ຂປລ
ຂປລ. ຕາມການລາຍງານຂອງ ທ່ານ ເຢ້ ຢ້າງ ຮອງຫົວໜ້າພະແນກສາທາລະນະສຸກ ແຂວງຊຽງຂວາງ ເມື່ອບໍ່ດົນນີ້ວ່າ: ພະແນກສາທາລະນະສຸກ ແຂວງຊຽງຂວາງ ເປັນຂະແໜງທີ່ສຳຄັນ ຕໍ່ວຽກງານສຸຂະພາບຈະເລີນພັນ ເຊິ່ງໄລຍະຜ່ານມາແມ່ນໄດ້ສຸມໃສ່ ວຽກງານໂພຊະນາການ, ການລ້ຽງລູກດ້ວຍນົມແມ່, ແມ່ຍິງຖືພາ, ພ້ອມທັງສຸມໃສ່ປຸກລະດົມ ໃຫ້ແມ່ຍິງຖືພາ ຕ້ອງມາເກີດລູກ ຢູ່ສະຖານທີ່ໃຫ້ບໍລິການ ແລະ ມາກວດ ຫລັງເກີດລູກ.
ຂປລ. ຕາມການລາຍງານຂອງ ທ່ານ ເຢ້ ຢ້າງ ຮອງຫົວໜ້າພະແນກສາທາລະນະສຸກ ແຂວງຊຽງຂວາງ ເມື່ອບໍ່ດົນນີ້ວ່າ: ພະແນກສາທາລະນະສຸກ ແຂວງຊຽງຂວາງ ເປັນຂະແໜງທີ່ສຳຄັນ ຕໍ່ວຽກງານສຸຂະພາບຈະເລີນພັນ ເຊິ່ງໄລຍະຜ່ານມາແມ່ນໄດ້ສຸມໃສ່ ວຽກງານໂພຊະນາການ, ການລ້ຽງລູກດ້ວຍນົມແມ່, ແມ່ຍິງຖືພາ, ພ້ອມທັງສຸມໃສ່ປຸກລະດົມ ໃຫ້ແມ່ຍິງຖືພາ ຕ້ອງມາເກີດລູກ ຢູ່ສະຖານທີ່ໃຫ້ບໍລິການ ແລະ ມາກວດ ຫລັງເກີດລູກ. ຄຽງຄູ່ກັນນີ້, ກໍເອົາໃຈໃສ່ຕໍ່ວຽກງານສັກຢາກັນພະຍາດ ໂດຍສະເພາະ ໃນເດັກລຸ່ມ 1 ປີ ແລະ ໄວຈະເລີນພັນ, ເອົາໃຈໃສ່ຕິດຕາມການຈະເລີນເຕີບໂຕ, ການໃຫ້ວິຕາມິນ, ໃຫ້ຢາຂ້າແມ່ທ້ອງຂອງເດັກລຸ່ມ 5 ປີ. ທັງໄດ້ເຮັດວຽກງານການບໍລິການ ແບບເຊື່ອມສານລົງຕິດຕາມ ບ້ານ, ລວມທັງການກວດທ້ອງແມ່ຍິງຖືພາ.
