024 10:41
Email Print 244
ຂປລ ໃນໄລຍະເວລາ 20 ກວ່າປີຜ່ານມາ ທີ່ບໍລິສັດ ລ້ານຊ້າງມີເນໂຣນ ຈໍາກັດ ຫລື ທີ່ຮູ້ຈັກໃນໂຄງການຂຸດຄົ້ນບໍ່ຄຳ-ທອງເຊໂປນ ໄດ້ໃຫ້ການຊ່ວຍເຫລືອ ແລະ ພັດທະນາຊີວິດການເປັນຢູ່ຂອງປະຊາຊົນ ໃນເຂດໂຄງການໜຶ່ງໃນນັ້ນ ກໍແມ່ນໂຄງການຝາຍນໍ້າລິນ ບ້ານ ແກ້ງເກິກ ເມືອງວິລະບູລີ ແຂວງ ສະຫວັນນະເຂດ.

     *ໃນໄລຍະເວລາ 20 ກວ່າປີຜ່ານມາ ທີ່ບໍລິສັດ ລ້ານຊ້າງມີເນໂຣນ ຈໍາກັດ ຫລື ທີ່ຮູ້ຈັກໃນໂຄງການຂຸດຄົ້ນບໍ່ຄຳ-ທອງເຊໂປນ ໄດ້ໃຫ້ການຊ່ວຍເຫລືອ ແລະ ພັດທະນາຊີວິດການເປັນຢູ່ ຂອງປະຊາຊົນໃນເຂດໂຄງການ ໜຶ່ງໃນນັ້ນກໍແມ່ນ ໂຄງການຝາຍນໍ້າລິນ ບ້ານແກ້ງເກິກ ເມືອງວິລະບູລີ ແຂວງ ສະຫວັນນະເຂດ ຊຶ່ງປັດຈຸບັນໄດ້ກໍສ້າງສຳເລັດ ແລະ ມອບໃຫ້ປະຊາຊົນພາຍໃນບ້ານເປັນຜູ້ຄຸ້ມຄອງນໍາໃຊ້ເຂົ້າໃນການຜະລິດກະສິກໍາປູກຝັງ ແລະ ລ້ຽງສັດ ເປັນສິນ ຄ້າເພື່ອພັດທະນາຊີວິດການເປັນຢູ່ໃຫ້ດີຂຶ້ນເທື່ອລະກ້າວ. ໂຄງການຝາຍນໍ້າລິນ ແມ່ນຕັ້ງຢູ່ຫ້ວຍຈິງບ້ານແກ້ງເກິກ ເມືອງ ວິລະບູລີ ຫ່າງຈາກບ້ານໄປທາງທິດຕາເວັນຕົກສ່ຽງເໜືອປະມານ 2.500 ແມັດ ໂຄງການດັ່ງກ່າວ ໄດ້ຈັດຕັ້ງປະຕິບັດກໍ່ສ້າງແບບມີສ່ວນຮ່ວມ ໂດຍແມ່ນບໍລິສັດລ້ານຊ້າງ ມີເນໂຣນ ຈໍາກັດ ສະໜັບສະໜູນ ດ້ານງົບປະມານ ແລະ ສະໜອງອຸປະກອນໃຫ້ ແລະ ແຮງງານແມ່ນປະຊາຊົນພາຍໃນບ້ານເປັນຜູ້ເຮັດ, ນໍາພາໂດຍວິຊາການຫ້ອງ ການກະສິກໍາ ແລະ ປ່າໄມ້ເມືອງ ພ້ອມດ້ວຍວິຊາການໜ່ວຍງານພັດທະນາຊຸມຊົນພາກສະໜາມຂອງບໍລິສັດ.

