ຂ​ປ​ລ. ​ມະ​ຫະ​ກຳ​ກິ​ລາ​ແຫ່ງ​ຊາດ ຄັ້ງ​ທີ XI ຫລື ຊ​ຽງ​ຂວາງ​ເກມ 2022 ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ ໃນ​ວັນ​ທີ 13 ທັນ​ວາ ແລະ ຈະ​ດຳ​ເນີນ​ໄປ​ຈົນ​ຮອດ​ ວັນ​ທີ 22 ທັນ​ວາ 2022 ໂດຍໃຫ້ກຽດ​ເຂົ້າ​ຮ່ວມ​ເປີດງານຂອງ ທ່ານ ທອງລຸນ ສີສຸລິດ ເລຂາທິການໃຫຍ່, ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ, ມີບັນ ດາການນໍາຂັ້ນສູນກາງ ແລະ ທ້ອງຖິ່ນ, ລວມ​ເຖິງ​ມວນ​ຊົນ ທັງພາຍ​ໃນ ແລະ ຕ່າງປະເທດ ເຂົ້າ​ມາ​ຮ່ວມ ຢ່າງຄຶກຄື້ນມ່ວນຊື່ນ.

ທ່ານ ທອງລຸນ ສີສຸລິດ ໄດ້ມີຄຳເຫັນກ່າວເປີດງານ ມະຫະກຳກິລາແຫ່ງຊາດ ຄັ້ງທີ XI ໂດຍທ່ານ ໄດ້ສະແດງຄວາມຊົມເຊີຍ ຕໍ່ການຫ້າງຫາກະກຽມ ຄວາມພ້ອມທຸກໆດ້ານ ຂອງແຂວງເຈົ້າພາບ ແລະ ຄະນະຮັບ ຜິດຊອບຈັດງານ, ຊົມເຊີຍຕໍ່ທຸກພາກສ່ວນ ທີ່ສົ່ງນັກກິລາເຂົ້າຮ່ວມ ການ​ແຂ່ງ​ຂັນຢ່າງຕັ້ງໜ້າ ແລະ ມີຄວາມຮັບຜິດ ຊອບສູງ, ພ້ອມທັງສະແດງຄວາມເຊື່ອໝັ້ນວ່າ ມະຫະກຳກິລາແຫ່ງຊາດຄັ້ງນີ້ ເປັນ​ການ​ເສີມ​ຂະ​ຫຍາຍ​ ຄວາມ​ສາ​ມັກ​ຄີ ແລະ ຄວາມເປັນປຶກແຜ່ນແໜ້ນໜາ ຂອງປວງຊົນລາວທັງຊາດ.

ໂອ​ກາດ​ນີ້, ທ່ານ ບຸນ​ຈັນ ສີ​ວົງ​ພັນ ເຈົ້າ​ແຂວງ​ຊຽງ​ຂວາງ ປະທານຈັດງານ ມະ​ຫະ​ກຳ​ກິ​ລາ​ແຫ່ງ​ຊາດ ຄັ້ງ​ທີ XI ໄດ້​ໃຫ້ຮູ້​ວ່າ: ມະຫະກໍາກິລາແຫ່ງຊາດ ແມ່ນການແຂ່ງຂັນກິລາ ຫລາຍປະເພດຮ່ວມກັນ ປະ​ກອບ​ມີ​ ໝວດ​ກິ​ລາ​ສາ​ກົນ ແລະ ກິ​ລາ​ພື້ນ​ເມືອງ, ຕາມ​ລະ​ບຽບ​ກຳ​ນົດ ​ແມ່ນຈັດຂຶ້ນໃນທຸກໆ 3 ປີ ໂດຍມີແຂວງທີ່ຖືກຄັດເລືອກ ຜັດປ່ຽນກັນເປັນເຈົ້າພາບ ເພື່ອຊຸກຍູ້ຂະບວນການ ກິລາກາຍ​ຍະ​ກຳ ຢູ່ພາຍໃນປະເທດ, ທັງເປັນການປຸກລະດົມ ສົ່ງເສີມມະຫາຊົນເຂົ້າຮ່ວມຢ່າງ ກວ້າງຂວາງ ແນໃສ່ເສີມສ້າງສຸຂະພາບ, ມິດຕະພາບ, ການພັດທະນາ, ການຮ່ວມມື ແລະ ຄວາມ​ສາ​ມັກ​ຄີ​​ທີ່​ເປັນ​ປຶກ​ແຜ່ນ ຂອງ​ປວງ​ຊົນ​ລາວ​ທັງ​ຊາດ, ທັງເປັນງານ ທີ່ມີຄວາມໝາຍສໍາຄັນ ຕໍ່ການພັດທະນາ ຊັບພະຍາກອນມະນຸດ​ຂອງ​ຊາດ, ເປັນ ການປຸກລະດົມຊາວໜຸ່ມ, ເຍົາວະຊົນ, ນັກ ຮຽນ-ນັກສຶກສາ ໃຫ້ມີສ່ວນຮ່ວມ ໃນ​ຂະ​ບວນ​ການຫລິ້ນ​ກິ​ລາ ແລະ ​ແຂ່ງ​ຂັນ​ກິ​ລາ​ປະ​ເພດຕ່າງໆ ເພື່ອຫ່າງ​ໄກ​ສິ່ງ​ເສບ​ຕິດ ແລະ ປະກົດການຍໍ້ທໍ້​ຕ່າງໆ, ທັງ​ເປັນ​ການຝຶກຝົນຮ່າງກາຍ ແລະ ຈິດໃຈເບີກ​ບານເຂັ້ມແຂງ, ກຽມ​ພ້ອມສືບທອດມູນ​ເຊື້ອ​ ພາລະກິດແຫ່ງ​ການ ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ.

