ຂປລ. ອົງຄະນະພັກກະຊວງສຶກສາທິການ ແລະ ກິລາ (ສສກ) ຈັດກອງປະຊຸມວຽກງານກວດກາ ປະຈໍາປີ 2023 ໂດຍການເປັນປະທານຂອງ ສະຫາຍ ພຸດ ສິມມາລາວົງ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງ ສສກ, ສະຫາຍ ວັນຄຳ ໄຊວົງສັກ ຄະນະພັກ, ຫົວໜ້າກົມຄົ້ນຄວ້າ ແລະ ວາລະສານກວດກາ ແລະ ສະຫາຍ ສໍາລານ ພັນຄະວົງ ຮອງເລຂາຄະນະບໍລິຫານງານພັກ, ປະທານຄະນະກວດກາພັກ, ຮອງລັດຖະມົນຕີກະຊວງ ສສກ, ມີຄະນະປະຈໍາພັກ, ຄະນະພັກ, ຜູ້ຕາງໜ້າຈາກ ຄະນະກວດກາສູນກາງພັກ, ຄະນະພັກ-ຄະນະກວດກາແຕ່ລະຂັ້ນ ແລະ ຜູ້ແທນກອງປະຊຸມ ອ້ອມຂ້າງກະຊວງ ສສກ ເຂົ້າຮ່ວມ.

ກອງປະຊຸມ ​ໄດ້ສະຫລຸບຕີລາຄາການເຄື່ອນໄຫວວຽກງານກວດກາ ແລະ ແຜນວຽກຈຸດສຸມໃນຕໍ່ໜ້າ ໂດຍສະເພາະ ການຈັດຕັ້ງປະຕິບັດວຽກງານ ກອງທຶນພັດທະນາວິທະຍາສາດ ແລະ ເຕັກໂນໂລຊີ; ການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກ; ການຈັດຕັ້ງປະຕິບັດການແກ້ໄຂ ບັນຫາຢາເສບຕິດໃນສະຖານການສຶກສາ ແລະ ການຄົ້ນຄ້ວາແກ້ ໄຂຄໍາຮ້ອງ-ຄໍາສະເໜີຂອງສັງຄົມ ກ່ຽວກັບການເອົານັກສຶກສາ ໄປຮຽນຕໍ່ພາຍໃນ-ຕ່າງປະເທດ. ພ້ອມນີ້, ກໍເພື່ອຈັດຕັ້ງຜັນຂະຫຍາຍເນື້ອໃນຈິດໃຈກອງປະ ຊຸມວຽກງານກວດກາ ທົ່ວປະເທດ ປະຈໍາປີ 2023, ສະຫລຸບຕີລາຄາການເຄື່ອນໄຫວ ວຽກງານກວດກາຂອງອົງຄະນະພັກກະຊວງ ສສກ ປະຈຳປີ 2023 ແລະ ທິດທາງແຜນ ການຈຸດສຸມປະຈຳປີ 2024 ຂອງຄະນະກວດກາພັກ ສສກ; ກອງປະຊຸມ ໄດ້ສະເໜີຮ່າງບົດລາຍງານຫຍໍ້ ການເຄື່ອນໄຫວວຽກງານກວດກາປະຈຳປີ 2023 ແລະ ທິດທາງແຜນການຈຸດສຸມປະຈຳປີ 2024 ຂອງຄະນະກວດ ກາພັກ ສສກ ແລະ ເຊື່ອມຊຶມບັນດາເອກະສານຂອງພັກ.