    ຫົວງານຂອງຝາຍເຮັດດ້ວຍເບຕົງເສີມ ເຫລັກ ແລະ ກະຕ່າຫີນ ຝາຍມີຄວາມຍາວ 13 ແມັດ, ກວ້າງ 2 ແມັດ ແລະ ສູງ 2 ແມັດ, ລະບົບຊົມໃຊ້ດ້ວຍທໍ່ HDPE ເພື່ອລໍາລຽງນໍ້າຈາກຫົວງານ ຫາ ບ້ານມີລວງຍາວທັງໝົດ 2.600 ແມັດ, ຄວາມສູງລະດັບ ຫົວງານທຽບໃສ່ຄວາມສູງລະດັບບ້ານ 13 ແມັດ ສະເລ່ຍປະລິມານນໍ້າໄຫລໃນທໍ່ປະມານ 1,5 ລິດຕໍ່ວິ ນາທີ ໄດ້ເລີ່ມລົງມືກໍ່ສ້າງມາແຕ່ຕົ້ນເດືອນ ທັນວາ 2023 ແລະ ສໍາເລັດໃນທ້າຍເດືອນ ມັງກອນ 2024 ລວມມີມູນຄ່າການກໍ່ສ້າງທັງໝົດ 218 ລ້ານກວ່າກີບ ຫລື ເທົ່າກັບ 10.572 ໂດລາສະຫະລັດ. ທ່ານ ສະໝານ ອາເນກາ ຜູ້ອໍານວຍການໃຫຍ່ບໍລິສັດ ລ້ານຊ້າງ ມີເນໂຣນ ຈໍາກັດ ໄດ້ມີຄໍາເຫັນວ່າ: ການກໍ່ສ້າງຝາຍນໍ້າລິນຫ້ວຍຈິງຈຸດປະສົງຫລັກແມ່ນເພື່ອສະໜອງນໍ້າໃຫ້ແກ່ປະຊາຊົນ ບ້ານແກ້ງເກິກ ເຊິ່ງເປັນຜູ້ທີ່ໄດ້ຮັບຜົນປະໂຫຍດ ໂດຍກົງ ໃຫ້ໄດ້ນໍາໃຊ້ເຂົ້າໃສ່ໃນການ ປູກພືດພັນທັນຍາຫານຕ່າງໆ, ເຮັດ ສວນຄົວ ແລະ ລ້ຽງສັດຂະໜາດ ນ້ອຍ ໃນຄົວເຮືອນຂອງຕົນ, ໂຄງ ການດັ່ງກ່າວແມ່ນໄດ້ມາຈາກກອງ ທຶນພັດທະນາຊຸມຊົນບໍ່ຄໍາ ແລະ  ການປະກອບສ່ວນໃນການອອກແຮງງານຢ່າງຫ້າວຫັນຂອງຊາວ ບ້ານແກ້ງເກິກ ໂດຍໄດ້ຮັບການຊ້ີນໍາຈາກທ່ານເຈົ້າເມືອງວິລະບູລີ ກໍ່ຄື ພັກ-ລັດ, ອຳນາດການປົກຄອງທ້ອງຖິ່ນ ແລະ ອົງການຈັດຕັ້ງມະຫາຊົນຂັ້ນບ້ານ.

    ຜ່ານມາກວ່າ 20 ປີ ບໍລິສັດ ລ້ານຊ້າງມີເນໂຣນ ຈໍາກັດ ໄດ້ປະກອບສ່ວນທຶນພັດທະນາໃຫ້ແກ່ຊຸມຊົນທ້ອງຖິ່ນ ເຊິ່ງສົ່ງຜົນໃຫ້ປະຊາຊົນຢູ່ອ້ອມຂ້າງໂຄງການ ຂຸດຄົ້ນບໍ່ຄໍາ-ທອງເຊໂປນ ໄດ້ມີລະດັບຊີວິດການເປັນຢູ່ດີຂຶ້ນເປັນກ້າວໆ. ໃນນັ້ນ, ກອງທຶນພັດທະນາ ທ້ອງຖິ່ນ ໄດ້ສະໜອງທຶນເພີ່ມຂຶ້ນຈາກ 96.000 ໂດລາຕໍ່ປີ ຂື້ນເປັນ 750.000 ໂດລາຕໍ່ປີໃນປັດຈຸບັນ ເພື່ອພັດທະນາວຽກງານຮອບດ້ານຂອງເມືອງວິລະບູລີ ໃຫ້ມີຄວາມສີວິໄລຂຶ້ນໄປຢ່າງບໍ່ຢຸດຢັ້ງ. 

KPL

ຂ່າວອື່ນໆ

ads
ads

Top