ມະຫະກໍາກິລາແຫ່ງຊາດ ຄັ້ງທີ XI ຄັ້ງນີ້, ແຂ່ງຂັນທັງໝົດ 25 ປະເພດກິລາ ຄື: ຍິງປືນ, ລອຍນໍ້າ, ບານບ້ວງ, ເທຄວັນໂດ, ໝາກແລ້, ຍິງທະນູ, ໜ້າເກັກ, ແລ່ນ-ລານ, ມວຍສາກົນ, ໝາກເສິກ, ປັນຈັກສີລັດ, ມວຍປໍ້າ, ຄາຣາເຕໂດ, ກະຕໍ້-ຊິນລອນ, ບານເຕະ, ໝາກຂ່າງ, ເປຕັງ, ກ໊ອຟ, ດອກປີກໄກ່, ເຕັນນິສ, ລົດຖີບ, ປິງປ໋ອງ, ມວຍລາວ, ຢູໂດ ແລະ ວູຊູ, ມີນັກກິລາ ຈາກ 17 ແຂວງ, 1 ນະຄອນຫລວງ ແລະ 4 ກະຊວງ ເຂົ້າຮວ່ມ ມີ ກະ ຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງພະລັງງານ ແລະ ບໍ່ແຮ່ ແລະ ກະຊວງສາທາລະນະ ສຸກ, ມີນັກກິລາເຂົ້າຮ່ວມທັງໝົດ 3.093 ຄົນ, ຊີງຫລຽນທັງໝົດ 2.598 ຫລຽນ ເຊິ່ງ​ໄດ້​ເລີ່ມການ​ແຂ່ງ​ຂັນບາງ ປະເພດກິລາ ​ມາ​ແຕ່​ວັນ​ທີ 14 ພະ​ຈິກ 2022 ຢູ່​ນະ​ຄອນຫລວງວຽງ​ຈັນ​ ​​ຄື: ກິ​ລາ​ລອຍ​ນ້ຳ ແລະ ກິ​ລາ​ຍິງ​ປືນ, ສ່ວນ​​​ຢູ່​ແຂວງ​ຊຽງ​ຂວາງ ​ແມ່ນ​ໄດ້​ເລີ່ມ​ມາ​ແຕ່​ວັນ​ທີ 1 ທັນ​ວາ 2022, ມາຮອດວັນທີ 13 ທັນວາ 2022 ມີ 11 ປະເພດກິລາ ທີ່ແຂ່ງສໍາເລັດແລ້ວ ຄື: ກິລາລອຍນໍ້າ, ແລ່ນ-ລານ, ເທຄັວນໂດ, ມວຍປໍ້າ, ຍິງທະນູ-ຍິງໜ້າເກັກ, ຄາຣາເຕໂດ, ໝາກເສິກ, ບານບ້ວງ, ປັນຈັກສີລັດ, ມວຍສາກົນ ແລະ ໝາກແລ້.

ຂ່າວ: ທະນູທອງ

ພາບ: ຂັນໄຊ-ອ່າຍຄຳ

KPL