ຂປລ
ຂປລ. ກົມພາສີ ກະຊວງການເງິນ ແລະ ພາກທຸລະກິດ ຈັດກອງປະຊຸມພົບປະແລກປ່ຽນຄຳຄິດຄໍາເຫັນ ກ່ຽວກັບນະໂຍບາຍການເງິນ ອັນເປັນການກະຕຸກຊຸກຍູ້ ດ້ານເສດຖະກິດ ໃຫ້ມີການຂະຫຍາຍຕົວ, ການອຳນວຍຄວາມສະດວກທາງດ້ານພາສີ, ການຄ້າ, ຂັ້ນຕອນ ແລະ ກົນໄກຕ່າງໆ ໃນທ້າຍອາທິດຜ່ານມາ
ຂປລ. ກົມພາສີ ກະຊວງການເງິນ ແລະ ພາກທຸລະກິດ ຈັດກອງປະຊຸມພົບປະແລກປ່ຽນຄຳຄິດຄໍາເຫັນ ກ່ຽວກັບນະໂຍບາຍການເງິນ ອັນເປັນການກະຕຸກຊຸກຍູ້ ດ້ານເສດຖະກິດ ໃຫ້ມີການຂະຫຍາຍຕົວ, ການອຳນວຍຄວາມສະດວກທາງດ້ານພາສີ, ການຄ້າ, ຂັ້ນຕອນ ແລະ ກົນໄກຕ່າງໆ ໃນທ້າຍອາທິດຜ່ານມາ ໂດຍການເປັນປະທານຮ່ວມຂອງ ທ່ານ ຄຳມິດ ໄຊອາສາ ຮອງຫົວໜ້າກົມພາສີ ກະຊວງການເງິນ ແລະ ທ່ານ ນາງ ວາລີ ເວດສະພົງ ຮອງປະທານສະພາການຄ້າ ແລະອຸດ ສາຫະກຳແຫ່ງຊາດລາວ, ມີຄະນະກົມພາສີ, ຄະນະພະແນກ, ຄະນະດ່ານພາສີສາກົນ ແລະ ຜູ້ຕາງໜ້າຈາກພາກທຸລະກິດ ເຂົ້າຮ່ວມ.
ທ່ານ ຄຳມິດ ໄຊອາສາ ໄດ້ມີຄໍາເຫັນຕໍ່ກອງປະຊຸມວ່າ: ກະຊວງການເງິນ ຮ່ວມກັບສະພາການຄ້າ ແລະ ອຸດສາຫະກຳແຫ່ງຊາດລາວ ຈັດກອງປະຊູມພົບປະ ແລະ ປ່ຽນບົດຮຽນ ເພື່ອເປັນການແລກປ່ຽນຄຳຄິດຄໍາເຫັນ ໂດຍສະເພາະ ແມ່ນນະໂຍບາຍການເງິນ ອັນເປັນການກະຕຸກຊຸກຍູ້ດ້ານເສດຖະກິດ ໃຫ້ມີການຂະຫຍາຍຕົວ ເປັນຕົ້ນ ແມ່ນການຫລຸດອາກອນຊົມໃຊ້ນໍ້າມັນລົງ ເພື່ອຊ່ວຍເຫລືອຜູ້ບໍລິໂພກ ແລະ ຈຳກັດການຮົ່ວໄຫລ ຂອງລາຍຮັບງົບປະມານ ໂດຍສະເພາະ ແມ່ນການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ຄຳສັ່ງເລກທີ 18/ນຍ ວ່າດ້ວຍການເພີ່ມທະວີ ການຄຸ້ມຄອງ ແລະ ຕ້ານການຮົ່ວໄຫລຂອງລາຍຮັບງົບປະມານແຫ່ງລັດ, ຊຶ່ງກົມພາສີໄດ້ໃຫ້ຄວາມສຳຄັນ ແກ່ການເພີ່ມທະວີຮ່ວມມື ກັບພາກທຸລະກິດ ເພື່ອຍົກສູງການອຳນວຍ ຄວາມສະດວກທາງດ້ານພາສີ ແລະ ການຄ້າ, ຂັ້ນຕອນ ແລະ ກົນໄກຕ່າງໆ ໄດ້ຖືກຕັດຮອນລົງ ເພື່ອໃຫ້ສະພາບແວດລ້ອມໃນການດຳເນີນທຸລະກິດ ມີການປັບປຸງດີຂຶ້ນ, ທາງຂະແໜງພາສີ ໄດ້ພະຍາຍຍາມນໍາໃຊ້ເຄື່ອງມືທັນສະໄໝ ເຂົ້າໃນການຄຸ້ມຄອງ ແລະ ຈັດເກັບລາຍຮັບໃຫ້ມີ ຄວາມສະດວກວ່ອງໄວ, ເຮັດໃຫ້ການບໍລິການ ພາກລັດຂອງພວກເຮົາມີປະສິດທິພາບ, ປະສິດທິຜົນ ແລະ ຫລຸດຜ່ອນຂັ້ນຕອນທີ່ບໍ່ຈຳເປັນລົງ ເພື່ອຊ່ວຍເຫລືອພາກທຸລະກິດ ທາງດ້ານເວລາ ແລະ ຕົ້ນທຶນ.
