ຂປລ
ຂປລ. ໃນວັນທີ 26 ເມສາ ນີ້, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ພົບປະໂອ້ລົມ ພະນັກງານຫລັກແຫລ່ງເມືອງໄຊທານີ, ເມືອງປາກງື່ມ ແລະ ພະນັກງານສານປະຊາ ຊົນເຂດ II ນະຄອນຫລວງວຽງຈັນ
ຂປລ. ໃນວັນທີ 26 ເມສາ ນີ້, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ພົບປະໂອ້ລົມ ພະນັກງານຫລັກແຫລ່ງເມືອງໄຊທານີ, ເມືອງປາກງື່ມ ແລະ ພະນັກງານສານປະຊາ ຊົນເຂດ II ນະຄອນຫລວງວຽງຈັນ ໂດຍທ່ານໄດ້ເນັ້ນຫລາຍບັນຫາສຳຄັນ ເພື່ອຮັບປະກັນໃຫ້ແກ່ການດຳເນີນຄະດີຕາມຂະບວນຍຸຕິທໍາ ມີຄວາມວ່ອງໄວ, ໂປ່ງໄສ, ພາວະວິໄສ ແລະ ຖືກຕ້ອງເປັນທຳ.
ທ່ານ ນາງ ວຽງທອງ ສີພັນດອນ ໄດ້ກ່າວວ່າ: ເພື່ອຮັບປະກັນໃຫ້ແກ່ການດຳເນີນຄະດີຕາມຂະບວນຍຸຕິທໍາໃຫ້ມີຄວາມວ່ອງໄວ, ໂປ່ງໄສ, ພາວະວິໄສ ແລະ ຖືກຕ້ອງເປັນທຳ ບົນຈິດໃຈບຸກທະລຸ, ມີຈັນຍາບັນ-ຈັນຍາທຳ, ເສຍສະລະເພື່ອສ່ວນລວມ, ເຮັດແທ້ທໍາຈິງ ແລະ ເຄົາລົບຕໍ່ກົດໝາຍ ຈຶ່ງເປັນໜ້າທີ່ ແລະ ຄວາມຮັບຜິດຊອບຂອງພະນັກງານ ທີ່ຈະຕ້ອງໄດ້ພ້ອມກັນເອົາໃຈໃສ່ແກ້ບາງຈຸດອ່ອນຂໍ້ ຄົງຄ້າງຄື: ຄະນະພັກສານປະຊາຊົນເຂດ II ນະຄອນຫລວງວຽງຈັນ ຕ້ອງໄດ້ເດັດດ່ຽວ ແລະ ເຂັ້ມງວດທີ່ສຸດໃນການຕັດສິນ, ພິພາກສາຄະດີ ໃຫ້ສອດຄ່ອງຕາມຫລັກການນໍາພາຂອງພັກ, ຮັບປະກັນຄວາມເປັນເອກະພາບ, ນໍາພາເປັນໝູ່ຄະນະ, ຄົ້ນຄວ້າບັນຫາຄະດີຢ່າງພາວະວິໄສ, ມີຄວາມໂປ່ງໄສໃນທຸກຂັ້ນຕອນ, ຖືກຕ້ອງຕາມຂໍ້ມູນຫລັກຖານ ແລະ ກົດໝາຍກໍານົດໄວ້; ສານປະຊາຊົນເຂດ ຕ້ອງໄດ້ສ້າງຄວາມເຂັ້ມແຂງໃຫ້ໄດ້ເປັນຜູ້ບໍລິການດີ, ບໍລິຫານທີ່ບໍລິສຸດໂປ່ງໄສ, ຊື່ສັດບໍລິສຸດ ສັດຊື່ຕໍ່ວິຊາຊີບ; ເອົາ ໃຈໃສ່ບໍາລຸງສ້າງພະນັກງານຂອງສານ ໃຫ້ມີຄວາມຮູ້ຄວາມສາມາດ, ຈັນຍາບັນ-ຈັນຍາທໍາ ແລະ ເປັນມືອາຊີບ ໃນການປະຕິບັດໜ້າທີ່ວຽກງານ ໂດຍສະເພາະຜູ້ພິພາກສາ ທີ່ເປັນຜູ້ຕັດສິນຊີ້ຂາດກ່ຽວກັບຄະດີ ຖືວ່າມີຄວາມສໍາຄັນຫລາຍ ເພາະການຕັດສິນ, ຊີ້ຂາດດັ່ງກ່າວແຕະຕ້ອງເຖິງຊີວິດ, ສຸຂະພາບ, ອິດສະລະພາບ, ກຽດສັກສີ ແລະ ສິດ ຜົນປະໂຫຍດອັນຊອບທຳຂອງພົນລະເມືອງ; ເອົາໃຈໃສ່ປະສານສົມທົບ ແລະ ປຶກສາຫາລື ກັບພາກສ່ວນທີ່ກ່ຽວຂ້ອງຂອງການດຳເນີນຄະດີຕາມຂະບວນຍຸຕິທຳ ເປັນ ຕົ້ນ ອົງການໄອຍະການປະຊາຊົນເຂດ, ຫ້ອງການຍຸຕິທຳເມືອງ, ເຈົ້າໜ້າທີ່ ປກສ ແລະ ພາກສ່ວນອື່ນທີ່ກ່ຽວຂ້ອງກັບການພິຈາລະນາແກ້ໄຂຄະດີທີ່ມີຄວາມຫຍຸ້ງຍາກ, ສັບສົນ, ພົວພັບກັບຫລາຍບັນຫາ ຕ້ອງໄດ້ປະສານສົມທົບ ແລະ ປຶກສາຫາລືແກ້ໄຂບັນຫາຮ່ວມກັນ ເພື່ອຮັບປະກັນໃຫ້ການດໍາເນີນຄະດີ ມີຄວາມຮັດກຸມ, ເປັນທີ່ເຊື່ອຖື ແລະ ຍອມຮັບຂອງປະຊາຊົນ, ສ້າງຄວາມໂປ່ງໄສໃນທຸກຂັ້ນຕອນຂອງການດຳເນີນຄະດີຕາມຂະບວນຍຸຕິທຳ, ນັບແຕ່ການສືບສວນ-ສອບສວນ, ການຄົ້ນຄວ້າກ່າວຟ້ອງ, ການຕັດສິນ-ພິພາກສາຄະດີ ຈົນເຖິງການຈັດຕັ້ງປະຕິບັດຄໍາຕັດສິນຂອງສານ ທີ່ໃຊ້ໄດ້ຢ່າງເດັດຂາດ, ໃນນັ້ນ ຖືການຕັດສິນ-ພິພາກສາຄະດີຖືກຕ້ອງຕາມກົດໝາຍ ແລະ ຖືກຕາມຄວາມເປັນຈິງ, ເປັນໃຈກາງ ແລະ ຖືການຈັດຕັ້ງປະຕິບັດຄຳຕັດສິນຂອງສານ ທີ່ໃຊ້ໄດ້ຢ່າງເດັດຂາດ ໃຫ້ສິ້ນສຸດຕາມກົດໝາຍ.
ໂອກາດນີ້, ທ່ານ ສັກກຸນາ ຍະພິຈິດ ປະທານສານປະຊາຊົນເຂດ II ນະຄອນຫລວງວຽງຈັນ ໄດ້ລາຍງານໃຫ້ຮູ້ວ່າ: ສານປະຊາຊົນເຂດ II ນະຄອນຫລວງວຽງຈັນ ມີສຳນັກງານຕັ້ງຢູ່ບ້ານໄຊສົມບູນ ເມືອງໄຊທານີ ຖືເປັນສານປະຊາຊົນຂັ້ນທ້ອງຖິ່ນ ມີພາລະບົດບາດ ສິດ ແລະ ໜ້າທີ່ໃນການແກ້ໄຂຄະດີເປັນຂັ້ນຕົ້ນ, ໃນ 1 ປີຜ່ານມາ ມີຄະດີທັງ 451 ເລື່ອງ, ແກ້ໄຂໄດ້ 394 ເລື່ອງ ເທົ່າກັບ 87%, ຂໍອຸທອນ 17 ເລື່ອງ ເທົ່າກັບ 4%, ສືບຕໍ່ດຳເນີນ 57 ເລື່ອງ ໃນນີ້ເປັນຄະດີຂອງເມືອງໄຊທານີ 392 ເລື່ອງ ແລະ ເມືອງປາກງື່ມ 59 ເລື່ອງ, ຄະດີທີ່ພົ້ນເດັ່ນແມ່ນ ຄະດີອາຍາ ປະກອບມີ: ລັກຊັບ, ສໍ້ໂກງ ແລະ ສ້າງຄວາມເສຍຫາຍຜ່ານສື່ສັງຄົມອອນລາຍ, ຄະດີແພ່ງປະກອບມີ: ບັນຫາທີ່ດິນ (ຂັດແຍ່ງທີ່ດິນ, ຂັດແຍ່ງມູນມໍລະດົກ, ໃບຕາດິນເສຍຫາຍ) ແລະ ໜີ້ສິນ ແລະ ຄະດີຄອບຄົວ ແມ່ນການຢ່າຮ້າງ.ຂ່າວ: ອານຸພົນ
KPL