*ຜົນງານຂອງອົງຄະນະພັກເມືອງກາສີ ແຂວງວຽງຈັນ ທີ່ຍາດມາໄດ້ນັ້ນ, ຖືກຍົກຂຶ້ນໃຫ້ເຫັນໃນກອງປະຊຸມຄົບຄະນະບໍລິຫານງານພັກເມືອງຄັ້ງທີ 13 ສະໄໝທີ VII ທີ່ຈັດເມື່ອບໍ່ດົນມານີ້, ທີ່ສະໂມສອນເມືອງດັ່ງກ່າວ  ໂດຍສະຫາຍ ອຳໄພ ໂສລັດຕະນະວົງ ເລຂາພັກເມືອງ, ເຈົ້າເມືອງໆກາສີ ໄດ້ຍົກບາງດ້ານທີ່ເປັນຜົນງານວ່່າ: ໃນປີຜ່ານມາຄະນະພັກທຸກຂັ້ນໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກພັກ, ພະນັກງານ, ທະຫານ, ຕໍາຫລວດ ແລະ ພໍ່ແມ່ປະຊາຊົນບັນດາເຜົ່າຢ່າງຕໍ່ເນື່ອງໂດຍສະ ເພາະໄດ້ຈັດຕັ້ງເຊື່ອມຊຶມແນວທາງນະໂຍບາຍຂອງພັກ, ລະບຽບກົດໝາຍຂອງລັດຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດຢ່າງເປັນປົກກະຕິເຮັດໃຫ້ທົ່ວເມືອງມີແນວຄິດອຸ່ນອຽນ-ທຸ່ນທ່ຽງ ເຊື່ອໝັ້ນຕໍ່ການນໍາພາຂອງພັກ-ລັດວາງອອກ, ມີຄວາມຢູ່ເຢັນເປັນສຸກ. 

     ຂະນະທີ່ດ້ານເສດຖະກິດຂອງເມືອງໄດ້ມີການຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ ແລະ ຍືນຍົງ ລວມຍອດຜະລິດຕະພັນພາຍໃນຂະຫຍາຍຕົວ 5,7%/ປີ ເທົ່າກັບ 95% ຂອງແຜນການປີ, ຄິດໄລ່ເປັນມູນຄ່າລາຄາໃນປັດຈຸບັນໄດ້ 1.434,3 ຕື້ກວ່າກີບ, ສະເລ່ຍໃສ່ຫົວຄົນໄດ້ 32 ລ້ານກວ່າກີບ ຫລື ກວ່າ 1.600 ໂດລາ. ໃນນັ້ນ, ຂະແໜງກະສິກຳຂະ ຫຍາຍຕົວເພີ່ມຂຶ້ນ 5,73%, ກວມ ເອົາ 51,8%, ຂະແໜງອຸດສາຫະກຳຂະຫຍາຍຕົວ ເພີ່ມຂຶ້ນ 5,70%, ກວມເອົາ 13%, ຂະແໜງການບໍລິການຂະຫຍາຍຕົວເພີ່ມຂຶ້ນ 5,24%, ກວມເອົາ 35,3%. ຜະລິດເຂົ້າລວມໄດ້ໃນເນື້ອທີ່ກວ່າ 4,3 ພັນເຮັກຕາ, ຜົນຜະລິດໄດ້ກວ່າ 19,5 ພັນໂຕນ. ສຳລັບພືດທີ່ພົ້ນເດັ່ນທີ່ປູກໃນລະດູແລ້ງ ແລະ ລະດູຝົນມີຖົ່ວດິນ, ກະລໍາປີ, ໝາກເຜັດ, ສາລີ, ໝາກເຂືອ, ໝາກແຕງ, ໝາກອຶ ແລະ ອື່ນໆ. ສຳລັບວຽກງານຊົນລະປະທານທົ່ວເມືອງມີຫລາຍກວ່າ 180 ແຫ່ງ, ສະໜອງນໍ້າໃຫ້ແກ່ການຜະລິດລະດູແລ້ງ ແລະ ລະດູຝົນໄດ້ກວ່າ 9,8 ພັນເຮັກຕາ, ຕິດຕາມການປູກໝາກໂມຂອງບໍລິສັດວີເອັສຢູ່ບ້ານໂພນໝີ, ສີສັງວອນ, ນາມົນ, ນາໂພ, ນາຊູ ແລະ ບ້ານໜອງບົວທອງສໍາເລັດ 100% ຊຶ່ງມີເນື້ອທີ່ທັງໝົດ 303 ເຮັກຕາ, ເກັບກຳຂໍ້ມູນເນື້ອທີ່ປູກມັນຕົ້ນ ທົ່ວເມືອງລວມມີ 16 ບ້ານ ມີເນື້ອທີ່ທັງໝົດ 247 ເຮັກຕາ, ມີ 177 ຄອບຄົວ.