ໂອກາດນີ້, ສະຫາຍ ພຸດ ສິມມາລາວົງ  ກໍໄດ້ໂອ້ລົມຕໍ່​ກອງ​ປະຊຸມ ໂດຍໄດ້ມອບໃຫ້ເລຂາຄະນະພັກຮາກຖານ, ເລຂາໜ່ວຍພັກຮາກຖານ ນໍາພາ-ຊີ້ນໍາຄະນະກວດກາພັກ, ຜູ້ກວດກາໜ່ວຍພັກ ກໍານົດເປັນ ແຜນການສະເພາະໃນການເຄື່ອນໄຫວກວດກາພັກ ໃນຂັ້ນຂອງຕົນ ຢ່າງໜ້ອຍໃຫ້ສໍາເລັດ 1 ຄັ້ງ/ປີ ນັບແຕ່ປີ 2024 ເປັນຕົ້ນໄປ. ສໍາລັບຂະບວນການ ແລະ ຂັ້ນຕອນຕ່າງໆໃຫ້ສົມທົບກັບຄະນະ ກວດກາພັກກະຊວງ ແລະ ມອບໃຫ້ຄະນະກວດກາພັກກະຊວງ ຕິດຕາມ, ຊຸກຍູ້ ແລະ ເກັບກໍາຂໍ້ມູນບັນດາຮາກຖານພັກ ໃນການຈັດຕັ້ງປະຕິບັດແຜນການເຄື່ອນໄຫວກວດກາພັກ ໃຫ້ຖືເປັນເງື່ອນໄຂໜຶ່ງໃນການ ພິຈາລະນາຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນແຕ່ລະປີ ແລະ ສະເໜີ ໃຫ້ ບັນດາສະຫາຍຄົ້ນຄວ້າກໍາແໜ້ນ, ປັບປຸງເນື້ອໃນ, ປັບປຸງແບບແຜນວິທີ ເຮັດວຽກໃນການກວດ ກາຄືນໃຫ້ສອດຄ່ອງຕາມ ຂັ້ນຕອນຂອງລະບຽບກົດໝາຍ ແລະ ສຸມໃສ່ແກ້ໄຂບັນຫາຕົວຈິງ; ເອົາໃຈໃສ່ເລັ່ງລັດແກ້ໄຂສະພາບການດໍາເນີນການກວດກາຊັກຊ້າ ແລະ ຄຸມເຄືອ, ການຊີ້ນໍາແກ້ໄຂຜົນການກວດ ກາຕໍ່ເປົ້າໝາຍກະທໍາຜິດ ມີລັກສະນະແກ່ຍາວ ຫລື ຂາດຜູ້ຮັບຜິດຊອບ ແກ້ໄຂທີ່ຈະແຈ້ງເດັດຂາດ.

ສະຫາຍ ພຸດ ສິມມາລາວົງ ຍັງໄດ້ເນັ້ນອີກວ່າ: ສຳລັບ ບັນຫາທີ່ຈະຕ້ອງຮີບຮ້ອນແກ້ໄຂ ຄືການແກ້ໄຂສະພາບການກວດກາ, ການຄົ້ນຄວ້າຄໍາຮ້ອງ-ຄໍາສະເໜີຊັກຊ້າ-ແກ່ຍາວ ແລະ ຄຸມເຄືອ; ການແກ້ໄຂຜົນການກວດກາທີີ່ສັງຄົມກໍາລັງໃຫ້ຄວາມສົນໃຈ ໃນໄລຍະຜ່ານມາແມ່ນ ໄດ້ປະຕິບັດຕິດພັນກັບການ ເກັບກູ້ຊັບສິນທີ່ເສຍຫາຍຕໍ່ຜູ້ກະທໍາຜິດ ແລະ ອື່ນໆ, ແຕ່ຍັງບໍ່ທັນເປັນຮູບປະທໍາ, ຂະບວນການ ແລະ ວິທີການຍັງບໍ່ທັນຊັດເຈນ ຊຶ່ງຈະຕ້ອງໄດ້ບຸກບືນສູ້ຊົນໃນຕໍ່ໜ້າ; ນິຕິກຳ ແລະ ເຄື່ອງມືຕ່າງໆ ທີ່ຮັບໃຊ້ວຽກງານ ຕິດຕາມກວດກາ ແລະ ປະເມີນຜົນຍັງບໍ່ທັນຮັດກຸມ ແລະ ບໍ່ທັນຄົບຖ້ວນ; ການຄົ້ນຄ້ວາ, ເຜີຍແຜ່, ເຊື່ອມຊຶມ ແລະ ຜັນຂະຫຍາຍນິຕິກໍາຕ່າງໆ ຍັງບໍ່ທັນເລິກເຊິ່ງ, ກ້ວາງຂວາງ ແລະ ການ ຈັດຕັ້ງປະຕິບັດຍັງບໍ່ທັນໄດ້ ຮັບປະສິດທິຜົນສູງ ເທົ່າທີ່ຄວນ; ປັບປຸງຄະນະກວດກາ, ຍົກລະດັບຄວາມສາ ມາດຄວາມຮັບຜິດຊອບຂອງພະນັກງານກວດກາ ແລະ ສະໜອງສິ່ງອໍານວຍຄວາມສະດວກຕ່າງໆໃຫ້ພຽງພໍ.

ຂ່າວ: ສົມຫວັງ

KPL