ຜ່ານການຈັດຕັ້ງປະຕິບັດໃນໄລຍະ 1 ປີທີ່ຜ່ານມາ, ເຫັນໄດ້ວ່າໃນ 10 ຕົວຊີ້ວັດທີ່ຕິດພັນກັບ ວຽກງານຂອງແມ່ ແລະ ເດັກນັ້ນ, 9 ຕົວຊີ້ວັດ ແມ່ນບັນລຸຕາມຄາດໝາຍ ໂດຍສະເພາະຕົວຊີ້ວັດ ກ່ຽວກັບນ້ຳຫນັກ, ລວງສູງຂອງເດັກ ລຸ່ມ 5 ປີ ບໍ່ໄດ້ມາດຕະຖານ ແມ່ນໄດ້ບັນລຸຕາມຄາດໝາຍ, ອັດຕາການຕາຍ ຂອງເດັກລຸ່ມ 1 ປີ ແລະ ເດັກລຸ່ມ 5 ປີ ແລະ ອັດຕາການຕາຍຂອງແມ່ ກໍບັນລຸຄາດໝາຍໃນປີນີ້, ຍັງເຫລືອພຽງອັດຕາການສັກວັກຊິນ ເທົ່ານັ້ນ ທີ່ຍັງບໍ່ບັນລຸຕາມຄາດໝາຍ, ເຖິງວ່າອັດຕາການສັກວັກຊິນ ຈະບໍ່ບັນລຸຄາດໝາຍ ແຕ່ເຫັນໄດ້ວ່າອັດຕາການສັກຢາ ກັນພະຍາດແມ່ນມີຄວາມຄືບໜ້າ ຖ້າທຽບໃສ່ປີທີ່ຜ່ານມາ.
ແຂວງຊຽງຂວາງ ມີທັງໝົດ 7 ເມືອງ. ໃນນັ້ນ, ມີແຕ່ 4 ເມືອງຄື: ເມືອງຄຳ, ເມືອງໜອງແຮດ, ເມືອງພູກູດ ແລະ ເມືອງຜາໄຊ ທີ່ໄດ້ຮັບການຈັດຕັ້ງປະຕິບັດວຽກງານສຸຂະ ພາບຈະເລີນພັນ. ໃນປີ 2022-2023, ອັດຕາການຂາດສານອາຫານໃນເດັກລຸ່ມ 5 ປີດີຂຶ້ນ, ອັດຕາການຕາຍຂອງແມ່ແລະເດັກຫລຸດລົງ, ການເຂົ້າເຖິງການບໍລິການ ທີ່ມີແພດຊ່ວຍແມ່ນເພີ່ມຂຶ້ນ, ໃນປີ 2022 ນ້ຳໜັກ ບໍ່ໄດ້ມາດຕະຖານ ຂອງເດັກລຸ່ມ5 ປີລົງມາມີ 18% ແລະ ປີ 2023 ມີພຽງແຕ່ 14%.
ແນວໃດກໍດີ, ປະຊາຊົນໃນເຂດຫ່າງໄກສອກຫລີກ ຢູ່ແຂວງຊຽງຂວາງ ຈໍານວນໜຶ່ງຍັງພົບຄວາມຫຍຸ້ງຍາກ ໃນການເຂົ້າເຖິງຂໍ້ມູນຂ່າວສານ ດ້ານໂພສະນາການ ໂດຍສະເພາະ ແມ່ນເສັ້ນທາງເຂົ້າເຖິງບ້ານ ໃນລະດູຝົນ ແມ່ນບໍ່ສາມາດໄປໄດ້, ປະຊາຊົນຈຳນວນໜຶ່ງຍັງບໍ່ມີສ່ວນຮ່ວມ ໃນການຈັດຕັ້ງປະຕິບັດ ວຽກງານແມ່ ແລະ ເດັກ, ຍ້ອນຍັງບໍ່ທັນເຂົ້າໃຈເຖິງ ຄວາມສຳຄັນຂອງການຮັກສາສຸຂະພາບ, ປະຊາຊົນຈຳນວນໜຶ່ງ ໄປເຮັດວຽກຢູ່ໄຮ່ຢູ່ສວນ ກໍບໍ່ໄດ້ມາພົບແພດໝໍ ແລະ ວຽກງານສຸຂະສຶກສາ ຢູ່ໃນຂັ້ນເມືອງ ຍັງບໍ່ທັນເຂັ້ມແຂງເທົ່າທີ່ຄວນ, ງົບປະມານໃນການຈັດຕັ້ງປະຕິບັດກໍມີຈຳກັດ.
ຂ່າວ-ພາບ: ມະໄລລັກ
KPL