   ການຜະລິດເປັນສິນຄ້າ ໂດຍສະເພາະແມ່ນເຂົ້າເປືອກສາມາດຈຳໜ່າຍໄດ້ 4,3 ພັນໂຕນ ມູນຄ່າຫລາຍກວ່າ 30 ຕື້ກີບ, ສາລີແຂງ- ສາລີຫວານ, ໝາກໄມ້ ແລະ ພືດຜັກອື່ນໆ ຜະລິດຕອບສະໜອງຕາມຄວາມຕ້ອງການຂອງສັງຄົມ ແລະ ບໍລິໂພກໄດ້ 48,9 ພັນກວ່າໂຕນ. ໃນນັ້ນ, ເປັນສິນຄ້າສົ່ງອອກພາຍໃນກວ່າ 34 ພັນໂຕນ ມູນຄ່າປະມານກວ່າ 171 ຕື້ກີບ. ທົ່ວເມືອງມີສັດລ້ຽງປະເພດຄວາຍ 5,6 ພັນກວ່າ ໂຕ, ງົວ 15,6 ພັນກວ່າໂຕ, ໝູກວ່າ 6,3 ພັນ ໂຕ, ແບ້ກວ່າ 1,9 ພັນໂຕ ແລະ ສັດປິກ 1 ແສນກວ່າໂຕ. ການເກັບລາຍຮັບເຂົ້າງົບປະມານ ປີ 2023 ປະຕິບັດໄດ້ຫລາຍກວ່າ 3,1 ຕື້ກີບ ເທົ່າກັບ 121% ຂອງແຜນການປີ; ການຄຸ້ມຄອງລາຍຈ່າຍ: ປະຕິບັດໄດ້ກວ່າ 1,5  ຕື້ກີບ ເທົ່າກັບ 100% ຂອງແຜນການປີ, ທະນາຄານການຄ້າຕ່າງປະເທດລາວມະຫາຊົນໜ່ວຍບໍລິການກາສີລະດົມເງິນຝາກໄດ້ 101,93 ຕື້ ກ່ວາກີບເທົ່າກັບ 204% ຂອງ ແຜນການປີ ແລະ ປ່ອຍສິນເຊື້ອໄດ້ 19  ຕື້ກວ່າກີບເທົ່າກັບ  95%, ທະນາຄານສົ່ງເສີມກະສິກຳລະດົມເງິນຝາກໄລະຍະສັ້ນ ແລະ ໄລຍະຍາວ ໄດ້ 39,5 ຕື້ກວ່າກີບເທົ່າກັບ 62%, ປ່ອຍສິນເຊື່ອໄດ້ 7,4 ຕ້ື ກວ່າກີບ ເທົ່າກັບ 29%. ນອກຈາກນີ້, ວຽກງານອື່ນໆກໍ່ໄດ້ຮັບການພັດທະນາ ແລະ ປັບປຸງດີຂຶ້ນເທື່ອລະກ້າວ.  ສະຫາຍ ອຳໄພ ໂສລັດຕະນະວົງກ່າວຕື່ມວ່າ: ສໍາລັບປີ 2024 ຈະສູ້ ຊົນເຮັດໃຫ້ເສດຖະກິດມະຫາພາກຂະຫຍາຍຕົວໃນລະດັບ 6% ຕໍ່ປີ ຕາມທີ່ໄດ້ກຳນົດໄວ້ໃນແຜນ 5 ປີ ຂອງເມືອງ, ສືບຕໍ່ຜະລິດສິນຄ້າກະສິກຳໃຫ້ມີການຂະຫຍາຍຕົວໃນລະດັບ 5%, ຜະລິດສະບຽງ ແລະ ພຶດສິນຄ້າລະດູແລ້ງ ແລະ ລະດູຝົນ ເນື້ອທີ່ປູກໃຫ້ໄດ້ 6.062 ເຮັກຕາ, ຊູ້ຊົນຊຸກຍູ້ການປູກເຂົ້າລວມໃຫ້ໄດໃນເນື້ອທີ່ 4.955 ເຮັກຕາ, ສືບຕໍ່ເກັບລາຍຮັບເຂົ້າງົບປະມານໃຫ້ໄດ້ກວ່າ 2,6 ຕື້ກີບ, ແກ້ໄຂຄວາມທຸກຍາກຂອງປະຊາຊົນໃຫ້ນັບມື້ຫລຸດລົງ ແລະ ອື່ນໆ. ຂໍ້ມູນຈາກ: ຫ້ອງການ ຖວທ ເມືອງກາສີ

ໂດຍ: ຢ່າຕົ່ງ

KPL