ຂປລ
ຂປລ.ສະມາຄົມທັນຕະແພດລາວ, ຄະນະທັນຕະແພດສາດ ມະຫາວິທະຍາໄລ ວິທະ ຍາສາດ ສຸຂະພາບ(ມວສ) ກະຊວງສາທາລະນະສຸກ ສປປ ລາວ ຮ່ວມກັບ ໜ່ວຍທັນຕະກຳ ທາງພາກລັດ-ເອກະຊົນ ແຫ່ງປະເທດໄທ
ຂປລ.ສະມາຄົມທັນຕະແພດລາວ, ຄະນະທັນຕະແພດສາດ ມະຫາວິທະຍາໄລ ວິທະຍາສາດ ສຸຂະພາບ (ມວສ) ກະຊວງສາທາລະນະສຸກ ສປປ ລາວ ຮ່ວມກັບ ໜ່ວຍທັນຕະກຳ ທາງພາກລັດ-ເອກະຊົນ ແຫ່ງປະເທດໄທ ໄດ້ເປີດໃຫ້ບໍລິການ ກວດພະຍາດທົ່ວໄປ ແລະ ການບໍລິການ ທາງດ້ານທັນຕະກຳ ໃຫ້ແກ່ປະຊາຊົນ ພາຍໃນນະຄອນຫລວງວຽງຈັນ ໂດຍບໍ່ເສຍຄ່າ ເຊິ່ງໄດ້ຈັດຂຶ້ນໃນວັນທີ 1 ພະຈິກ ນີ້ ທີ່ ມວສ ໂດຍການເປັນ ປະທານຮ່ວມຂອງ ທ່ານ ບຸນຖົມ ຊາມຸນຕຣີ ອະທິການບໍດີ ມະຫາວິທະຍາໄລ ວິທະຍາສາດສຸຂະພາບ ແລະ ທ່ານ ນາງ ມ່ອມຣາດຊະວົງ ຈິຢາກອນ ເສຊະເວດ ອາພາກອນ ກໍາມະການອຳນວຍການ ມູນລະນິທິສົງເຄາະເດັກ ສະພາກາຊາດໄທ; ມີປະທານມູນລະນິທິ ທັນຕະແພດ ຜູ້ປ່ວຍມະເຮັງ ໃນຊ່ອງປາກເອກະຊົນ ປະເທດໄທ, ມີທີ່ປຶກສາອັກຄະຣາຊະທູດ ແຫ່ງປະເທດໄທ ປະຈໍາ ສປປ ລາວ ພ້ອມດ້ວຍບັນດາແພດໝໍ ແລະ ນັກສຶກສາ ຈາກຄະນະທັນຕະແພດສາດ ມວສ ເຂົ້າຮ່ວມ.
ທ່ານ ສົມພອນ ພັນທະວົງ ຄະນະບໍດີ ຄະນະທັນຕະແພດສາດ ໄດ້ກ່າວວ່າ: ເພື່ອ ເປັນການສ້າງຂະບວນການ ຊົມເຊີຍວັນແພດລາວ ຄົບຮອບ 68 ປີ ແລະ ຕ້ອນຮັບວັນຊາດ 2 ທັນວາ ຄົບຮອບ 47 ປີ ທີ່ຈະມາເຖິງນີ້, ພາຍໃຕ້ຄວາມຮ່ວມມື ແລະ ຄວາມຮັກແພງ ສາມັກຄີ ຊ່ວຍເຫລືອ ຊຶ່ງກັນ ແລະ ກັນ ຖານບ້ານໃກ້ເຮືອນຄຽງ ລະຫວ່າງລາວ-ໄທ. ງານອັນສຳຄັນ ດ້ານສາທາລະນາສຸກ ໃນຄັ້ງນີ້ ຈັດຂຶ້ນ ເພື່ອເປັນການ ສືບທອດ ສາຍສໍາພັນທາງ ດ້ານວິຊາການ ທັງສອງຊາດ ໂດຍສະເພາະ ແມ່ນກັບປະທານ ມູນນິທິທັນຕະແພດເອກະຊົນ ແຫ່ງປະເທດໄທ ເປັນຜູ້ລິເລີ່ມ ໃນການອອກໜ່ວຍບໍລິການ ກວດພະຍາດທົ່ວໄປ ແລະ ການກວດສຸຂະພາບ ຊ່ອງປາກ-ແຂ້ວ ໃຫ້ປະຊາຊົນ ໃນນະຄອນຫລວງວຽງຈັນ ຊຶ່ງປະກອບມີໜ່ວຍ ທັນຕະກໍາ ໂຄງການສຸຂະພາບດີ ໃຕ້ຮົ່ມພຣະບາລະມີ; ໜ່ວຍທັນຕະກຳ ພຣະລາດຊະທານ ມ.ຂອນແກ່ນ; ໜ່ວຍທັນຕະກຳ ໂຮງໝໍມະຫາຣາດ ນະຄອນຣາຊະສີມາ; ໂຮງໝໍພູມິພົນອະດຸນຍະເດດ ກອງທັບອາກາດໄທ; ໂຮງໝໍໄຊຍະພູມ ກະຊວງສາທາລະນະສຸກ ປະເທດໄທ; ໂຮງໝໍກະເສມລາດ ອິນເຕີເນຊັນນໍ ວຽງຈັນ ແລະ ທີມງານອາຈານ-ນັກສຶກສາ ຈາກຄະນະ ທັນຕະແພດສາດ ມວສ.
ການບໍລິການກວດສຸຂະພາບຟີ ໃນຄັ້ງນີ້ ເພື່ອໃຫ້ປະຊາຊົນ ໃນນະຄອນຫລວງວຽງຈັນ ໄດ້ຮັບບໍລິການກວດ-ຈ່າຍຢາ ປິ່ນປົວພະຍາດທົ່ວໄປ ແລະ ໄດ້ຮັບການໃຫ້ບໍລິການ ດ້ານທັນຕະກໍາ ຈາກທັນຕະແພດ ຜູ້ຊ່ຽວຊານສະເພາະທາງ; ທັງເປັນການພັດທະນາ ຄວາມຮູ້ທັກສະວິຊາການ ໃຫ້ແກ່ທັນຕະແພດ ບຸກຄະລາກອນລາວ ໄດ້ຮ່ວມກັບທັນຕະແພດ ບຸກຄະລາກອນ ແລະ ພັດທະນາວັດຕະກໍາ ການສົ່ງເສີມສຸຂະພາບຊ່ອງປາກ ໂດຍການມີສ່ວນຮ່ວມ ຂອງຊຸມຊົນ. ໃນການບໍລິການປະກອບມີ: ກວດແຂ້ວ ແລະ ພະຍາດຊ່ອງປາກ; ປິ່ນປົວ ແລະ ອັດແຂ້ວ; ຖອນແຂ້ວ; ຂູດຫີນປູນ; ກວດພະຍາດທົ່ວໄປ ແລະ ກວດພະຍາດຜີວໜັງ.
KPL
