ຂປລ. ໃນວັນທີ 16 ກັນຍາ 2021 ທີ່ນະຄອນຫລວງວຽງຈັນ, ໄດ້ມີພິທີເຊັນບົດບັນທຶນ ຄວາມເຂົ້າໃນ ລະຫວ່າງ ກະຊວງການເງິນ ແຫ່ງ ສປປ ລາວ ແລະ ບໍລິສັດ ຫົວເຫວີຍ ເທັກໂນໂລຢີ (ລາວ)ຈຳກັດຜູ້ດຽວ, ເພື່ອສຳຫລວດອອກແບບ ລະບົບຄຸ້ມຄອງການເງິນ ພາກລັດແບບດິຈີຕອນ ແລະ ສ້າງແຜນຍຸດທະສາດ ພັດທະນາຄຸ້ມຄອງ ງົບປະມານແຫ່ງລັດ (ລາຍຮັັບ - ລາຍຈ່າຍ ໃຫ້ເປັນດິຈີຕອນ) ໂດຍການເຂົ້າຮ່ວມ ເປັນສັກຂີພິຍານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີ ກະຊວງການງເງິນ, ຕາງໜ້າລົງນາມໂດຍ ທ່ານ ບຸນເຫລືອ ສິນໄຊວໍຣະວົງ ຮອງລັດຖະມົນຕີ ກະຊວງການເງິນ ແລະ ທ່ານ ເຄວິນ ຫູ ປະທານ ບໍລິສັດ ຫົວເຫວີຍ ເທັກໂນໂລຢີ (ລາວ)ຈໍາກັດຜູ້ດຽວ, ມີບັນດາພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ, ທ່ານ ບຸນເຫລືອ ສິນໄຊວໍຣະວົງ ໄດ້ກ່າວວ່າ: ເພື່ອເປັນການຈັດຕັ້ງ ປະຕິບັດແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ແຜນງົບປະມານແຫ່ງລັດ 5 ປີ (2021-2025) ລັດຖະບານ ສປປ ລາວ ໄດ້ມີແນວທາງນະໂຍບາຍ ແລະ ມາດຕະການປະຕິຮູບແບບຮອບດ້ານ, ຊຶ່ງໃນນັ້ນກໍ່ແມ່ນ ການປະຕິຮູບວຽກງານ ຂະແໜງການເງິນ ເປັນອັນສຳຄັນ. ຕະຫລອດໄລຍະ 10 ຜ່ານມາ, ກະຊວງການເງິນ ໃນນາມເປັນຜູ້ຈັດຕັ້ງ ຜັນຂະຫຍາຍ ນະໂຍບາຍ ແລະ ທິດທາງດັ່ງກ່າວ ໄດ້ຖືເອົາການຫັນວຽກງານ ຂະແໜງການເງິນ ເປັນທັນສະໄໝ ເປັນບຸລິມະສິດ ໂດຍໄດ້ມີວິໄສທັດ ຮອດ ປີ 2030 ແລະ ຍຸດທະສາດພັດທະນາ ການເງິນແຫ່ງລັດ ຮອດ ປີ 2025 ຊຶ່ງໃນຍຸດທະສາດ ທີ 07 ກໍ່ຄື ການພັດທະນາ ຂະແໜງການເງິນພາກລັດ ເປັນທັນສະໄໝທຽບເທົ່າພາກພື້ນ ແລະ ສາກົນ, ພ້ອມນັ້ນ ກໍ່ໄດ້ກຳນົດເຂົ້າໃນ 7 ທິດທາງລວມ ແລະ ຄາດໝາຍສູ້ຊົນ ແຜນພັດທະນາ ຂະແໜງການເງິນ ໄລຍະ 5 ປີ (2021-2025); ໜຶ່ງໃນນັ້ນ, ກໍ່ແມ່ນ ພັດທະນາລະບົບ ຄຸ້ມຄອງຂໍ້ມູນຂ່າວສານ ການເງິນ-ງົບປະມານ ແລະ ການບໍລິຫານລັດ ດ້ວຍກົດໝາຍໃຫ້ມີຄວາມສັກສິດ, ເປັນທັນສະໄໝ ແລະ ກ້າວໄປສູ່ລະບົບດີຈີຕອນ.

ໂຄງການທີ່ຈະລົງນາມ ບົດບັນທຶກຄວາມເຂົ້າໃຈ ຮ່ວມກັບ ຫົວເຫວີຍ ໃນມື້ນີ້ ຖືວ່າມີຄວາມໝາຍຄວາມສຳຄັນຫລາຍ, ຊຶ່ງຈະໄດ້ລົງເລິກສຶກສາກວມເອົາ 2 ຂົງເຂດ ຄື: ສໍາຫລວດ, ອອກແບບ ລະບົບຄຸ້ມຄອງການເງິນ ພາກລັດເປັນດິຈິຕອນ; ແລະ ການສ້າງແຜນຍຸດທະສາດພັດທະນາ ການຫັນວຽກງານການເງິນເປັນດິຈິຕອນ, ຊຶ່ງຈະສຸມໃສບັນດາໜ້າວຽກຕົ້ນຕໍ ດັ່ງນີ້: ລະບົບພາສີອັດສະລິຍະ (Smart Customs); ລະບົບ ຄຸ້ມຄອງອາກອນແບບລວມສູນ (Integrated Tax Information Systems); ສູນວິເຄາະ - ວິໃຈການເງິນພາກລັດ (Public Financial Data Analytic Center for Big Data Platform)ລະບົບ ຄຸ້ມຄອງ; ຫ້ອງການແບບດິຈິຕອນ (Digital Office Automation Platform) ແລະ ລະບົບຄຸ້ມຄອງບຸກຄະລາກອນ (Personnel Management System); ລະບົບ ຄຸ້ມຄອງລັດວິສາຫະກິດ (State Owned Enterprise Management Systems); ລະບົບເຊື່ອມຕໍ່ ຂໍ້ມູນບັນຊີຂອງ ຫົວໜ່ວຍ ທຸລະກິດ (Interfacing with Enterprises Accounting Systems); ລະບົບ ການຊໍາລະສະສາງ ແບບ ດິຈິຕອນ (Digital Payment Gateway); ພື້ນຖານໂຄງລ່າງເຄືອຂ່າຍ ແລະ ຄວາມປອດໄພແບບຄລາວ (MOF Cloud).

ທ່ານ ບຸນເຫລືອ ສິນໄຊວໍຣະວົງ ຍັງໃຫ້ຮູ້ອີກວ່າ: ໂຄງການດັ່ງກ່າວ, ແມ່ນຈະໃຫ້ສຳເລັດ ການສຶກສາພາຍໃນໄລຍະ 03 ເດືອນ ກ່ອນການເຂົ້າສູ່ ການຈັດຕັ້ງປະຕິບັດຕົວຈິງ ໃນປີ 2022-2023. ພາຍ ຫລັງທີ່ໄດ້ສຳເລັດການສຳຫລວດ ແລະ ອອກແບບ ລະບົບດັ່ງກ່າວແລ້ວ ກະຊວງການເງິນ ກໍ່ຈະໄດ້ນໍາສະເໜີ ຕໍ່ລັດຖະບານ ເພື່ອພິຈາລະນາຮັບຮອງເອົາ ການຫັນ ວຽກງານ ການເງິນເປັນດິຈິຕອນ ເຂົ້າເປັນແຜນງານຂອງ ລັດຖະບານ ສປປ ລາວ. ນອກນັ້ນ,  ກະຊວງການເງິນ ຍັງຈະໄດ້ມີການ ປະສານສົມທົບ ແລະ ເຮັດວຽກຮ່ວມກັບບັນດາ ຂະແໜງການທີ່ກ່ຽວຂ້ອງ ເພື່ອຮັບປະກັນໃຫ້ລະບົບ ຄຸ້ມຄອງການ ເງິນພາກລັດ ໄດ້ມາດຕະຖານ ແລະ ສາມາດເຊື່ອມຕໍ່ກັບ ຂະແໜງການທີ່ກ່ຽວຂ້ອງ ໄດ້ຢ່າງມີປະສິດທິຜົນ, ຊຶ່ງຫວັງວ່າ ບັນດາທ່ານ ຈະໃຫ້ການຮ່ວມມື ແລະ ສະໜັບສະໜູນ ໂຄງການດັ່ງກ່າວນີ້ດ້ວຍ.

ທ່ານ ເຄວິນ ຫູ ປະທານບໍລິສັດ ຫົວເຫວີຍ ປະຈຳລາວ ໄດ້ກ່າວວ່າ: ຮູບແບບການວາງແຜນ ແລະ ການອອກແບບ ທີ່ເຮົາໄດ້ຈັດຫາໃຫ້ນັ້ນ ແມ່ນຂຶ້ນຢູ່ກັບປັນຫາ ແລະ ຄວາມຕ້ອງການຫລັກໃນປັດຈຸບັນ ແລະ ຈະພິຈາລະນາເຖິງ ຄວາມຕ້ອງການ ຂອງລະບົບເຊື່ອມຕໍ່ ແລະ ການພັດທະນາໃນອະນາຄົດ, ລວມເຖິງການປະສົມ ປະສານທະນາຄານ, ສະຖາບັນການເງິນ ແລະ ຜູ້ໃຫ້ບໍລິການດ້ານ ການຊຳລະເງິນ ເທິງມືຖືຜ່ານແອັບພິເຄຊັ່ນ ເພື່ອໃຫ້ບັນລຸການບໍລິການ ແລະ ການຈັດການລະບົບ E2E (end to end). ການລົງນາມບົດບັນທຶກດັ່ງກ່າວ, ເປັນພຽງຈຸດເລີ່ມຕົ້ນ ໃນບາດກ້າວນີ້, ພາຍໃນ ສາມເດືອນຕໍ່ຈາກນີ້ ເຮົາຈະເຮັດການສໍາຫລວດອອກແບບ ແລະ ພັດທະນາລະບົບຄຸ້ມຄອງ ການເງິນພາກລັດ ແບບດິຈີຕອນ, ກຳນົດກົນລະຍຸດ ການປ່ຽນແປງທາງດິຈີຕອນ ແລະ ກຽມພ້ອມສໍາລັບໂຄງການ ເພື່ອເຂົ້າສູ່ຂັ້ນຕອນການປະ ຕິບັດໃຫ້ໄວທີ່ສຸດ. ຂ້າພະເຈົ້າຫວັງຢ່າງຫຍິ່ງວ່າ ບັນດາທ່ານທີ່ເຂົ້າຮ່ວມ ຈະໃຫ້ການສະໜັບສະໜູນ ຢ່າງຕໍ່ເນື່ອງໃນວຽກ ທີ່ກຳລັງປະຕິບັດຢູ່ ເພື່ອໃຫ້ການອອແບບ ແລະ ພັດທະນາລະບົບດັ່ງກ່າວ ສຳເລັດຕາມຄາດໝາຍ.

ຂ່າວ: ສົມຫວັງ

KPL