ໃນໄລຍະກ່ອນການແພ່ລະບາດຂອງ ພະຍາດໂຄວິດ-19, ກົມພາສີ ກໍໄດ້ຈັດກອງປະຊຸມພົບປະກັບ ພາກທຸລະກິດຜ່ານມາ ແລະ ຂະແໜງພາສີ ກໍໄດ້ນຳເອົາບັນດາຄຳຄິດເຫັນ ໄປປັບປຸງແກ້ໄຂ, ຊຶ່ງກົມພາສີໄດ້ອອກ ເປັນນິຕິກຳ ແລະ ລະບຽບການ, ປັບປຸງກົນໄກຕ່າງໆ ຊຶ່ງພວກເຮົາເຫັນໄດ້ຈາກຕົວຊີ້ວັດທີ 8 (ຕົວຊີ້ວັດການຂ້າມແດນ) ແມ່ນມີທ່າອ່ຽງດີຂຶ້ນ. ຄຽງຄູ່ກັນນີ້, ພາຍຫລັງທີ່ໄດ້ມີມາດຕະການຜ່ອນຜັນ ຂອງການແພ່ລະບາດ ພະຍາດໂຄວິດ-19 ເຫັນໄດ້ວ່າບັນຍາກາດ ການທ່ອງ ທ່ຽວ, ການລົງທຶນຂອງ ພາກທຸລະກິດກໍມີທ່າອ່ຽງດີຂຶ້ນ.
ການພົບປະຄັ້ງນີ້, ຈຶ່ງເປັນໂອກາດອັນດີ ທີ່ໄດ້ມີການປຶກສາຫາລື-ແລກປ່ຽນ ຄຳຄິດຄຳເຫັນ ຕໍ່ການໃຫ້ບໍລິການ ຈາກຂະແໜງພາສີ, ສຳລັບກົມພາສີກໍ ຈະໄດ້ນຳສະເໜີ ບາງໜ້າວຽກທີ່ຈະເຜີຍແຜ່ ແນະນຳໃຫ້ແກ່ພາກທຸລະກິດ ກ່ຽວກັບການຫັນວຽກງານ ພາສີເປັນທັນສະໄໝ ແລະ ການອຳນວຍຄວາມສະດວກ ທາງດ້ານພາສີ ແລະ ການຄ້າ, ສ່ວນພາກທຸລະກິດ ກໍຢາກຮັບຟັງຄຳຄິດຄຳເຫັນໃນການປະຕິບັດກົດໝາຍ, ລະບຽບການ ແລະ ການໃຫ້ບໍລິການຂອງເຈົ້າໜ້າທີ່ພາສີ.
ໃນກອງປະຊຸມດັ່ງກ່າວ, ຍັງໄດ້ມີການເຜີຍແຜ່ລະບຽບ ການທາງພາສີທີ່ສຳຄັນ, ພ້ອມທັງເປີດໂອກາດໃຫ້ພາກທຸລະກິດ ແລະ ເຈົ້າໜ້າທີ່ພາສີ ແລກປ່ຽນຄຳຄິດເຫັນເຊິ່ງກັນ ແລະ ກັນຢ່າງກົງໄປກົງມາ, ຍົກໃຫ້ເຫັນດ້ານຂໍ້ສະດວກ, ຂໍ້ຫຍຸ້ງຍາກ ໃນໄລຍະຜ່ານມາ ເພື່ອເປັນຂໍ້ມູນນຳໄປປັບປຸງແກ້ໄຂຕໍ່ໜ້າ.
ຂ່າວ-ພາບ: ກະຊວງການເງິນ
KPL
